ಲಂಡನ್: ಇಂಡಿಯನ್ ಪ್ರಿಮಿಯರ್ ಲೀಗ್(ಐಪಿಎಲ್) 11ನೇ ಆವೃತ್ತಿ ಭಾರೀ ರೋಚಕತೆಯಿಂದ ಕೂಡಿದ್ದು ಇಂಗ್ಲೆಂಡ್ ನ 12 ಆಟಗಾರರು ಈ ಬಾರಿ ಕಣದಲ್ಲಿದ್ದಾರೆ. 

ಆದರೆ ಇಂಗ್ಲೆಂಡ್ ಕ್ರಿಕೆಟ್ ನಲ್ಲಿ ಐಪಿಎಲ್ ಹಣಕ್ಕಾಗಿ ಕಿತ್ತಾಟ ಶುರುವಾಗಿದೆ. ಐಪಿಎಲ್ ಗೆ ತಮ್ಮ ದೇಶಗಳ ಆಟಗಾರರನ್ನು ಕಳುಹಿಸುವ ವಿದೇಶಿ ಕ್ರಿಕೆಟ್ ಮಂಡಳಿಗಳಿಗೆ, ಆ ದೇಶದ ಆಟಗಾರರ ಗುತ್ತಿಗೆ ಮೌಲ್ಯದ ಶೇ.20ರಷ್ಟು ಮೊತ್ತವನ್ನು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ(ಬಿಸಿಸಿಐ) ಪಾವತಿಸಲಿದೆ. 

ಈ ವಿಚಾರಕ್ಕೆ ಇಂಗ್ಲೆಂಡ್ ಕ್ರಿಕೆಟ್ ನಲ್ಲಿ ವಿವಾದ ಸೃಷ್ಟಿಯಾಗಿದೆ. ಆಟಗಾರರನ್ನು ಐಪಿಎಲ್ ಗೆ ಕಳುಹಿಸಿದ್ದಕ್ಕೆ ಕೌಂಟಿ ತಂಡಗಳಿಗೆ ಹಣ ಸೇರಬೇಕು, ಆದರೆ ಇಂಗ್ಲೆಂಡ್ ಕ್ರಿಕೆಟ್ ಬೋರ್ಡ್ ಎಲ್ಲಾ ಹಣವನ್ನು ತಾನೇ ಬಳಸಿಕೊಳ್ಳುತ್ತಿದೆ ಎಂದು ಸರ್ರೆ ಕೌಂಟಿ ತಂಡದ ನಿರ್ದೇಶಕ ಮಾಜಿ ಕ್ರಿಕೆಟಿಗ ಅಲೆಕ್ಸ್ ಸ್ಟೀವರ್ಟ್ ಆರೋಪಿಸಿದ್ದಾರೆ.