ಕನ್ನಡಪ್ರಭ ವಾರ್ತೆ, ಗದಗ, ಜು. 17
ರಾಜ್ಯದ ಮಹಿಳೆಯರು, ಮಕ್ಕಳ ಮೇಲಿನ ಅತ್ಯಾಚಾರ ಪ್ರಕರಣಗಳಿಂದ ನಾಗರಿಕ ಸಮಾಜ ತಲೆ ತಗ್ಗಿಸುವಂತಾಗಿದೆ. ಅದಕ್ಕಿಂತಲೂ ಅಪಾಯಕಾರಿಯಾದ ಅಪಹರಣ ಪ್ರಕರಣಗಳು ಜಿಲ್ಲೆಯಲ್ಲಿ ಹೆಚ್ಚುತ್ತಿರುವುದು ಜನರನ್ನು ಕಂಗೆಡಿಸಿದೆ.
ಜಿಲ್ಲೆ ಶೈಕ್ಷಣಿಕ ಹಾಗೂ ಆರ್ಥಿಕವಾಗಿ ಹಿಂದುಳಿದಿದ್ದು, ಬಡತನ ಮತ್ತು ಶಿಕ್ಷಣದ ಕೊರತೆಯೇ ಅಪಹರಣಕ್ಕೆ  ಕಾರಣ ಎಂದು ಹೇಳಲಾಗುತ್ತಿದ್ದರೂ ಅಪಹರಣದ ಹಿಂದೆ ದೊಡ್ಡ ಜಾಲವೇ ಕೆಲಸ ಮಾಡುತ್ತಿದೆ. ಪೊಲೀಸ್ ಇಲಾಖೆಗೆ ಗೊತ್ತಿದ್ದರೂ ಏನೂ ತಿಳಿಯದವರಂತೆ ವರ್ತಿಸುತ್ತಿರುವುದು ಹಲವು ಅನುಮಾನಕ್ಕೆ ಕಾರಣವಾಗಿದೆ.
ವಿವರ: ಜಿಲ್ಲೆಯ 5 ತಾಲೂಕುಗಳ ವ್ಯಾಪ್ತಿಯಲ್ಲಿ 2013ರಲ್ಲಿ 13 ಅಪಹರಣ, 2014ರ ಜನವರಿಯಿಂದ 6 ತಿಂಗಳಲ್ಲಿ 12 ಅಪಹರಣ ಪ್ರಕರಣ ದಾಖಲಾಗಿದ್ದು, ಮಹಿಳೆಯರ ಮೇಲಿನ ದೌರ್ಜನ್ಯ ಹಾಗೂ ಇನ್ನಿತರೆ ಪ್ರಕರಣಗಳು ಸೇರಿದಂತೆ 2013ರಲ್ಲಿ 41 ಪ್ರಕರಣ ದಾಖಲಾಗಿವೆ. ಇನ್ನು 2014ರಲ್ಲಿಯೂ 18 ವಿವಿಧ ಮಹಿಳಾ ದೌರ್ಜನ್ಯದ ಪ್ರಕರಣಗಳು ದಾಖಲಾಗಿವೆ. ಮುಖ್ಯವಾಗಿ 2013ರಲ್ಲಿ 16 ಹಾಗೂ 2014ರಲ್ಲಿ 2 (ಇದುವರೆಗೆ) ಅತ್ಯಾಚಾರ ಪ್ರಕರಣಗಳು ದಾಖಲಾಗಿದ್ದು, ಇವುಗಳಲ್ಲಿ ಮಕ್ಕಳ ಮೇಲೆ ಒಂದೇ ಒಂದು ಅತ್ಯಾಚಾರ ಪ್ರಕರಣ ನಡೆದಿದೆ. ಜಿಲ್ಲೆಯಲ್ಲಿ ಮಹಿಳಾ ದೌರ್ಜನ್ಯ ಮತ್ತು ಅತ್ಯಾಚಾರ ಪ್ರಕರಣಗಳ ನಡೆಯುತ್ತಿಲ್ಲ ಎನ್ನುವ ಅಧಿಕಾರಿಗಳು ಮತ್ತು ರಾಜಕಾರಣಿಗಳು ಇದರ ಬಗ್ಗೆ ಅದೇನು ಸಮರ್ಥನೆನೀಡುತ್ತಾರೆ.
ಮಾರಾಟ ಜಾಲದ ಶಂಕೆ
ಜಿಲ್ಲೆಯ ಬಡ ಕಾರ್ಮಿಕರು ಕೆಲಸ ಅರಸಿ ಪಕ್ಕದ ಗೋವಾ, ಮಹಾರಾಷ್ಟ್ರ ರಾಜ್ಯಗಳಿಗೆ ಹೋಗುವುದು ಸಾಮಾನ್ಯ. ಹಾಗಾಗಿ ಅಲ್ಲಿನ ಜನತೆಯ ನಂಟು ಬೆಳೆಯುವುದರಿಂದ ಅಲ್ಲಿನ ಯುವಕರು, ಏಜೆಂಟ್‌ಗಳು ಜಿಲ್ಲೆಗೆ ಆಗಮಿಸಿ, ನಿಮಗೆ ಕೆಲಸ ಕೊಡಿಸುತ್ತೇವೆ ಎಂದು ನಂಬಿಸಿ, ಮೋಸ ಮಾಡುತ್ತಿದ್ದಾರೆ ಎನ್ನುವ ಆರೋಪಗಳು ವ್ಯಾಪಕವಾಗಿ ಕೇಳಿ ಬರುತ್ತಿವೆ.
 ಇದು ಸಾಲದೆಂಬಂತೆ ಪ್ರೀತಿ ಪ್ರೇಮದ ಹೆಸರಿನಲ್ಲಿಯೂ ಜಿಲ್ಲೆಯ ಯುವತಿಯರು ಮೋಸ ಹೋಗಿ ಮುಂಬೈನ ಕೆಂಪು ದೀಪ ಪ್ರದೇಶಗಳಿಗೆ ಮಾರಾಟವಾಗುತ್ತಿರುವುದು 2012 ರಲ್ಲಿ ವರದಿಯಾದ ಪ್ರಕರಣದಿಂದ ಸಾಬೀತಾಗಿದೆ.
-ಶಿವಕುಮಾರ ಕುಷ್ಟಗಿ