ಬೆಂಗಳೂರು: ಅಪಹರಣಕ್ಕೆ ಒಳಗಾಗಿದ್ದ ವೈದ್ಯೆಯನ್ನು ರಕ್ಷಿಸಿದ ಪೊಲೀಸರು ಆ ಸಂಬಂಧ ಇಬ್ಬರು ಆರೋಪಿಗಳನ್ನು ಬುಧವಾರ ಬಂಧಿಸಿದ್ದಾರೆ. 

ಪೀಣ್ಯದ 8ನೇ ಹಂತದಿಂದ ಸಂಜೆ 6.30ಕ್ಕೆ ಭಟ್ಕಳ ಮೂಲದ ಡಾ.ಉಮಾ(52) ಅವರನ್ನು ಇಬ್ಬರು ಆರೋಪಿಗಳು ಅಪಹರಿಸಿದ್ದರು. ಆರೋಪಿಗಳಿಂದ ಉಮಾ ಅವರನ್ನು ರಕ್ಷಿಸಿದ ಪೊಲೀಸರು, ಶ್ರೀರಾಮಪುರದ ಸರವಣ ಮತ್ತು ಪ್ರಕಾಶ್ ಎಂಬುವವರನ್ನು ಬಂಧಿಸಿದ್ದಾರೆ. 

ಉಮಾ ಕೊಣನಕುಂಟೆಯಲ್ಲಿ ಆಸ್ಪತ್ರೆ ತೆರೆದಿದ್ದರು. ಅವರನ್ನು ಮಧ್ಯಾಹ್ನ ಆಟೋದಲ್ಲಿ ಅಪಹರಿಸಿ ಶ್ರೀರಾಮಪುರದ ಮನೆಯೊಂದರಲ್ಲಿ ಬಂಧನದಲ್ಲಿಡಲಾಯಿತು. ಅಷ್ಟೇ ಅಲ್ಲದೇ, ಉಮಾ ಅವರ ಪುತ್ರ ಪವನ್ ಗೆ ಕರೆ ಮಾಡಿದ ಆರೋಪಿಗಳು, ತಾಯಿಯನ್ನು ಬಿಡುಗಡೆ ಮಾಡಲು ರು.20 ಲಕ್ಷ ನೀಡುವಂತೆ ಬೇಡಿಕೆ ಇಟ್ಟು. ತಮ್ಮ ಖಾತೆಗೆ ಹಣ ಜಮಾ ಮಾಡಿ ಎಂದು ಹೇಳಿದ್ದರು. 

ಅಪಹರಣ ಬಗ್ಗೆ ಪೀಣ್ಯ ಠಾಣೆಯಲ್ಲಿ ಪವನ್ ದೂರು ದಾಖಲಿಸಿದ್ದರು. ಆರೋಪಿಗಳ ಖಾತೆಗೆ 20 ಸಾವಿರ ಹಾಗೂ 8 ಸಾವಿರ ಹಣವನ್ನು ಪ್ರತ್ಯೇಕವಾಗಿ ಜಮಾ ಮಾಡಲಾಯಿತು. ಖಾತೆ ವಿವರ ಪಡೆದ ಪೊಲೀಸರು ಉಮಾ ಅವರನ್ನು ರಕ್ಷಿಸಿದ್ದಾರೆ. ವೈದ್ಯೆ ಉಮಾ ಹಣದ ವಿಚಾರದಲ್ಲಿ ಹಲವಾರು ರೋಗಿಗಳಿಗೆ ವಂಚಿಸಿದ್ದಾರೆ ಎಂಬ ಆರೋಪ ಕೇಳಿ ಬಂದಿದೆ.