ಗಾಲೆ: ಗಾಲೆ (Galle)ಯಲ್ಲಿ ನಡೆಯುತ್ತಿರುವ ಶ್ರೀಲಂಕಾ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದ ದಿನದಾಟದ ಅಂತ್ಯಕ್ಕೆ ದೇವದತ್ ಪಡಿಕ್ಕಲ್ ಅವರ ಅದ್ಭುತ ಹಾಗೂ ಅಜೇಯ 131 ರನ್‌ಗಳ ನೆರವಿನಿಂದ ಭಾರತ 2 ವಿಕೆಟ್‌ಗೆ 288 ರನ್‌ಗಳೊಂದಿಗೆ ಮೇಲುಗೈ ಸಾಧಿಸಿದೆ. ಈ ಮೂಲಕ ಅವರು ಟೆಸ್ಟ್ ಕ್ರಿಕೆಟ್‌ಗೆ ಯಶಸ್ವಿಯಾಗಿ ಕಂಬ್ಯಾಕ್ ಮಾಡಿದರು.

2024ರಲ್ಲಿ ಪರ್ತ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಕೊನೆಯದಾಗಿ ಪಡಿಕ್ಕಲ್ ಟೆಸ್ಟ್ ಪಂದ್ಯವನ್ನಾಡಿದ್ದರು. ಇಂದಿನ ಪಂದ್ಯದಲ್ಲಿ 134 ಎಸೆತಗಳಲ್ಲಿ ತಮ್ಮ ಚೊಚ್ಚಲ ಅಂತರರಾಷ್ಟ್ರೀಯ ಶತಕವನ್ನು ಪೂರೈಸಿದರು.

ದಿನದಾಟದ ಅಂತ್ಯಕ್ಕೆ ರಿಷಬ್ ಪಂತ್ 27 ರನ್‌ಗಳೊಂದಿಗೆ ಅವರಿಗೆ ಸಾಥ್ ನೀಡುತ್ತಿದ್ದಾರೆ. ಇವರಿಬ್ಬರೂ ಮೂರನೇ ವಿಕೆಟ್‌ಗೆ ಮುರಿಯದ ಜೊತೆಯಾಟದಲ್ಲಿ 52 ರನ್‌ಗಳನ್ನು ಕಲೆಹಾಕಿದ್ದಾರೆ. ಕೆ.ಎಲ್. ರಾಹುಲ್ ಗಾಯದ ಕಾರಣದಿಂದ ನಿವೃತ್ತರಾಗುವ (Retired hurt)ಮುನ್ನ 162 ಎಸೆತಗಳಲ್ಲಿ 77 ರನ್ ಗಳಿಸಿದರು.

ಎರಡನೇ ವಿಕೆಟ್‌ಗೆ 150 ರನ್‌ ಸೇರಿಸಿದ ಕರ್ನಾಟಕದ ಜೋಡಿ: ಕರ್ನಾಟಕದ ಈ ಜೋಡಿಯು ಎರಡನೇ ವಿಕೆಟ್‌ಗೆ 150 ರನ್‌ಗಳನ್ನು ಸೇರಿಸಿ ಶ್ರೀಲಂಕಾದ ಬೌಲರ್‌ಗಳನ್ನು ಕಟ್ಟಿಹಾಕಿತು. ಆ ಜೊತೆಯಾಟದ ಸಂದರ್ಭದಲ್ಲೂ ಪಡಿಕ್ಕಲ್ ಅವರೇ ಪ್ರಮುಖ ಆಕರ್ಷಣೆಯಾಗಿದ್ದರು. ಅವರು ಮೈದಾನದಾದ್ಯಂತ ಸುಲಲಿತವಾಗಿ ರನ್ ಗಳಿಸಿದರು. ವಾಸ್ತವವಾಗಿ ಹೆಚ್ಚು ಸ್ಥಿರವಾದ ಲಯ ಕಂಡುಕೊಳ್ಳುವ ಮುನ್ನ ಅವರ ಮೊದಲ 20 ರನ್‌ಗಳು 100ರ ಆಸುಪಾಸಿನ ಸ್ಟ್ರೈಕ್-ರೇಟ್‌ನಲ್ಲಿ ಬಂದಿದ್ದವು.

ಎಡಗೈ ಬ್ಯಾಟರ್ ಪಡಿಕ್ಕಲ್ ಕ್ರೀಸ್‌ಗೆ ಬಂದ ತಕ್ಷಣವೇ ಆಫ್-ಸ್ಪಿನ್ನರ್ ಕೇಶರ ನುವಂತ ಅವರನ್ನು ದಾಳಿಗೆ ಇಳಿಸಲಾಯಿತು. ಹೀಗಾಗಿ ಪಡಿಕ್ಕಲ್ ಮತ್ತು ನುವಂತ ನಡುವೆ ಆಸಕ್ತಿದಾಯಕ ಹೋರಾಟ ನಡೆಯಿತು. ಎಡಗೈ ಬ್ಯಾಟರ್ ವಿರುದ್ಧ ಆಫ್-ಸ್ಪಿನ್ನರ್ ಅನ್ನು ಬಳಸುವ ತಂತ್ರ ಸಮಂಜಸವಾಗಿದ್ದರೂ, ಅದು ಆತಿಥೇಯರಿಗೆ ಅಂದುಕೊಂಡಂತ ಫಲಿತಾಂಶವನ್ನು ನೀಡಲಿಲ್ಲ.

