ಅಸಮರ್ಪಕ ಸ್ತನ್ಯಪಾನದಿಂದ ಅತಿ ಹೆಚ್ಚು ಶಿಶುಗಳು ಮರಣ ಹೊಂದುವ ರಾಷ್ಟ್ರಗಳಲ್ಲಿ ಭಾರತವೂ ಒಂದು!

ನವದೆಹಲಿ: ಮಗುವಿನ ಬೆಳವಣಿಗೆಯಲ್ಲಿ ತಾಯಿಯ ಎದೆಹಾಲು ಅತ್ಯಂತ ಅವಶ್ಯಕ. ಹುಟ್ಟಿದ ಮೊದಲ ಆರು ತಿಂಗಳು ತಾಯಿಯ ಹಾಲು ಕಾಲಕಾಲಕ್ಕೆ ಕಡ್ಡಾಯವಾಗಿ ಶಿಶುಗಳಿಗೆ ಸಿಗಬೇಕಾಗುತ್ತದೆ.

ಪೋಷಕಾಂಶಗಳು ಮತ್ತು ಪ್ರತಿಕಾಯಗಳಿಂದ ತುಂಬಿರುವ ತಾಯಿಯ ಎದೆಹಾಲು ನೀಡಿದರೆ ಕೇವಲ ಮಗುವಿಗೆ ಮಾತ್ರವಲ್ಲದೆ ತಾಯಿಯ ಆರೋಗ್ಯ ದೃಷ್ಟಿಯಿಂದಲೂ ಉತ್ತಮ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಮಾರ್ಗಸೂಚಿ ಹೇಳುತ್ತದೆ.

ಆದರೆ ವಿಶ್ವಸಂಸ್ಥೆ ಇತ್ತೀಚೆಗೆ ಬಿಡುಗಡೆ ಮಾಡಿದ ಹೊಸ ವರದಿಯಲ್ಲಿ ಆಘಾತಕಾರಿ ಸುದ್ದಿ ಹೊರಬಿದ್ದಿದೆ. ಚೀನಾ, ಭಾರತ, ನೈಜೀರಿಯಾ, ಮೆಕ್ಸಿಕೊ ಮತ್ತು ಇಂಡೊನೇಷಿಯಾಗಳಲ್ಲಿ ಪ್ರತಿವರ್ಷ ತಾಯಿಯ ಎದೆಹಾಲು ಸರಿಯಾಗಿ ಸಿಗದೆ 2,36,000ಕ್ಕೂ ಅಧಿಕ ಶಿಶುಗಳು ಸಾಯುತ್ತಿದ್ದಾರಂತೆ. 

ಭಾರತದಲ್ಲಿ ಪ್ರತಿವರ್ಷ ಸುಮಾರು 1 ಲಕ್ಷ ಶಿಶುಗಳು ಸಾಯುತ್ತಿದ್ದಾರೆ. ತಾಯಿಯ ಎದೆಹಾಲು ಸರಿಯಾದ ಪ್ರಮಾಣದಲ್ಲಿ ಸಿಕ್ಕಿದರೆ ಶಿಶಿಗಳು ಸಾಯುವುದನ್ನು ತಡೆಗಟ್ಟಬಹುದು ಎನ್ನುತ್ತದೆ ವಿಶ್ವಸಂಸ್ಥೆ ವರದಿ. ಮರಣ ಮತ್ತು ಇತರ ನಷ್ಟಗಳಿಂದ ಅಸಮರ್ಪಕ ಹಾಲುಣಿಸುವಿಕೆಯ ಕಾರಣದಿಂದಾಗಿ ದೇಶದ ಆರ್ಥಿಕತೆ 14 ಬಿಲಿಯನ್ ಡಾಲರ್ ಗಳಷ್ಟು ವೆಚ್ಚವಾಗಬಹುದು ಎನ್ನುತ್ತದೆ ವರದಿ.

ವಿಶ್ವಸಂಸ್ಥೆ ಮಕ್ಕಳ ನಿಧಿ, ವಿಶ್ವ ಆರೋಗ್ಯ ಸಂಸ್ಥೆಯೊಂದಿಗೆ ತಯಾರಿಸಿದ ಹೊಸ ವರದಿ ಗ್ಲೋಬಲ್ ಬ್ರೆಸ್ಟ್ ಫೀಡಿಂಗ್ ಸ್ಕೋರ್ ಕಾರ್ಡ್ ಪ್ರಕಾರ, ತಾಯಿಯ ಎದೆಹಾಲು ಶಿಶುಗಳನ್ನು ಅತಿಸಾರ ಮತ್ತು ನ್ಯುಮೋನಿಯಾದಂತಹ ಖಾಯಿಲೆಗಳಿಂದ ಸಹ ತಡೆಯುತ್ತದೆ. ಇತ್ತೀಚೆಗೆ ಮಹಿಳೆಯರಲ್ಲಿ ಹೆಚ್ಚಾಗಿ ಕಾಣುವ ಅಂಡಾಶಯ ಮತ್ತು ಸ್ತನ ಕ್ಯಾನ್ಸರ್ ನಂತಹ ರೋಗಗಳನ್ನು ಕೂಡ ಎದೆಹಾಲು ಉಣಿಸುವುದರಿಂದ ತಡೆಗಟ್ಟಬಹುದು.

ತಾಯಿಯ ಎದೆಹಾಲು ಶಿಶುಗಳಿಗೆ ಸರಿಯಾಗಿ ದೊರಕದೆ ಮುಂದಿನ ವರ್ಷಗಳಲ್ಲಿ ಈ ನಾಲ್ಕು  ದೇಶಗಳಲ್ಲಿ ಶಿಶುಗಳ ಮರಣ ಪ್ರಮಾಣ  ಹೆಚ್ಚಾಗಬಹುದು. ಅಲ್ಲದೆ ಮಕ್ಕಳ ಆರೋಗ್ಯ ವೆಚ್ಚಕ್ಕೆ ಪ್ರತಿವರ್ಷ 119 ಶತಕೋಟಿ ಡಾಲರ್ ಬೇಕಾಗಬಹುದು ಎಂದು ವರದಿ ಆತಂಕಕಾರಿ ಮಾಹಿತಿಯನ್ನು ಬಹಿರಂಗಪಡಿಸಿದೆ.