Sev Puri Recipe: ಸಂಜೆ ಆಗುತ್ತಿದ್ದಂತೆ ಏನಾದರೂ ಚಾಟ್ಸ್ ತಿನ್ನಬೇಕು ಅನಿಸೋದು ಸಹಜ. ಅದ್ರಲ್ಲೂ, ಚಾಟ್ಸ್ ಎಂದ ತಕ್ಷಣ ನೆನಪಾಗುವುದೇ ರೋಡ್ ಸೈಡ್ ತಿಂಡಿಗಳು. ಅದರಲ್ಲಿಯೂ ಗರಿಗರಿಯಾದ ಪುರಿ, ಮಸಾಲೆ ಆಲೂಗಡ್ಡೆ, ಖಾರ-ಸಿಹಿ ಚಟ್ನಿಗಳು ಹಾಗೂ ಉದಾರವಾಗಿ ಹಾಕಿದ ಸೇವ್‌ನಿಂದ ಕೂಡಿದ 'ಸೇವ್ ಪುರಿ' ಎಲ್ಲರ ಅಚ್ಚುಮೆಚ್ಚು. ಹಾಗಾಗಿ, ಅದರ ಸಿಂಪಲ್ ರೆಸಿಪಿ ಇಲ್ಲಿದೆ.

ಬೇಕಾಗುವ ಸಾಮಗ್ರಿಗಳು:

ಪುರಿಗಾಗಿ:

• ಪುರಿ - 6 ರಿಂದ 8

• ಬೇಯಿಸಿದ ಆಲೂಗಡ್ಡೆ - 1

• ಈರುಳ್ಳಿ - 1 ಸಣ್ಣದಾಗಿ ಹೆಚ್ಚಿದ್ದು

• ಟೊಮ್ಯಾಟೊ - 1 ಸಣ್ಣದಾಗಿ ಹೆಚ್ಚಿದ್ದು

• ಕೊತ್ತಂಬರಿ ಸೊಪ್ಪು - 2 ಚಮಚ

• ಸೇವ್ - 1 ಕಪ್, ಕುರುಕುರು

• ಜೀರಿಗೆ ಪುಡಿ, ಚಾಟ್ ಮಸಾಲಾ, ಕೆಂಪು ಮೆಣಸಿನ ಪುಡಿ

• ಸಣ್ಣದಾಗಿ ಹೆಚ್ಚಿದ ಕೊತ್ತಂಬರಿ, ದಾಳಿಂಬೆ (ಬೇಕಾದ್ರೆ)

ಚಟ್ನಿಗಳಿಗೆ:

• ಹಸಿ ಚಟ್ನಿ: ಪುದೀನಾ ಸೊಪ್ಪು + ಕೊತ್ತಂಬರಿ ಸೊಪ್ಪು + ಹಸಿ ಮೆಣಸಿನಕಾಯಿ + ಉಪ್ಪು + ನಿಂಬೆಹಣ್ಣು

• ಹುಣಸೆ ಚಟ್ನಿ: ಹುಣಸೆಹಣ್ಣು + ಬೆಲ್ಲ + ಜೀರಿಗೆ ಪುಡಿ + ಕಾಳು ಮೆಣಸು ಪುಡಿ + ಉಪ್ಪು

ಮಾಡುವ ವಿಧಾನ:

ಹಂತ 1: ಚಟ್ನಿ ರೆಡಿ ಮಾಡಿ

ಹಸಿ ಚಟ್ನಿ ಎಲ್ಲಾ ಪದಾರ್ಥ ಹಾಕಿ ರುಬ್ಬಿ. ಹುಣಸೆ ಚಟ್ನಿಗೆ ಹುಣಸೆ ನೀರಿಗೆ ಬೆಲ್ಲ ಕರಗಿಸಿ, ಮಸಾಲೆ ಹಾಕಿ ಕುದಿಸಿ.

ಹಂತ 2: ಆಲೂಗೆಡ್ಡೆ ಮಿಕ್ಸ್

ಬೇಯಿಸಿದ ಆಲೂಗಡ್ಡೆಗೆ ಸ್ವಲ್ಪ ಉಪ್ಪು, ಜೀರಿಗೆ ಪುಡಿ ಮತ್ತು ಕೆಂಪು ಮೆಣಸಿನ ಪುಡಿ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ ಇಟ್ಟುಕೊಳ್ಳಿ.

ಹಂತ 3:

• ಪುರಿಗಳನ್ನು ಜೋಡಿಸಿ: ಒಂದು ಅಗಲವಾದ ಪ್ಲೇಟ್‌ನಲ್ಲಿ 7-8 ಫ್ಲಾಟ್ ಪುರಿಗಳನ್ನು ಸಾಲಾಗಿ ಜೋಡಿಸಿ.

• ಟಾಪಿಂಗ್ಸ್ ಹಾಕಿ: ಪ್ರತಿಯೊಂದು ಪುರಿಯ ಮೇಲೆಯೂ ಸ್ವಲ್ಪ ಹಿಸುಕಿದ ಆಲೂಗಡ್ಡೆ ಮಿಶ್ರಣವನ್ನು ಇಡಿ. ನಂತರ ಅದರ ಮೇಲೆ ಸಣ್ಣಗೆ ಹೆಚ್ಚಿದ ಈರುಳ್ಳಿ ಮತ್ತು ಟೊಮ್ಯಾಟೊ ಚೂರುಗಳನ್ನು ಹಾಕಿ.

• ಮಸಾಲೆ ಹಾಕಿ: ಈಗ ಇದರ ಮೇಲೆ ಸ್ವಲ್ಪ ಚಾಟ್ ಮಸಾಲಾ, ಜೀರಿಗೆ ಪುಡಿ ಮತ್ತು ಕೆಂಪು ಮೆಣಸಿನ ಪುಡಿಯನ್ನು ಹಾಕಿ.

• ಚಟ್ನಿಗಳನ್ನು ಸೇರಿಸಿ: ಪ್ರತಿ ಪುರಿಯ ಮೇಲೆ ಚಟ್ನಿಯನ್ನು ನಿಮ್ಮ ರುಚಿಗೆ ತಕ್ಕಂತೆ ಸೇರಿಸಿ.

• ಸೇವ್‌ನಿಂದ ಹಾಕಿ: ಚಾಟ್ ಅಂಗಡಿಯ ಲುಕ್ ಮತ್ತು ಗರಿಗರಿ ರುಚಿಗಾಗಿ ಪುರಿಗಳ ಮೇಲೆ ಉದುರು ಉದಾರವಾಗಿ ಸಣ್ಣ ನೈಲಾನ್ ಸೇವ್ ಅನ್ನು ಹಾಕಿ.

• ಕೊನೆಯದಾಗಿ ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು ಮತ್ತು ಕೆಲವು ಹನಿ ನಿಂಬೆ ರಸವನ್ನು ಹಿಂಡಿದರೆ, ಬಾಯಲ್ಲಿ ನೀರೂರಿಸುವ ಸೇವ್ ಪುರಿ ಸವಿಯಲು ಸಿದ್ಧ!