ಮುಂಬೈ: ಹಲವಾರು ನನಪಿನಲ್ಲುಳಿಯುವ ಹಾಸ್ಯ ಪಾತ್ರಗಳನ್ನು ಮಾಡಿ, ಹಾಸ್ಯ ಸಂಭಾಷಣೆಯನ್ನು ಹರಿಸಿರುವ ಮೆಗಾಸ್ಟಾರ್ ಅಮಿತಾಬ್ ಬಚ್ಚನ್, ಮಾಜಿ ನ್ಯಾಯಮೂರ್ತಿ ಮಾರ್ಕಂಡೇಯ ಕಾಟ್ಜು ಅವರ ಹೇಳಿಕೆಯನ್ನು ಸಂಯಮದಿಂದ ಸ್ವೀಕರಿಸಿದ್ದಾರೆ. 'ನಟನ ತಲೆಯಲ್ಲಿ ಏನು ಇಲ್ಲ' ಎಂದು ಕಾಟ್ಜು ಹೇಳಿದ್ದರು. 

"ಅವರು (ಕಾಟ್ಜು ) ಸರಿ, ನನ್ನ ತಲೆಯಲ್ಲಿ ಏನು ಇಲ್ಲ. ಅವರು ಸರಿ... ನನ್ನ ತಲೆ ಖಲಾಸ್ (ಮುಗಿದಿದೆ)" ಎಂದು ತೀವ್ರ ಹೇಳಿಕೆಗಳಿಗೆ ಜನಪ್ರಿಯರಾದ ಮಾಜಿ ಸುಪ್ರೀಂ ಕೋರ್ಟ್ ನ್ಯಾಯಾಧೀಶ ಕಾಟ್ಜು ಅವರ ಹೇಳಿಕೆಗೆ ಪ್ರತಿಕ್ರಿಯಿಸಿದ್ದಾರೆ. 

'ಪಿಂಕ್' ಸಿನೆಮಾದ ಪ್ರದರ್ಶನಕ್ಕಾಗಿ ಜನರ-ವಿಮರ್ಶಕರ ಮೆಚ್ಚುಗೆ ಪಡೆಯುತ್ತಿದ್ದ ಸಮಯದಲ್ಲಿ ಬಿಗ್ ಬಿ ಅವರ ಪ್ರತಿಭೆಯ ಬಗ್ಗೆ ಕಾಟ್ಜು ಅವರು ವಿಭಿನ್ನ ನಿಲುವು ತಳೆದಿದ್ದರು. 

ಸೆಪ್ಟೆಂಬರ್ 17 ರಂದು ಸಾಮಾಜಿಕ ಮಾಧ್ಯಮದಲ್ಲಿ ಬರೆದಿದ್ದ ಮಾಜಿ ನ್ಯಾಯಾಧೀಶ "ತಲೆಯಲ್ಲಿ ಏನೂ ಇರದ ವ್ಯಕ್ತಿ ಅಮಿತಾಬ್ ಬಚ್ಚನ್ ಮತ್ತು ಬಹುತೇಕ ಎಲ್ಲ ಮಾಧ್ಯಮ ವ್ಯಕ್ತಿಗಳು ಅವರನ್ನು ಹೊಗಳುವುದರಿಂದ ಅವರ ತಲೆಯಲ್ಲಿಯೂ ಏನು ಇಲ್ಲ" ಎಂದಿದ್ದರು. 

"ನಾವು ಒಂದೇ ಶಾಲೆಯಲ್ಲಿ ಓದಿದವರು. ಅವರು ನನಗೆ ಹಿರಿಯ ವಿದ್ಯಾರ್ಥಿ. ಯಾವುದೇ ದ್ವೇಷವಿಲ್ಲ" ಎಂದು ಪತ್ರಿಕಾ ಗೋಷ್ಠಿಯಲ್ಲಿ 73 ವರ್ಷದ ನಟ ಪ್ರಶ್ನೆಯೊಂದಕ್ಕೆ ಪ್ರತಿಕ್ರಿಯಿಸಿದ್ದಾರೆ.