ಕೆಂಭಾವಿ: ಶಾಶ್ವತ ಕುಡಿವ ನೀರಿನ ಕಾಮಗಾರಿಗಳಿಗೆ ಶಂಕು ಸ್ಥಾಪನೆ ನೆರವೇರಿಸಲು ಸೋಮವಾರ ಯಕ್ತಾಪುರ ಗ್ರಾಮಕ್ಕೆ ಆಗಮಿಸುತ್ತಿದ್ದ ಶಾಸಕ ಶರಣಬಸಪ್ಪ ದರ್ಶನಾಪುರ ಅವರನ್ನು ಗುತ್ತಿಬಸವೇಶ್ವರ ಬಡಾವಣೆಯ ನಾಗರಿಕರು ಮುತ್ತಿಗೆ ಹಾಕಿ ರಸ್ತೆಯ ಮೇಲೆ ಖಾಲಿ ಕೊಡಗಳನ್ನು ಪ್ರದರ್ಶಿಸಿ ಪ್ರತಿಭಟನೆ ನಡೆಸಿದ ಘಟನೆ ಜರುಗಿತು.
  ಶಾಸಕರು ಬರುತ್ತಿದ್ದಂತೆ ಅವರನ್ನು ಮುತ್ತಿಗೆ ಹಾಕಿದ ಮಹಿಳೆಯರು, ಕೊಳವೆ ಬಾವಿ ಬತ್ತಿಹೊಗಿದ್ದು ತಾಸಿಗೆ ಒಂದು ಕೊಡ ನೀರು ಬರುತ್ತಿದೆ. ಕುಡಿವ ನೀರಿಗಾಗಿ 2ಕಿಮೀ ದೂರ ಹೋಗಬೇಕು. ಬೇಸಿಗೆಯಲ್ಲಿ ಇನ್ನೂ ಹೆಚ್ಚಿನ ತೊಂದರೆಯಾಗಲಿದೆ. ನಮಗೆ ಶಾಶ್ವತ ಕುಡಿವ ನೀರು ಕೊಡಿ ಎಂದು ಆಗ್ರಹಿಸಿದರು. ನಿತ್ಯ ಅನುಭವಿಸುತ್ತಿರುವ ತೊಂದರೆಯನ್ನು ಮಲ್ಲಮ್ಮ, ನಾಗಮ್ಮ ಇತರರು ಹೇಳಿ ತಮ್ಮ ಅಳಲನ್ನು ತೋಡಿಕೊಂಡರು.
  ಸಮಸ್ಯೆ ಅರಿತ ಶಾಸಕರು, ಖಾಸಗಿ ವ್ಯಕ್ತಿಯೊಬ್ಬರ ಕೊಳವೆ ಭಾವಿಯಿಂದ ಬಡಾವಣೆಗೆ ತಾತ್ಕಾಲಿಕವಾಗಿ ನೀರು ಪೂರೈಸಲು ಸಂಬಂಧಪಟ್ಟವರಿಗೆ ಸೂಚಿಸಿದರು. ಸರ್ಕಾರ ಹಣ ನೀಡದಿದ್ದರೆ ನಾನು ನಿಮಗೆ ಕೊಡುತ್ತೇನೆ, ಜನರಿಗೆ ನೀರಿನ ತೊಂದರೆಯಿದೆ. ಬೇಸಿಗೆ ಮುಗಿಯುವವರೆಗೆ ಇಂದಿನಿಂದಲೆ ನೀರು ಕೊಡಿ ಎಂದು ಸೂಚಿಸಿದರು.
 ಜಿಲ್ಲಾ ಪಂಚಾಯಿತಿ ಸದಸ್ಯ ಸಿದ್ದನಗೌಡ ಪೊಲೀಸ ಪಾಟೀಲ, ಶಿವಮಹಾಂತ ಚಂದಾಪುರ, ಅಮೀನರಡ್ಡಿ ಪಾಟೀಲ ಯಾಳಗಿ ಇತರರು ಇದ್ದರು.