ರಾಜ್ ಕೋಟ್: ಭಾರತ ತಂಡದ ಕೀಪರ್ ಆಗಲು ರಿಷಬ್ ಪಂತ್ ನಾಲಾಯಕ್ ಎಂಬ ಟೀಕೆಗಳು ವ್ಯಕ್ತವಾಗಿದ್ದು ಇದರ ಬೆನ್ನಲ್ಲೇ ಪಂತ್ ರನೌಟ್ ಮಾಡಿ ತಾವು ಸಮರ್ಥ ಕೀಪರ್ ಎಂಬುದನ್ನು ಸಾಬೀತುಪಡಿಸಿದ್ದಾರೆ. ಈ ವಿಡಿಯೋ ಇದೀಗ ವೈರಲ್ ಆಗಿದೆ. 

ಬಾಂಗ್ಲಾದೇಶ ವಿರುದ್ಧದ ಎರಡನೇ ಟಿ20 ಪಂದ್ಯದಲ್ಲಿ ಲಿಟನ್ ದಾಸ್ 29 ರನ್ ಪೇರಿಸಿ ಉತ್ತಮವಾಗಿ ಆಡುತ್ತಿದ್ದರು. ಈ ವೇಳೆ 7ನೇ ಓವರ್ ನ 2 ಎಸೆತದಲ್ಲಿ ಯಜುವೇಂದ್ರ ಚಹಾಲ್ ಗೂಗ್ಲಿಗೆ ಲಿಟನ್ ತತ್ತರಿಸಿದ್ದರು. ಪ್ಯಾಡ್ ಗೆ ಚೆಂಡು ತಗುಲಿ ರಿಷಬ್ ಕೈಸೇರಲಿತ್ತು. ಆದರೆ ಪಂತ್ ಎಲ್ ಬಿಡಬ್ಲ್ಯೂ ಅಪೀಲ್ ನಲ್ಲಿ ತೊಡಗಿದ್ದರಿಂದ ಚೆಂಡನ್ನು ಹಿಡಿಯಲಿಲ್ಲ. 

ಚೆಂಡು ಮುಂದಕ್ಕೆ ಹೋಗುತ್ತಿದ್ದಂತೆ ಲಿಟನ್ ಒಂದು ರನ್ ತೆಗೆದುಕೊಳ್ಳಲು ಮುಂದಾದರೂ ಇದನ್ನು ಕಂಡ ಪಂತ್ ಕೂಡಲೇ ಚೆಂಡನ್ನು ಹಿಡಿದು ವಿಕೆಟ್ ಗೆ ಹೊಡೆದರು. ಈ ಮೂಲಕ ಬಾಂಗ್ಲಾದ ಮೊದಲ ವಿಕೆಟ್ ಪತನಗೊಂಡಿತ್ತು.