ಜಾವಗಲ್: ಯಾದವ ಜನಾಂಗ ಸಮಾಜದ ಮುಖ್ಯವಾಹಿನಿಗೆ ಬರಲು ಶೈಕ್ಷಣಿಕ ಸೌಲಭ್ಯ ಅತ್ಯಗತ್ಯವೆಂದು ಮಾಜಿ ಸಚಿವ ಎ.ಕೃಷ್ಣಪ್ಪ ಅಭಿಪ್ರಾಯಪಟ್ಟರು.
ಹೋಬಳಿಯ ತಿರುಪತಿಹಳ್ಳಿಯಲ್ಲಿ ಕ್ಯಾತಲಿಂಗೇಶ್ವರಸ್ವಾಮಿ ಮತ್ತು ಬೀರಲಿಂಗೇಶ್ವರಸ್ವಾಮಿ ನೂತನ ದೇವಾಲಯ ಉದ್ಘಾಟನಾ ಸಮಾರಂಭದಲ್ಲಿ ಮಾತನಾಡಿದ ಅವರು, ಜನಾಂಗದಲ್ಲಿ ಆಚರಣೆಯಲ್ಲಿರುವ ಮೂಢ ನಂಬಿಕೆ ಹೋಗಲಾಡಿಸಬೇಕು. ಜನಾಂಗದ ಯುವಜನತೆ ಶೈಕ್ಷಣಿಕ ಪ್ರಗತಿ ಹೊಂದಿ ದೇಶ ಕಟ್ಟುವಲ್ಲಿ ಮುಂದಾಗ ಬೇಕಿದೆ. ಧಾರ್ಮಿಕ ಪ್ರಜ್ಞೆ, ಪರಂಪರೆಯನ್ನು ಮಕ್ಕಳಲ್ಲಿ ಬೆಳೆಸ ಬೇಕು ಎಂದರು.
ಮಾಜಿ ಸಚಿವ ಬಿ.ಶಿವರಾಂ ಮಾತನಾಡಿ ಹೋಬಳಿಯ ಗೊಲ್ಲರಹಟ್ಟಿಯ ಯುವಜನರು ಜಾಗೃತರಾಗಿದ್ದು,
ಶೈಕ್ಷಣಿಕ ಮತ್ತು ಸಾಮಾಜಿಕವಾಗಿ ಪ್ರಗತಿ ಹೊಂದಿದ್ದಾರೆ. ಜನಾಂಗ ರಾಜಕೀಯವಾಗಿಯೂ ದಿಟ್ಟ ನಿರ್ಧಾರ ಕೈಗೊಂಡು ಸಮಾಜದ ಪ್ರಗತಿಗೆ ಶ್ರಮಿಸ ಬೇಕು ಎಂದು ಹೇಳಿದರು.  
ಅಧ್ಯಕ್ಷತೆ ವಹಿಸಿದ್ದ ಶಾಸಕ ರುದ್ರೇಶಗೌಡ ಮಾತನಾಡಿ, ಮಕ್ಕಳಿಗೆ ಶಿಕ್ಷಣದೊಂದಿಗೆ ಧಾರ್ಮಿಕ ಪ್ರಜ್ಞೆ ಮೂಡಿಸ ಬೇಕು, ಸಂಸ್ಕೃತಿ ಪರಂಪರೆ ಉಳಿಸಿ ಬೆಳೆಸಬೇಕಾದ ಅನಿವಾರ್ಯತೆ ಇದೆ ಎಂದು ತಿಳಿಸಿದರು.
ತಾ. ಯುವ ಕಾಂಗ್ರೆಸ್ ಅಧ್ಯಕ್ಷ ವಿಜಯ ಕುಮಾರ್, ತಾಪಂ ಮಾಜಿ ಸದಸ್ಯ ಜಿ.ಮಹಾಲಿಂಗಪ್ಪ, ಹಳೇಬೀಡು ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಕೆ.ಸಿ.ನಾಗರಾಜು, ಎಪಿಎಂಸಿ ಮಾಜಿ ಅಧ್ಯಕ್ಷ ಆನಂದಮೂರ್ತಿ, ಸದಸ್ಯ ಅಜ್ಜಣ್ಣ, ಪ್ರಭುದೇವ್, ಗ್ರಾಪಂ ಅಧ್ಯಕ್ಷ ಕರಿಯಯ್ಯ, ಸಣ್ಣಮ್ಮ, ಸದಸ್ಯ ಚಂದ್ರಪ್ಪ, ನಾಗರಾಜು, ವಕೀಲ ಸಿದ್ದಮಲ್ಲಪ್ಪ,  ಮಾತನಾಡಿದರು. ಮಾಜಿ ಛೇರ್ಮನ್ ಹೇಮಾವತಿ ಮಹಾಲಿಂಗಪ್ಪ, ಜನಾಂಗದ ಮುಖಂಡರು ಹಾಗೂ ಚುನಾಯಿತ ಪ್ರತಿನಿಧಿಗಳು ಇದ್ದರು.