ಮುಂಬೈ: ವೆಸ್ಟ್ ಇಂಡೀಸ್ ಪ್ರವಾಸದಲ್ಲಿರುವ ಟೀಂ ಇಂಡಿಯಾ ಆಟಗಾರರು ಅಭ್ಯಾಸದ ನಡುವೆ ಮೋಜು ಮಸ್ತಿ ಮಾಡುತ್ತಿದ್ದು, ಈ ವೇಳೆ ಕನ್ನಡಿಗ ಕೆಎಲ್ ರಾಹುಲ್ ಬಿಯರ್ ಬಾಟಲಿಯೊಂದಿಗೆ ಸೆಲ್ಫಿಗೆ ಫೋಸ್ ನೀಡಿರುವುದಕ್ಕೆ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ(ಬಿಸಿಸಿಐ) ಗರಂ ಆಗಿದೆ.

ಟೀಂ ಇಂಡಿಯಾ ಆರಂಭಿಕ ಆಟಗಾರ ಕೆಎಲ್ ರಾಹುಲ್ ತಮ್ಮ ಕೈಯಲ್ಲಿ ಬಿಯರ್ ಬಾಟಲ್ ಹಿಡಿದಿದ್ದ ಚಿತ್ರವನ್ನು ಸಾಮಾಜಿಕ ತಾಣದಲ್ಲಿ ಪ್ರಕಟಿಸಿದ್ದರು. ರಾಹುಲ್ ಜತೆ ಆಲ್ ರೌಂಡರ್ ಸ್ಟುವರ್ಟ್ ಬಿನ್ನಿ, ವೇಗಿ ಉಮೇಶ್ ಯಾದವ್ ಹಾಗೂ ತಂಡದ ಸಿಬ್ಬಂದಿ ಇದ್ದರು. ಈ ಬಗ್ಗೆ ಬಿಸಿಸಿಐ ಆಕ್ಷೇಪ ವ್ಯಕ್ತಪಡಿಸಿದ್ದು, ಪ್ರವಾಸದ ವೇಳೆ ಆಟಗಾರರ ವರ್ತನೆ ಆದರ್ಶವಾಗಿರಬೇಕೇ ಹೊರತು ಅಸಭ್ಯತೆ ಪ್ರದರ್ಶಿಸಬಾರದು ಎಂದು ಆಟಗಾರರ ಕಿವಿ ಹಿಂಡಿದೆ.

ಸೆಂಟ್ ಸೆವಿಸ್ ಬೀಚ್ ನಲ್ಲಿ ಆಟಗಾರರ ಬಾಂಡಿಂಗ್ ಸೆಶನ್ ಮುಗಿದ ಎರಡು ದಿನಗಳ ಬಳಿಕ ತಂಡದ ಮ್ಯಾನೇಜರ್ ರಿಯಾಜ್ ಬಾಗ್ವಾನ್ ಮೂಲಕ ಬಿಸಿಸಿಐ ಸೂಚನೆ ರವಾನಿಸಿದೆ. ಇನ್ನು ಬಿಸಿಸಿಐನಿಂದ ಆಕ್ಷೇಪ ವ್ಯಕ್ತವಾಗುತ್ತಿದ್ದಂತೆ ಕೆಎಲ್ ರಾಹುಲ್ ಪ್ರಕಟಿಸಿದ್ದ ಫೋಟೋವನ್ನು ಅಳಿಸಿ ಹಾಕಿದ್ದಾರೆ.