ಶನಿವಾರಸಂತೆ: ಸಮೀಪದ ಗೊಣಿಮಾರೂರು ಗ್ರಾಮಪಂಚಾಯ್ತಿಯ ಬಾಣವಾರ ಗೇಟ್ ಬಳಿ ಬಿಎಸ್‌ಎನ್‌ಎಲ್‌ನವರು ರಸ್ತೆ ಪಕ್ಕ ತೋಡಿಗ ಹಳ್ಳವನ್ನು ಮುಚ್ಚದೆ ಬಿಟ್ಟಿದ್ದು ಸಂಚಾರಕ್ಕೆ ಅಡ್ಡಿಯಾಗಿದೆ.
ಕಳೆದ ಒಂದು ತಿಂಗಳ ಹಿಂದೆ ಈ ವ್ಯಾಪ್ತಿಯ ದೂರವಾಣಿ ಸಂಪರ್ಕಗಳು ಸ್ಥಗಿತಗೊಂಡಿದ್ದವು. ಇದನ್ನು ಸರಿಪಡಿಸಲು ಇಲಾಖೆ ಶನಿವಾರಸಂತೆ ಕುಶಲನಗರ ಮುಖ್ಯರಸ್ತೆಯ ಬಾಣವಾರ ಗೇಟ್ ಬಳಿ ಸುಮಾರು 6 ಅಡಿ ಆಳದಷ್ಟು ಅಗೆದು ದೂರವಾಣಿ ಸಂಪರ್ಕ ಸರಿಪಡಿಸಿತು.
ಆದರೆ ಮುಖ್ಯರಸ್ತೆಯ ಪಕ್ಕ ಹಳ್ಳ ತೋಡಿ ಹಾಗೆಯೇ ಬಿಟ್ಟಿದ್ದಾರೆ. ಈ ಹಳ್ಳದಿಂದಾಗಿ ವಾಹನ ಸವಾರರು ತುಂಬಾ ತೊಂದರೆ ಅನುಭವಿಸುತ್ತಿದ್ದರು. ನಂತರ ಅಲ್ಪ ಸ್ವಲ್ಪ ಮಣ್ಣು ಹಾಕಿ ಸರಿಪಡಿಸಿದರು.
ಇದನ್ನು ನಂತರ ಹಾಗೆಯೇ ಬಿಟ್ಟಿದ್ದರು. ಇದೀಗ, ಈ ಅಗೆದ ರಸ್ತೆ ದಿನದಿಂದ ದಿನಕ್ಕೆ ಕುಸಿಯುತ್ತಿದೆ. ಇದೀಗ ಈ ಅಗೆದ ರಸ್ತೆ ದಿನದಿಂದ ದಿನಕ್ಕೆ ಕುಸಿಯುತ್ತಿದ್ದು  ವೇಗವಾಗಿ ಬರುವ ವಾಹನಗಳು ದೂರವಾಣಿ ಇಲಾಖೆ ತೋಡಿರುವ ಹಳ್ಳದಲ್ಲಿ ಬೀಳುವ ಅಪಾಯವಿದೆ.
ಮಳೆಗೆ ಈ ಹಳ್ಳದಲ್ಲಿ ನೀರು ರಸ್ತೆಗೆ ಸಮಾನವಾಗಿ ನಿಲ್ಲುತ್ತಿದ್ದು ಹಳ್ಳ ಯಾವುದು? ರಸ್ತೆ ಯಾವುದೆಂದು ಗೊತ್ತಾಗದೆ ಪ್ರತಿನಿತ್ಯ ಈ ಹಳ್ಳಕ್ಕೆ ಬಿದ್ದು ಏಳುವಂತಾಗಿದ್ದು ಈ ಬಗ್ಗೆ ಸಂಬಂಧಪಟ್ಟವರಿಗೆ ಖುದ್ದಾಗಿ ಗೋಣಿಮಾರೂರು ಗ್ರಾಮಪಂಚಾಯ್ತಿ ಅದ್ಯಕ್ಷ ಚಂದ್ರಶೇಖರ್ ತಿಳಿಸಿದ್ದಾರೆ. ಆದರೂ, ಈ ವರೆಗೆ ಯಾವುದೇ ಕ್ರಮ ಕೈಗೊಳ್ಳಲು ಪಂಚಾಯಿತಿ ಮುಂದಾಗಿಲ್ಲ.
ಈ ರಸ್ತೆಯಲ್ಲಿ ಪ್ರತಿನಿತ್ಯ ಶನಿವಾರಸಂತೆಯಿಂದ ಮೈಸೂರು, ವಿರಾಜಪೇಟೆ, ಸೋಮವಾರಪೇಟೆ, ಹಾಸನ ಮುಂತಾದೆಡೆಗೆ ನೂರಾರು ವಾಹನಗಳು ಹಗಲು ರಾತ್ರಿ ಸಂಚರಿಸುತ್ತಿವೆ. ಈ ಹಳ್ಳವನ್ನು ನೋಡದ ಜನಪ್ರತಿನಿಧಿಗಳಿಲ್ಲ, ಅಧಿಕಾರಿಗಳಿಲ್ಲ. ಆದರು ಮುಖ್ಯರಸ್ತೆಯಲ್ಲಿ ಹಳ್ಳ ತೋಡಿ ಮೌನವಾಗಿರುವ ದೂರವಾಣಿ ಇಲಾಖೆ ತಕ್ಷಣ ಸರಿಪಡಿಸಲು ಮುಂದಾಗದಿರುವುದು ವಿಪರ್ಯಾಸ.
ತಕ್ಷಣ ಈ ರಸ್ತೆ ಸರಿಪಡಿಸಿ ಮುಂದಾಗಬಹುದಾದ ಅನಾಹುತ ತಪ್ಪಿಸಬೇಕೆಂದು ಗೋಣಿಮಾರೂರು ಗ್ರಾ.ಪಂ ಅದ್ಯಕ್ಷ ಚಂದ್ರಶೇಖರ್ ಆಗ್ರಹಿಸಿದ್ದಾರೆ.