ಅಹ್ಮದಾಬಾದ್: ಐಪಿಎಲ್ 2026ರ ಟೂರ್ನಿಯಲ್ಲಿ ರಾಜಸ್ತಾನ ರಾಯಲ್ಸ್ ತಂಡದ ಆಟಗಾರ ವೈಭವ್ ಸೂರ್ಯವಂಶಿ ತಮ್ಮ ಸ್ಫೋಟಕ ಬ್ಯಾಟಿಂಗ್ ಪ್ರದರ್ಶನದ ಮೂಲಕ ಹಲವು ಪ್ರಶಸ್ತಿಗಳನ್ನು ತಮ್ಮದಾಗಿಸಿಕೊಂಡಿದ್ದು, ಆ ಪ್ರಶಸ್ತಿಗಳಿಂದಲೇ ಅವರು ಕೋಟ್ಯಂತರ ಹಣ ಗಳಿಸಿದ್ದಾರೆ.

ಹೌದು.. ಅಚ್ಚರಿಯಾದರೂ ಸತ್ಯ ಐಪಿಎಲ್ 2026ರಲ್ಲಿ ರಾಜಸ್ಥಾನ್ ರಾಯಲ್ಸ್ ಫೈನಲ್‌ಗೆ ತಲುಪಲು ಸಾಧ್ಯವಾಗಲಿಲ್ಲ. ಎಲಿಮಿನೇಟರ್ ಪಂದ್ಯದಲ್ಲಿ ಸನ್ ರೈಸರ್ಸ್ ಹೈದರಾಬಾದ್ ವಿರುದ್ಧ ಸೋತು ಟೂರ್ನಿಯಿಂದಲೇ ಹೊರಬಿತ್ತು.

ಆದಾಗ್ಯೂ ರಾಜಸ್ತಾನ ತಂಡದ 15 ವರ್ಷದ ಯುವ ಪ್ರತಿಭೆ ವೈಭವ್ ಸೂರ್ಯವಂಶಿ ತಮ್ಮ ಸ್ಫೋಟಕ ಬ್ಯಾಟಿಂಗ್ ಪ್ರದರ್ಶನದಿಂದಾಗಿ ಟೂರ್ನಿಯಲ್ಲಿ ಒಂದಲ್ಲ.. ಎರಡಲ್ಲ ಬರೊಬ್ಬರಿ 5 ಪ್ರಶಸ್ತಿಗಳನ್ನು ತಮ್ಮದಾಗಿಕೊಂಡರು.

ಅಚ್ಚರಿ ಎಂದರೆ ವೈಭವ್ ಸೂರ್ಯವಂಶಿ ತಮ್ಮ ರಿಟೈನರ್ ಮೊತ್ತ, ಪಂದ್ಯ ಶುಲ್ಕ ಹಾಗೂ ವಿವಿಧ ನಗದು ಬಹುಮಾನಗಳ ಮೂಲಕವೇ ಬರೊಬ್ಬರಿ 2.50 ಕೋಟಿಗೂ ಹೆಚ್ಚು ಆದಾಯ ಗಳಿಸಿದ್ದಾರೆ.

ಹಾಗಾದ್ರೆ ವೈಭವ್ ಸೂರ್ಯವಂಶಿ ಗಳಿಸಿದ ಮೊತ್ತವೆಷ್ಟು?

ರಾಜಸ್ಥಾನ್ ರಾಯಲ್ಸ್ ಪರ ಈ ಋತುವಿನಲ್ಲಿ ಅದ್ಭುತ ಪ್ರದರ್ಶನ ನೀಡಿದ ವೈಭವ್ ಸೂರ್ಯವಂಶಿ, ಐಪಿಎಲ್ 2026ರ ಅತ್ಯಧಿಕ ರನ್ ಗಳಿಸಿದ ಬ್ಯಾಟರ್ ಆಗಿ ಹೊರಹೊಮ್ಮಿ ಆರೆಂಜ್ ಕ್ಯಾಪ್ ತಮ್ಮದಾಗಿಸಿಕೊಂಡರು. ಈ ಋತುವಿನಲ್ಲಿ ಅವರು ಒಟ್ಟು 776 ರನ್‌ಗಳನ್ನು ಕಲೆಹಾಕಿದರು.

