ಬಿಜಾಪುರ: ನಗರದಲ್ಲಿ ಫೆಬ್ರವರಿಯಲ್ಲಿ ನಡೆಯಲಿರುವ ಅಕ್ಷರ ಜಾತ್ರೆಯ ಮುಖ್ಯ ವೇದಿಕೆ ವಿವಿಧೆಡೆಯಿಂದ ಬರುವ ಅತಿಥಿಗಳ ಮನದಲ್ಲಿ ಅಚ್ಚಳಿಯದೇ ಉಳಿಯುವಂತಾಗಬೇಕೆಂದು ಜಿಲ್ಲಾ ನಗರಾಭಿವೃದ್ಧಿ ಕೋಶದ ಯೋಜನಾ ನಿರ್ದೇಶಕಿ ಗಂಗೂಬಾಯಿ ಮಾನಕರ ಹೇಳಿದರು.
ಬುಧವಾರ ನಗರದ ಜಿಲ್ಲಾಧಿಕಾರಿ ಕಚೇರಿಯ ನಗರಾಭಿವೃದ್ಧಿ ಕೋಶದ ಯೋಜನಾ ನಿರ್ದೇಶಕರ ಕಚೇರಿಯಲ್ಲಿ ನಡೆದ ಸಾಹಿತ್ಯ ಸಮ್ಮೇಳನದ ಮುಖ್ಯ ವೇದಿಕೆ, ಅಲಂಕಾರ, ಚಿತ್ರಕಲಾ ಪ್ರದರ್ಶನದ ಸಭೆಯನ್ನು ಉದ್ದೇಶಿಸಿ ಅವರು ಮಾತನಾಡಿದರು.
79ನೇ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನಕ್ಕೆ ಸಹಸ್ರಾರು ಜನರು ಬರುವ ನಿರೀಕ್ಷೆ ಇದೆ. ಅತಿಥಿಗಳಿಗೆ ಉತ್ತರ ಕರ್ನಾಟಕ ಶೈಲಿಯ ವಿಶೇಷ ಭಕ್ಷ್ಯ ಭೋಜನ ಸಿದ್ಧವಾಗುತ್ತಿದೆ. ಅದಕ್ಕೆ ತಕ್ಕಂತೆ ಮುಖ್ಯ ವೇದಿಕೆ ನಿರ್ಮಿಸುವ ಕಾರ್ಯ ಕೂಡ ವಿಶೇಷತೆಯಿಂದ ಇರಬೇಕು ಎಂದು ಹೇಳಿದರು.
ಜಿಲ್ಲೆಯ ಕಲಾವಿದರು, ಚಿತ್ರಕಲಾ ಶಿಕ್ಷಕರಾದ ವಿ.ಡಿ. ಮಠಪತಿ, ಜಿ.ಎಸ್. ಭೂಸಗೊಂಡ, ವಿ.ಜಿ. ಪಟ್ಟಣಶೆಟ್ಟಿ, ಕೆಂಭಾವಿ ಆರ್ಟ್, ಬಿ.ಎಸ್. ಹಿರೇಮಠ, ಕೆ.ಸಿದ್ದು, ಪಿ.ಎಸ್. ಕಡೇಮನಿ, ನಾಗರಾಜ ಕಲಾಲ, ಆರ್.ಎಚ್. ಜೀರಂಕಲಗಿ ಅವರು ತಯಾರಿಸಿದ ಮುಖ್ಯ ವೇದಿಕೆಯ ವಿವಿಧ ಮಾದರಿಗಳನ್ನು ವೀಕ್ಷಿಸಿದರು.