ಬೆಂಗಳೂರು: ಕನ್ನಡ, ತೆಲುಗು, ತಮಿಳು, ಸಿಂಹಳ (ಶ್ರೀಲಂಕಾ) ಸೇರಿದಂತೆ ಹಲವು ಭಾಷೆಗಳಲ್ಲಿ 6,000ಕ್ಕೂ ಹೆಚ್ಚು ಗೀತೆಗಳಿಗೆ ಧ್ವನಿಯಾಗಿದ್ದ ದಕ್ಷಿಣ ಭಾರತದ ಖ್ಯಾತ ಹಿರಿಯ ಹಿನ್ನೆಲೆ ಗಾಯಕಿ ಕೆ. ಜಮುನಾ ರಾಣಿ (88) ಅವರು ವಯೋಸಹಜ ಕಾಯಿಲೆಯಿಂದ ಬೆಂಗಳೂರಿನ ತಮ್ಮ ನಿವಾಸದಲ್ಲಿ ನಿಧನರಾಗಿದ್ದಾರೆ.

ಜಮುನಾ ರಾಣಿ ಯಾರು?

ಆಂಧ್ರಪ್ರದೇಶದಲ್ಲಿ ಮೇ 17, 1938 ರಂದು ವರದರಾಜುಲು ಹಾಗು ದ್ರೌಪತಿ ದಂಪತಿಗಳಿಗೆ ಜನಿಸಿದ್ದ ಜಮುನಾ ರಾಣಿ, ಸಂಗೀತದ ಮೇಲಿನ ಸಂಪೂರ್ಣ ಗಮನ ಮತ್ತು ವೈಯಕ್ತಿಕ ನಿರ್ಧಾರಗಳಿಂದಾಗಿ ತಮ್ಮ ಜೀವನದುದ್ದಕ್ಕೂ ಅವಿವಾಹಿತರಾಗಿಯೇ ಉಳಿದಿದ್ದರು.

7ನೇ ವಯಸ್ಸಿಗೆ ಗಾಯನ ಪ್ರಾರಂಭಿಸಿದ ಕಲೈಮಾಮಣಿ

ತಮ್ಮ 7ನೇ ವಯಸ್ಸಿನಲ್ಲಿಯೇ ತೆಲುಗಿನ ತ್ಯಾಗಯ್ಯ (1946) ಚಿತ್ರದ ಮೂಲಕ ಹಿನ್ನೆಲೆ ಗಾಯನ ಆರಂಭಿಸಿದ ಜಮುನಾ ರಾಣಿ ಅವರು ಕನ್ನಡ, ತೆಲುಗು, ತಮಿಳು, ಮಲಯಾಳಂ ಹಾಗೂ ಸಿಂಹಳ (ಶ್ರೀಲಂಕಾ) ಸೇರಿದಂತೆ ಹಲವು ಭಾಷೆಗಳಲ್ಲಿ 6,000ಕ್ಕೂ ಹೆಚ್ಚು ಗೀತೆಗಳಿಗೆ ಅವರು ಧ್ವನಿಯಾಗಿದ್ದಾರೆ.

ಮುಂದುವರೆದು, ಡಾ. ರಾಜ್‌ಕುಮಾರ್ ಅಭಿನಯದ ಓಹಿಲೇಶ್ವರ ಚಿತ್ರದ ಪ್ರಸಿದ್ಧ ರೋಮ್ಯಾಂಟಿಕ್ ಗೀತೆ ಓ ಸುರ ಸುಂದರಿ, ಮನ ಮೆಚ್ಚಿದ ಮಡದಿ ಚಿತ್ರದ ಲವ್ ಲವ್ ಲವ್, ಜಗದೇಕವೀರ ಚಿತ್ರದ ಕಣ್ಣಿನ ನೋಟವೇ ರತ್ನಮಂಜರಿ ಚಿತ್ರದ ಯಾರು ಯಾರು ನೀ ಯಾರು ಸೇರಿದಂತೆ ಹಲವು ಸಿನಿಮಾಗಳಲ್ಲಿ ಹಾಡಿದ್ದಾರೆ. ಇನ್ನು, ಸಂಗೀತ ಕ್ಷೇತ್ರಕ್ಕೆ ನೀಡಿದ ಮಹೋನ್ನತ ಕೊಡುಗೆಗಾಗಿ ಅವರಿಗೆ ತಮಿಳುನಾಡು ಸರ್ಕಾರದ ಕಲೈಮಾಮಣಿ, ಅಣ್ಣಾ ಪ್ರಶಸ್ತಿ ಹಾಗೂ 2020 ರಲ್ಲಿ ವಿಶೇಷ ಕಲೈಮಾಮಣಿ ಪ್ರಶಸ್ತಿ ನೀಡಿ ಗೌರವಿಸಲಾಗಿದೆ.