ಕಳೆದ ಮೆಗಾ ಹರಾಜಿನಲ್ಲಿ ರಾಜಸ್ಥಾನ್ ರಾಯಲ್ಸ್ ಅವರನ್ನು ₹1.10 ಕೋಟಿಗೆ ಖರೀದಿಸಿತ್ತು. ಅದೇ ಮೊತ್ತವನ್ನು ಈ ವರ್ಷವೂ ರಿಟೈನರ್ ರೂಪದಲ್ಲಿ ಪಡೆದಿದ್ದರೂ, ಮೈದಾನದಲ್ಲಿನ ನಿರಂತರ ಪ್ರದರ್ಶನದಿಂದ ಅವರ ಒಟ್ಟು ಆದಾಯ ಬಹಳಷ್ಟು ಹೆಚ್ಚಾಯಿತು.

ಸೂರ್ಯವಂಶಿ ಗಳಿಸಿದ ಪ್ರಶಸ್ತಿಗಳಾವುವು?

ರಾಜಸ್ಥಾನ್ ರಾಯಲ್ಸ್ ಫೈನಲ್‌ಗೆ ಅರ್ಹತೆ ಪಡೆಯದಿದ್ದರೂ, ಅಹ್ಮದಾಬಾದ್‌ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆದ ಪ್ರಶಸ್ತಿ ಸುತ್ತಿನ ಪಂದ್ಯಕ್ಕೆ ಸೂರ್ಯವಂಶಿ ಹಾಜರಾಗಿದ್ದರು. ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಸತತ ಎರಡನೇ ಬಾರಿ ಪ್ರಶಸ್ತಿ ಗೆದ್ದ ಬಳಿಕ ನಡೆದ ಬಹುಮಾನ ವಿತರಣಾ ಸಮಾರಂಭದಲ್ಲಿ, ವೈಭವ್ ಅವರನ್ನು ಈ ಋತುವಿನ "ಅತ್ಯಂತ ಮೌಲ್ಯಯುತ ಆಟಗಾರ" (Most Valuable Player) ಎಂದು ಗೌರವಿಸಲಾಯಿತು.

ಅವರು ಸಮಾರಂಭದಲ್ಲಿ ಹಲವು ವೈಯಕ್ತಿಕ ಪ್ರಶಸ್ತಿಗಳನ್ನು ಗೆದ್ದಿದ್ದು, ಅವುಗಳೊಂದಿಗೆ ನಗದು ಬಹುಮಾನಗಳನ್ನೂ ಪಡೆದರು. ವೈಭವ್ ಸೂರ್ಯವಂಶಿ ಗೆದ್ದ ಪ್ರಶಸ್ತಿಗಳು ಮತ್ತು ನಗದು ಬಹುಮಾನಗಳ ಪಟ್ಟಿ ಇಲ್ಲಿದೆ.

• ಅತ್ಯಂತ ಮೌಲ್ಯಯುತ ಆಟಗಾರ (MVP) – 15 ಲಕ್ಷ ರೂ

• ಆರೆಂಜ್ ಕ್ಯಾಪ್ (ಟೂರ್ನಿಯ ಅಗ್ರ ರನ್ ಸ್ಕೋರರ್) – 10 ಲಕ್ಷ ರೂ

• ಸೂಪರ್ ಸ್ಟ್ರೈಕರ್ ಆಫ್ ದಿ ಸೀಸನ್ – 10 ಲಕ್ಷ (ಜೊತೆಗೆ ಟಾಟಾ ಸಿಯೆರಾ ಕಾರು) ರೂ

• ಸೂಪರ್ ಸಿಕ್ಸಸ್ ಆಫ್ ದಿ ಸೀಸನ್ – 10 ಲಕ್ಷ ರೂ (72 ಸಿಕ್ಸರ್‌ಗಳನ್ನು ಬಾರಿಸಿದ ಸಾಧನೆಗಾಗಿ)