ನುವಂತ ಅವರ ಬೌಲಿಂಗ್‌ನಲ್ಲಿ ಪಡಿಕ್ಕಲ್ ಒಂದು ಬಾರಿ ಔಟಾಗುವ ಸಾಧ್ಯತೆಯಿತು. ಆದರೆ, ಅವರ ಬ್ಯಾಟ್‌ನ ಅಂಚಿಗೆ ತಗುಲಿದ ಚೆಂಡು ಫೀಲ್ಡರ್‌ನ ಕೈಗೆ ತಲುಪುವ ಮುನ್ನವೇ ನೆಲಕ್ಕೆ ಬಿತ್ತು. ಅಂತಹ ಸಣ್ಣಪುಟ್ಟ ಎಡವಟ್ಟುಗಳನ್ನು ಮೀರಿ ದೃಢಚಿತ್ತದಿಂದ ಆಟ ಮುಂದುವರಿಸಿದರು.

81 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದ ಪಡಿಕ್ಕಲ್, ಜಯಸೂರ್ಯ ಅವರ ಬೌಲಿಂಗ್‌ನಲ್ಲಿ ಭರ್ಜರಿ ಸಿಕ್ಸರ್ ಸಿಡಿಸಿದರು. ಸ್ವಲ್ಪ ಮುಂದೆ ಬಂದು ಚೆಂಡನ್ನು ಅಚ್ಚುಕಟ್ಟಾಗಿ ಹೊಡೆದ ಅವರು ಅದನ್ನು 'ಲಾಂಗ್-ಆನ್' ಮೇಲೆ ಕಳುಹಿಸಿದರು ಮತ್ತು ನಂತರ 'ಕವರ್ಸ್' ಮೂಲಕ ಬಲವಾದ 'ಪಂಚ್' ಶಾಟ್ ಹೊಡೆದು ಮತ್ತೊಂದು ಬೌಂಡರಿ ಗಳಿಸಿದರು.

ಬೌಲರ್ ಗಳನ್ನು ಸಮರ್ಥವಾಗಿ ಎದುರಿಸಿದ ರಾಹುಲ್: ಇನ್ನೊಂದು ತುದಿಯಲ್ಲಿದ್ದ ರಾಹುಲ್ ತಮ್ಮ ಎಂದಿನ ಶಾಂತ ಹಾಗೂ ಸ್ಥಿರ ಶೈಲಿಯಲ್ಲಿ ಆಡುತ್ತಾ, ಲಂಕನ್ ಬೌಲರ್‌ಗಳ ದಾಳಿಯನ್ನು ಸಮರ್ಥವಾಗಿ ಎದುರಿಸಿದರು. 127 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದ ರಾಹುಲ್, ತಮ್ಮ ಅದ್ಭುತ ಬ್ಯಾಟಿಂಗ್ ಕೌಶಲದ ಝಲಕ್ ಅನ್ನು ಆಗಾಗ್ಗೆ ಪ್ರದರ್ಶಿಸಿದರು.

ವಿಶೇಷವಾಗಿ ಜಯಸೂರ್ಯ ಅವರ ಬೌಲಿಂಗ್‌ನಲ್ಲಿ ನೇರವಾಗಿ ಹೊಡೆದ ಸಿಕ್ಸರ್, ಅದರ ನಿಖರವಾದ ಸಮಯಪ್ರಜ್ಞೆ ಮತ್ತು ಪರಿಪೂರ್ಣ ನಿರ್ವಹಣೆಯಿಂದಾಗಿ ಗಮನ ಸೆಳೆಯಿತು. ಆದರೆ ಅದಕ್ಕೂ ಮುನ್ನ ಶ್ರೀಲಂಕಾ ತಂಡಕ್ಕೆ ಸಂತೋಷಪಡಲು ಒಂದೇ ಒಂದು ಕ್ಷಣ ಸಿಕ್ಕಿತ್ತು; ರಾಹುಲ್ ಮತ್ತು ಜೈಸ್ವಾಲ್ (37 ರನ್, 32 ಎಸೆತ) ನಡುವಿನ ಮಾತಿನ ಕೊರತೆಯಿಂದಾಗಿ ಜೈಸ್ವಾಲ್ ಅಂತಿಮವಾಗಿ ಮೈದಾನದಿಂದ ಹೊರನಡೆಯಬೇಕಾಯಿತು. ಆದಾಗ್ಯೂ, ಭಾರತೀಯ ಬ್ಯಾಟರ್‌ಗಳ ಕೌಶಲ್ಯಭರಿತ ಹಾಗೂ ಸಮಾನವಾದ ಪುಟಿತವನ್ನು (true bounce) ಹೊಂದಿದ್ದ ಬ್ಯಾಟಿಂಗ್‌ಗೆ ಪೂರಕವಾದ ಪಿಚ್, ದಿನದ ಉಳಿದ ಅವಧಿಯಲ್ಲಿ ಶ್ರೀಲಂಕಾದ ಯೋಜನೆಗಳನ್ನು ವಿಫಲಗೊಳಿಸಿದವು.