ಬೆಂಗಳೂರು: ಬ್ಯಾಟ್ಸ್ ಮನ್ ಗಳು ಕೆಲವೊಮ್ಮೆ ವಿಚಿತ್ರವಾಗಿ ರನೌಟ್ ಆಗಿ ಪೆವಿಲಿಯನ್ ಸೇರುತ್ತಾರೆ. ಅಂತೆ ಭಾರತ ಎ ತಂಡದ ದಾಂಡಿಗ ಜಯದೇವ್ ಉನದ್ಕಟ್ ಪಿಚ್ ಕ್ಲೀನ್ ಮಾಡಲು ಹೋಗಿ ರನೌಟ್ ಆಗಿದ್ದು ಈ ವಿಡಿಯೋ ಇದೀಗ ವೈರಲ್ ಆಗಿದೆ.

ಮೊದಲು ಬ್ಯಾಟಿಂಗ್ ಮಾಡಿದ್ದ ಭಾರತ ಬಿ ತಂಡ 50 ಓವರ್ ಗಳಲ್ಲಿ 302 ರನ್ ಬಾರಿಸಿ ಭಾರತ ಎ ತಂಡಕ್ಕೆ 303 ರನ್ ಗಳ ಗುರಿ ನೀಡಿತ್ತು. ಈ ಬೃಹತ್ ಗುರಿ ಬೆನ್ನಟ್ಟಿದ ಭಾರತ ಎ 176 ರನ್ ಗಳಿಗೆ 7 ವಿಕೆಟ್ ಕಳೆದುಕೊಂಡು ಸೋಲಿನ ಸುಳಿಗೆ ಸಿಲುಕಿತ್ತು. 

ಈ ವೇಳೆ ಬ್ಯಾಟಿಂಗ್ ಗೆ ಬಂದ ಉನದ್ಕಟ್ ನದೀಮ್ ಬೌಲಿಂಗ್ ನಲ್ಲಿ ಕ್ರಿಸ್ ಬಿಟ್ಟು ಮುಂದೆ ಬಂದು ಡಿಫೇನ್ಸ್ ಆಡುತ್ತಾರೆ. ಆಗ ಸ್ವಲ್ಪ ಎಡವಿದ್ದರಿಂದ ಕೂಡಲೇ ಕ್ರಿಸ್ ಗೆ ತೆರಳದೆ ಚೆಂಡು ಬಿದ್ದ ಜಾಗದಲ್ಲಿ ಮಣ್ಣನ್ನು ತೆರವುಗೊಳಿಸುವ ವೇಳೆ ಫೀಲ್ಡರ್ ಕೂಡಲೇ ಚೆಂಡನ್ನು ಕೀಪರ್ ಗೆ ಎಸೆಯುತ್ತಾರೆ. 

ಕೀಪಿಂಗ್ ಮಾಡುತ್ತಿದ್ದ ಪಾರ್ಥಿವ್ ಪಟೇಲ್ ಬ್ಯಾಟ್ಸ್ ಮನ್ ಕ್ರಿಸ್ ಒಳಗೆ ಬರದೆ ಇರುವುದನ್ನು ಗಮನಿಸಿದ್ದು ಕೂಡಲೇ ಚೆಂಡನ್ನು ಹಿಡಿದು ವಿಕೆಟ್ ಗೆ ಹೊಡೆದು ರನೌಟ್ ಮಾಡುತ್ತಾರೆ. ಅಚಾನಕ್ ಆಗಿ ನಡೆದ ಈ ರನೌಟ್ ನಿಂದಾಗಿ ಉನದ್ಕಟ್ ಕಂಗಾಲಾಗಿ ಅಂಪೈರ್ ಕಡೆ ನೋಡುತ್ತಾರೆ. ಅಂಪೈರ್ ಔಟ್ ಎಂದು ತೀರ್ಪು ನೀಡಿದ್ದರಿಂದ ಬ್ಯಾಟ್ಸ್ ಮನ್ ಪೆವಿಲಿಯನ್ ಸೇರುತ್ತಾರೆ. ಈ ವಿಡಿಯೋ ಇದೀಗ ವೈರಲ್ ಆಗಿದೆ.