ಮುಂಬಯಿ: ಮೊರಕ್ಕೊ ರಸ್ತೆಗಳಲ್ಲಿ ನಟಿ ಕತ್ರೀನಾ ಕೈಫ್ ಜೊತೆ ರಣ್ಬೀರ್ ಕಪೂರ್ ಡ್ಯಾನ್ಸ್ ಮಾಡುತ್ತಾ ಹಣ ಬೇಡಿದ್ದಾರೆ. 

ಹೌದು. ಜಗ್ಗಾ ಜಾಸೂಸ್ ಚಿತ್ರದ ಹಾಡಿನ ಶೂಟಿಂಗ್ ವೊಂದರಲ್ಲಿ ರಣ್ಬೀರ್ ಮತ್ತು ಕತ್ರೀನಾ ಡ್ಯಾನ್ಸ್ ಮಾಡಿ ಅಲ್ಲಿ ನೆರೆದಿದ್ದ ಜನರ ಬಳಿಯಿಂದ ಹಣ ಸಂಗ್ರಹಿಸಿದ್ದಾರೆ.

ಚಿತ್ರೀಕರಣಕ್ಕೂ ಮೊದಲು ನಿರ್ದೇಶಕ ಅನುರಾಗ್ ಬಸು ಮತ್ತು ಅವರ ಸಹಾಯಕರು ಮೊರಕ್ಕೊ ರಸ್ತೆಯಲ್ಲಿ ಡ್ಯಾನ್ಸ್ ಆರಂಭಿಸಿದ್ದಾರೆ, ಡ್ಯಾನ್ಸ್ ನೋಡಲು ಜನ ಸೇರುತ್ತಾರೋ ಇಲ್ಲವೋ ಎಂಬುದನ್ನು ತಿಳಿಯಲು ಡ್ಯಾನ್ಸ್ ಮಾಡುತ್ತಿದ್ದರು.

ನೋಡ ನೋಡುತ್ತಿದ್ದಂತೆಯೇ ಭಾರೀ ಪ್ರಮಾಣದಲ್ಲಿ ಜನ ಸಮುದಾಯವೇ ಅಲ್ಲಿ ನೆರೆದು ಡ್ಯಾನ್ಸ್ ಪ್ರದರ್ಶನ ನೋಡುತ್ತಿತ್ತು. ನಿರ್ದೇಶಕರ ಯೋಜನೆ ಫಲಿಸಿತ್ತು. ನಂತರ ರಣ್ಬೀರ್ ಕಪೂರ್ ಮತ್ತು ಕತ್ರೀನಾ ಕೈಫ್ ಅವರನ್ನು ಕರೆತಂದು ಅಲ್ಲಿಯೇ ಡ್ಯಾನ್ಸ್ ಮಾಡಿಸಿದರು. ಈ ವೇಳೆ ಕೇವಲ ಡ್ಯಾನ್ಸ್ ಮಾತ್ರ ಮಾಡದೇ ನೆರೆದಿದ್ದ ಜನರ ಬಳಿ ತಮ್ಮ ಬಳಿಯಿದ್ದ ಟೋಪಿ ಹಿಡಿದು ಹಣ ಕೇಳಿದ್ದಾರೆ.

ಈ ವಿಷಯವನ್ನು ಅನುರಾಗ್ ಬಸು ಹಂಚಿಕೊಂಡಿದ್ದು, ರಣ್ಬೀರ್ ಕಪೂರ್ ಡ್ಯಾನ್ಸ್ ಮಾಡುತ್ತಾ ಹಣ ಸಂಗ್ರಹಿಸಿದ್ದರು. ರಣ್ಬೀರ್ 250-300 ಮೊರಕ್ಕಾನ್ ಧಿರ್ ಹಾಮ್ಸ್ ಸಂಗ್ರಹಿಸಿದ್ದಾರೆ ಎಂದು ಹೇಳಿದ್ದಾರೆ. ಜಗ್ಗಾ ಜಾಸೂಸ್ ಜುಲೈ 14 2017 ರಂದು ರಿಲೀಸ್ ಆಗಲಿದೆ.