ತುರುವೇಕೆರೆ: ಪಟ್ಟಣದಲ್ಲಿದ್ದ ಎಲ್ಐಸಿಯ ಸಮನ್ವಯ ಮೈಕ್ರೋ ಫೈನಾನ್ಸ್ ನಲ್ಲಿ ದುರುಪಯೋಗವಾಗಿರುವ ಹಣವನ್ನು ಮರು ಪಾವತಿ ಮಾಡುವ ಸಂಬಂಧ ಸಮಿತಿಯ ಪದಾಧಿಕಾರಿಗಳೊಂದಿಗೆ ಚರ್ಚೆ ನಡೆಸಿ ಸಮಸ್ಯೆಗೆ ಪರಿಹಾರ ಕಂಡುಹಿಡಿಯುವುದಾಗಿ ಸಂಸ್ಥೆಯ ಖಜಾಂಚಿ ಅರಳೀಕೆರೆ ಮೋಹನ್ ತಿಳಿಸಿದ್ದಾರೆ.
ಅರಳೀಕೆರೆ ಗ್ರಾಮದಲ್ಲಿ ಮಾಜಿ ಶಾಸಕ ಎಚ್.ಬಿ.ನಂಜೇಗೌಡ, ಬಿಜೆಪಿ ತಾಲೂಕು ಅಧ್ಯಕ್ಷ ಅರಳೀಕೆರೆ ರವಿಕುಮಾರ್, ಪಿಎಲ್ಡಿ ಬ್ಯಾಂಕ್ನ ನಿರ್ದೇಶಕ ಟಿ.ಎಸ್.ಬೋರೇಗೌಡ, ಮಾನವ ಹಕ್ಕುಗಳ ಹೋರಾಟಗಾರ ಸಿದ್ಧಲಿಂಗೇಗೌಡ, ತಿಪಟೂರಿನ ದೇವರಾಜು, ಗ್ರಾಮದ ಮುಖಂಡರಾದ ಶಿವಯ್ಯ, ಮೈಕ್ರೋ ಫೈನಾನ್ಸ್ನ ಪ್ರತಿನಿಧಿಗಳು, ಗ್ರಾಹಕರು ಹಾಗೂ ಸಂಸ್ಥೆಯ ಖಜಾಂಚಿ ಅರಳೀಕೆರೆ ಮೋಹನ್, ಸಿಬ್ಬಂದಿ ಹರೀಶ್ ಮೊದಲಾದವರೊಂದಿಗೆ ನಡೆಸಿದ ಮಾತುಕತೆಯಲ್ಲಿ ಸ್ಪಷ್ಟ ತೀರ್ಮಾನವನ್ನು ತೆಗೆದುಕೊಳ್ಳಲಾಯಿತು. ಗ್ರಾಹಕರ ಹೆಸರಿನಲ್ಲಿ ಎಲ್ಐಸಿಯ ಮೈಕ್ರೋ ಫೈನಾನ್ಸ್ ನ ಮುಖ್ಯ ಕಚೇರಿಗೆ ಹಣ ಸಂದಾಯ ಮಾಡದೇ ತಮ್ಮಿಂದ ತಪ್ಪಾಗಿದೆ. ಆದ್ದರಿಂದ ಸಮಿತಿ ಪದಾಧಿಕಾರಿಗಳು ತಿಪಟೂರಿನಲ್ಲಿದ್ದು, ಅವರೊಂದಿಗೆ ಚರ್ಚಿಸಿ ಗ್ರಾಹಕರ ಹಣವನ್ನು ಕೆಲವೇ ದಿನಗಳಲ್ಲಿ ಮರುಪಾವತಿ ಮಾಡುವುದಾಗಿ ಅರಳೀಕೆರೆ ಮೋಹನ್ ಭರವಸೆ ನೀಡಿದರು.