• ಎಮರ್ಜಿಂಗ್ ಪ್ಲೇಯರ್ ಆಫ್ ದಿ ಸೀಸನ್ – 10 ಲಕ್ಷ ರೂ

ಇದರ ಜೊತೆಗೆ, ಸೂರ್ಯವಂಶಿ ವಾರ್ಷಿಕ 1.10 ಕೋಟಿ ರಿಟೈನರ್ ಮೊತ್ತವನ್ನೂ ಪಡೆದಿದ್ದಾರೆ. ಅಲ್ಲದೆ, ಅವರು ಆಡಿದ ಪ್ರತಿಯೊಂದು ಪಂದ್ಯಕ್ಕೂ ₹7.5 ಲಕ್ಷ ಪಂದ್ಯ ಶುಲ್ಕ ನೀಡಲಾಯಿತು. ಈ ಋತುವಿನಲ್ಲಿ ಅವರು ರಾಜಸ್ಥಾನ್ ಪರ ಒಟ್ಟು 16 ಪಂದ್ಯಗಳನ್ನು ಆಡಿದ್ದು, ಪಂದ್ಯ ಶುಲ್ಕದ ರೂಪದಲ್ಲಿ ಮಾತ್ರ 1.20 ಕೋಟಿ ರೂ ಗಳಿಸಿದ್ದಾರೆ.

ಇದಲ್ಲದೆ, "ಪ್ಲೇಯರ್ ಆಫ್ ದಿ ಮ್ಯಾಚ್", "ಎಲೆಕ್ಟ್ರಿಕ್ ಸ್ಟ್ರೈಕರ್ ಆಫ್ ದಿ ಮ್ಯಾಚ್", "ಮೊಸ್ಟ್ ಸಿಕ್ಸಸ್ ಆಫ್ ದಿ ಮ್ಯಾಚ್" ಮೊದಲಾದ ವೈಯಕ್ತಿಕ ಪಂದ್ಯ ಪ್ರಶಸ್ತಿಗಳ ಮೂಲಕವೂ ಅವರು ಹೆಚ್ಚುವರಿ ನಗದು ಬಹುಮಾನಗಳನ್ನು ಪಡೆದಿದ್ದಾರೆ. ಇಂತಹ ಪ್ರತಿಯೊಂದು ಪ್ರಶಸ್ತಿಗೆ ₹1 ಲಕ್ಷ ನೀಡಲಾಗುತ್ತಿತ್ತು ಮತ್ತು ಸೂರ್ಯವಂಶಿ ತಮ್ಮ ಸ್ಫೋಟಕ ಬ್ಯಾಟಿಂಗ್‌ನಿಂದ ಇವುಗಳನ್ನು ಹಲವು ಬಾರಿ ಗೆದ್ದಿದ್ದಾರೆ.

ಒಟ್ಟಾರೆ, ಐಪಿಎಲ್ 2026ರ ಒಂದೇ ಋತುವಿನಲ್ಲಿ ವೈಭವ್ ಸೂರ್ಯವಂಶಿ ಅವರ ಒಟ್ಟು ಆದಾಯ 2.50 ಕೋಟಿ ರೂಗೂ ಅಧಿಕವಾಗಿದ್ದು, ಕೇವಲ 15ನೇ ವಯಸ್ಸಿನಲ್ಲೇ ಅವರು ಟೂರ್ನಿಯ ಅತ್ಯಂತ ಯಶಸ್ವಿ ಮತ್ತು ಹೆಚ್ಚು ಆದಾಯ ಗಳಿಸಿದ ಯುವ ಆಟಗಾರರಲ್ಲಿ ಒಬ್ಬರಾಗಿ ಹೊರಹೊಮ್ಮಿದ್ದಾರೆ.