ಬೆಂಗಳೂರು: ಬೆಂಗಳೂರು ಮೆಟ್ರೋ ರೈಲು ನಿಗಮ ಲಿಮಿಟೆಡ್ ನ ವ್ಯವಸ್ಥಾಪಕ ನಿರ್ದೇಶಕ ಪ್ರದೀಪ್ ಸಿಂಗ್ ಖರೋಲಾ ಅವರನ್ನು  ಭಾರತ ಸರ್ಕಾರದ ಕಾರ್ಯದರ್ಶಿಯನ್ನಾಗಿ ನೇಮಿಸಿ ನವದೆಹಲಿಗೆ ವರ್ಗಾಯಿಸಲಾಗಿದೆ.

2013  ಆಗಸ್ಟ್ 10 ರಂದು ಬಿಎಂಆರ್ ಸಿಎಲ್ ಎಂಡಿ ಯಾಗಿ ನೇಮಕಗೊಂಡಿದ್ದರು. ಮೆಟ್ರೋ ಒಳಸುರಂಗ ಮಾರ್ಗ ನಿರ್ಮಾಣದಂತಹ ನಿರ್ಣಾಯಕ ಅವಧಿ ಹಾಗೂ ಈಸ್ಟ್- ವೆಸ್ಟ್ ಕಾರಿಡಾರ್ ನಿರ್ಮಾಣದಲ್ಲಿ ಖರೋಲಾ ಉತ್ತಮ ಕಾರ್ಯ ನಿರ್ವಹಿಸಿದ್ದರು.

ಮುಂದಿನ ಜೂನ್ ತಿಂಗಳ ವೇಳೆಗೆ ಮೆಟ್ರೋ ಮೊದಲ ಹಂತ ಉದ್ಘಾಟನೆಯಾಗಲಿದ್ದು, ಅಲ್ಲಿಯವರೆಗೂ ಬಿಎಂಆರ್ ಸಿಎಲ್ ನಲ್ಲೇ ಮುಂದುವರಿಯಲು ಖರೋಲಾ ಬಯಸಿದ್ದರು ಎಂದು ಮೂಲಗಳು ತಿಳಿಸಿವೆ. ಆದರೆ ಈ ಸಂಬಂಧ ಪ್ರತಿಕ್ರಿಯಿಸಲು ಖರೋಲಾ ನಿರಾಕರಿಸಿದ್ದಾರೆ.