ಪುನೀತ್ ರಾಜ್ ಕುಮಾರ್ ಅವರ ಮುಂದಿನ ಚಿತ್ರದ ಬಗ್ಗೆ ವಿವರ ಪಡೆಯಲು ಅವರ ಅಭಿಮಾನಿಗಳು ಕಾತರರಾಗಿದ್ದಾರೆ. ಪವನ್ ಒಡೆಯರ್ ನಿರ್ದೇಶನದ ಚಿತ್ರದಲ್ಲಿ ಅವರು ನಟಿಸುತ್ತಿದ್ದು ಮಾರ್ಚ್ 8ರಿಂದ ಶೂಟಿಂಗ್ ಆರಂಭವಾಗಲಿದೆ ಎಂಬ ಮಾಹಿತಿಗಳನ್ನು ಈ ಹಿಂದೆ ನೀಡಿದ್ದೆವು.

ಇದೀಗ ಚಿತ್ರದ ಮುಹೂರ್ತ ನಿನ್ನೆ ಗಣೇಶ ದೇವಸ್ಥಾನದಲ್ಲಿ ಸರಳವಾಗಿ ನೆರವೇರಿತು. ರಾಕ್ ಲೈನ್ ಸ್ಟುಡಿಯೊ ನಿರ್ಮಾಣದಲ್ಲಿ ತಯಾರಾಗುತ್ತಿರುವ ಚಿತ್ರಕ್ಕೆ ನಿರ್ಮಾಪಕ ಮುನಿರತ್ನ ಚಾಲನೆ ನೀಡಿದರು. ಪುನೀತ್ ರಾಜ್ ಕುಮಾರ್ ಉಪಸ್ಥಿತರಿದ್ದರು.

ಚಿತ್ರದ ಶೀರ್ಷಿಕೆ ಸದ್ಯದಲ್ಲಿಯೇ ನಿರ್ಧಾರವಾಗಲಿದೆ. ಚಿತ್ರದ ಕಲಾವಿದರನ್ನು ಕೂಡ ಶೂಟಿಂಗ್ ಆರಂಭಕ್ಕೆ ಮುನ್ನ ಚಿತ್ರತಂಡ ನಿರ್ಧಾರ ಮಾಡಲಿದೆ. ಇದೊಂದು ರೊಮಾಂಟಿಕ್/ಕಾಮಿಡಿ ಚಿತ್ರವಾಗಲಿದ್ದು ಹಿಂದೆಂದೂ ಅಭಿನಯಿಸದ ರೀತಿಯಲ್ಲಿ ಪುನೀತ್ ರಾಜ್ ಕುಮಾರ್ ಅಭಿನಯಿಸಲಿದ್ದಾರೆ ಎನ್ನುತ್ತದೆ ಚಿತ್ರತಂಡ.

ಕೋಟಿಗೊಬ್ಬ2ಗೆ ಸಂಗೀತ ಸಂಯೋಜಿಸಿದ್ದ ಡಿ.ಇಮ್ಮಾಮ್ ಈ ಚಿತ್ರಕ್ಕೆ ಸಂಗೀತ ಸಂಯೋಜಿಸಲಿದ್ದಾರೆ. ವೈಡಿ ಎಸ್ ಕ್ಯಾಮರಾ ಮತ್ತು ಮಹೇಶ್ ಎಸ್ ಅವರ ಸಂಕಲನವಿದೆ.