ಮೈಸೂರು: ಹೆತ್ತ ಮಗಳನ್ನು ವೇಶ್ಯಾವಾಟಿಕೆಗೆ ದೂಡಲು ತಾಯಿಯೇ ಪ್ರಚೋದಿಸಿರುವ ಘಟನೆಯೊಂದು ಮದ್ದೂರಿನಲ್ಲಿ ನಡೆದಿದೆ.

ಬಾಲಕಿಯ ತಾಯಿ ವೇಶ್ಯಾವಾಟಿಕೆ ನಡೆಸುತ್ತಿದ್ದು, ಶಾಲೆ ಬಿಟ್ಟಿದ್ದ ತನ್ನ ಮಗಳೂ ಕೂಡ ತನ್ನ ವೃತ್ತಿಗೆ ಸೇರಿಕೊಳ್ಳುವಂತೆ ಹೇಳಿದ್ದಾಳೆ. ಇದಕ್ಕೆ ಒಪ್ಪದ ಮಗಳು 6 ತಿಂಗಳ ಹಿಂದೆ ಗಾರ್ಮೆಟ್ಸ್ ಫ್ಯಾಕ್ಟರಿಯೊಂದರಲ್ಲಿ ಕೆಲಸಕ್ಕೆ ಸೇರಿಕೊಂಡಿದ್ದಾಳೆ. ಇದರಂತೆ ಪ್ರತೀ ದಿನ ತಾಯಿ ನೀಡುತ್ತಿದ್ದ ಹಿಂಸೆ ತಾಳಲಾರದೆ ಕಳೆದ ವರ್ಷ ಮನೆಬಿಟ್ಟು ಹೊರ ಬಂದಿದ್ದಾಳೆ.

ಇಷ್ಟಾದರೂ ಮಗಳ ಬೆನ್ನು ಬಿಡದ ತಾಯಿ ನಾಗಮ್ಮ ತನ್ನ ಸ್ನೇಹಿತರೊಂದಿಗೆ ಬಾಲಕಿ ಕೆಲಸ ಮಾಡುತ್ತಿದ್ದ ಗಾರ್ಮೆಂಟ್ಸ್ ಫ್ಯಾಕ್ಟರಿಗೆ ಹೋಗಿ ಬಲವಂತೆ ಮಾಡಿದ್ದಾರೆ. ಈ ವೇಳೆ ಇಬ್ಬರ ನಡುವೆ ಜಗಳವಾಗಿದೆ. ಆದರೆ, ಸಾರ್ವಜನಿಕರು ಬಾಲಕಿಗೆ ಬೆಂಬಲ ವ್ಯಕ್ತಪಡಿಸಿದ್ದಾರೆ.

ಕೂಡಲೇ ಸ್ಥಳಕ್ಕಾಗಮಿಸಿರುವ ಪೊಲೀಸರು ನಾಗಮ್ಮ ಹಾಗೂ ಆಕೆಯ ಸ್ನೇಹಿತೆ ಭಾರತಿಯನ್ನು ವಶಕ್ಕೆ ಪಡೆದಿದ್ದಾರೆ. ನಾಗಮ್ಮ ಅವರಿಗೆ ಇಬ್ಬರು ಮಕ್ಕಳಿದ್ದಾರೆ. ತನ್ನ ಪತ್ನಿ ವೇಶ್ಯಾವಾಟಿಕೆ ನಡೆಸುತ್ತಿರುವ ವಿಚಾರ ತಿಳಿದ ನಾಗಮ್ಮ ಅವರ ಪತಿ 8 ವರ್ಷದ ಹಿಂದೆಯೇ ಆಕೆಯನ್ನು ತೊರೆದಿದ್ದಾನೆಂಬುದು ವಿಚಾರಣೆ ವೇಳೆ ಬೆಳಕಿಗೆ ಬಂದಿದೆ. ಪ್ರಸ್ತುತ ನಾಗಮ್ಮ ಅವರನ್ನು ಬಂಧನಕ್ಕೊಳಪಡಿಸಿರುವ ಪೊಲೀಸರು ಬಾಲಕಿಯನ್ನು ಬಾಲ ಮಂದಿರಕ್ಕೆ ಕಳುಹಿಸಿದ್ದಾರೆ.