ಬೆಂಗಳೂರು: ಕನ್ನಡದ ಬ್ಲಾಕ್ ಬಸ್ಟರ್ ಚಿತ್ರ "ಕೆಜಿಎಫ್"ನ್ನು ರಾಕಿ ಬಾಯ್ ಪತ್ನಿ ರಾಧಿಕಾ ಪಂಡಿತ್ ಇನ್ನೂ ನೋಡಿಲ್ಲ! ಹೌದು ಬಾಕ್ಸ್ ಆಫೀಸ್ ನಲ್ಲಿ ನೂರೈವತ್ತು ಕೋಟಿ ಗಳಿಸಿ ದೇಶಾದ್ಯಂತ ಸದ್ದು ಮಾಡಿರುವ ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಚಿತ್ರವನ್ನು ಅವರ ಪತ್ನಿ ರಾಧಿಕಾ ಪಂಡಿತ್ ಇನ್ನೂ ನೋಡಿಲ್ಲ ಎನ್ನುವುದಕ್ಕೆ ಸ್ವತಃ ಯಶ್ ಸ್ಪಷ್ಟನೆ ನೀಡಿದ್ದಾರೆ.

ಅಭಿಮಾನಿಗಳೊಡನೆ ಹೊಸ ಸೌಂಡ್ ನೊಡನೆ ತೆರೆಗೆ ಬಂದ ಚಿತ್ರವನ್ನು ನೋಡಲು ನಟ ಯಶ್ ಒರಾಯನ್ ಮಾಲ್ ಗೆ ಆಗಮಿಸಿದ್ದ ವೇಳೆ ತನ್ನ ಪತ್ನಿ ರಾಧಿಕಾ ಇನ್ನೂ ಚಿತ್ರ ವೀಕ್ಷಿಸಿಲ್ಲ ಎಂದು ಹೇಳಿದ್ದಾರೆ.

ಎಲ್ಲರೂ ಇಷ್ಟು ಇಷ್ಟಪಟ್ಟ ಸಿನಿಮಾವನ್ನು ತಾನೂ ನೋಡಬೇಕೆಂದು ನಟಿ ರಾಧಿಕಾ ಪ್ರತಿದಿನ ಕೇಳುತ್ತಿದ್ದಾರೆ. ಆದರೆ ಆಕೆಗೆ ಸಧ್ಯ ಸಿನಿಮಾ ವೀಕ್ಷಿಸಲು ಸಾಧ್ಯವಿಲ್ಲ. ವೈದ್ಯರು ಆಕೆಗೆ ಮನೆಯಲ್ಲೇ ವಿಶ್ರಾಂತಿ ಪಡೆಯಬೇಕೆಂದು ತಾಕೀತು ಮಾಡಿದ್ದು ಈ ಕಾರಣ ಅವರು ಸಧ್ಯ ಸಿನಿಮಾ ವೀಕ್ಷಿಸಲು ಸಾಧ್ಯವಿಲ್ಲ  ಎಂದು ನಟ ಯಶ್ ಹೇಳಿದ್ದಾರೆ.

ರಾಧಿಕಾ ಕಳೆದ ಡಿಸೆಂಬರ್ 2ರಂದು ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದು ಅವರೀಗ ಮನೆಯಲ್ಲಿ ಮಗುವಿನ ಲಾಲನೆ, ಪಾಲನೆಯಲ್ಲಿ ನಿರತರಾಗಿದ್ದಾರೆ.

ಈಗ ವಿಶ್ರಂತಿಯಲ್ಲಿರುವ ನಟಿ ಇನ್ನು ಕೆಲ ದಿನಗಳಲ್ಲೇ ಮಗುವಿನೊಡನೆ ಚಿತ್ರಮಂದಿರಕ್ಕೆ ಆಗಮಿಸಿ "ಕೆಜಿಎಫ್" ವೀಕ್ಷಿಸಲಿದ್ದಾರೆ ಎಂದು ನಟ ಯಶ್ ಭರವಸೆ ನೀಡಿದ್ದಾರೆ.