ಬೆಂಗಳೂರು: ಭರತ್ ನಿರ್ದೇಶನದಲ್ಲಿ ಮನೋರಂಜನ್ ನಟಿಸುತ್ತಿರುವ 'ಸಾಹೇಬ' ಸಿನೆಮಾ ರವಿಚಂದ್ರನ್ ಅಭಿಮಾನಿಗಳನ್ನು ಕೂಡ ಸೆಳೆಯುವ ನಿಟ್ಟಿನಲ್ಲಿದೆ. ಕ್ರೇಜಿ ಸ್ಟಾರ್ ಅವರ ಪ್ರಖ್ಯಾತ ಹಾಡೊಂದನ್ನು ಪುತ್ರನ ಸಿನೆಮಾದಲ್ಲಿ ಬಳಸಲು ನಿರ್ದೇಶಕ ಮುಂದಾಗಿದ್ದಾರೆ. 'ಯಾರೆ ನೀನು ರೋಜಾ ಹೂವೆ' ಚಿತ್ರಕ್ಕೆ ಮನೋರಂಜನ್ ಹೆಜ್ಜೆ ಹಾಕಲಿದ್ದಾರೆ. ಇದು 1985 ರಲ್ಲಿ ರಾಜೇಂದ್ರ ಬಾಬು ನಿರ್ದೇಶಿಸಿದ್ದ 'ನಾನು ನನ್ನ ಹೆಂಡ್ತಿ' ಸಿನೆಮಾದ ಹಾಡು.
"ರವಿಚಂದ್ರನ್ ತಮ್ಮ ವೃತ್ತಿಜೀವನದಲ್ಲಿ ಹಲವಾರು ಬ್ಲಾಕ್ ಬಸ್ಟರ್ ಹಾಡುಗಳನ್ನು ನೀಡಿದ್ದಾರೆ. ಈ ಹಾಡು ಕಥೆಗೆ ಹೊಂದಿಕೊಳ್ಳುವುದರಿಂದ ನಿರ್ದೇಶಕ ಇದನ್ನು ಆಯ್ಕೆ ಮಾಡಿಕೊಂಡರು" ಎನ್ನುವ ಮೂಲಗಳು ಸ್ಕ್ರಿಪ್ಟ್ ನಲ್ಲಿ ಅವಕಾಶ ಇಲ್ಲದೆ ಹೋದದ್ದಕ್ಕೆ ಈ ಸಿನೆಮಾದಲ್ಲಿ ರವಿಚಂದ್ರನ್ ಅವರನ್ನು ಕರೆತರಲು ಸಾಧ್ಯವಾಗಲಿಲ್ಲ ಎನ್ನುತ್ತಾರೆ.
ಈ ಹಾಡನ್ನು ಮರುಸೃಷ್ಟಿಸುವುದಕ್ಕೆ ಎಷ್ಟು ಉತ್ಸಾಹ ಇದೆಯೋ ಅಷ್ಟೇ ಭಯ ಕೂಡ ಇದೆ ಮತ್ತು ಇದಕ್ಕೆ ಮುರಳಿ ಮಾಸ್ಟರ್ ನೃತ್ಯ ನಿರ್ದೇಶನ ಮಾಡಿದ್ದಾರೆ ಎನ್ನುವ ಮನೋರಂಜನ್ "80 ರಿಂದ ಈ ಹಾಡನ್ನು ಎಲ್ಲ ಬಲ್ಲರು. ಇದು ಇಂದಿಗೂ ಜನಪ್ರಿಯ. ಮೂಲ ಎಂದಿಗೂ ಅತ್ಯುತ್ತಮ ಮತ್ತು ಈಗ ನಮ್ಮಲ್ಲಿ ಎರಡು ಮರುಆವೃತ್ತಿಗಳಿವೆ. ಈ ಹಾಡಿಗೆ ಹೆಜ್ಜೆ ಹಾಕಿರುವುದಕ್ಕೆ ನಾನು ಅದೃಷ್ಟವಂತ ಆದರೆ ಜನ ನನ್ನ ತಂದೆಯವರೊಂದಿಗೆ ಹೋಲಿಕೆ ಮಾಡಲು ಪ್ರಾರಂಭಿಸುತ್ತಾರೆ. ಹಳೆಯ ಆವೃತ್ತಿಗಿಂತಲೂ ಚೆನ್ನಾಗಿ ಮಾಡಲು ಪ್ರಯತ್ನಿಸುತ್ತಿದ್ದೇವೆ" ಎನ್ನುತ್ತಾರೆ.
ಜಯಣ್ಣ-ಭೋಗೇಂದ್ರ ನಿರ್ಮಿಸುತ್ತಿರುವ ಈ ಸಿನೆಮಾದಲ್ಲಿ ಶಾನ್ವಿ ಶ್ರೀವಾಸ್ತವ ನಾಯಕ ನಟಿ. ಹಿರಿಯ ನಟಿ ಲಕ್ಷ್ಮಿ ಕೂಡ ತಾರಾಗಣದ ಭಾಗವಾಗಿದ್ದು, ವಿ ಹರಿಕೃಷ್ಣ ಸಂಗೀತ ನೀಡಿದ್ದಾರೆ. ರವಿಚಂದ್ರನ್ ಅವರ ಬಹುತೇಕ ಸಿನೆಮಾಗಳ ಛಾಯಾಗ್ರಾಹಕ ಜಿ ಎಸ್ ವಿ ಸೀತಾರಾಮ್ ಅವರ ಸಿನೆಮ್ಯಾಟೋಗ್ರಫಿ ಇದೆ.