ಬೆಂಗಳೂರು : ಬೇಸಿಗೆ ಸಮಯದಲ್ಲಿ  ರಾಜ್ಯದೆಲ್ಲೆಡೆ  ವಿದ್ಯುತ್ ಗೆ ಬೇಡಿಕೆ ಹೆಚ್ಚಾಗಿದ್ದು, ಬೆಂಗಳೂರಿನಲ್ಲಿ ಕೊರತೆ ಎದುರಾಗಿದೆ. ಪರಿಣಾಮ ಹಲವು ಪ್ರದೇಶಗಳಲ್ಲಿ ವಿದ್ಯುತ್ ಕಡಿತಗೊಳಿಸಲಾಗುತ್ತಿದೆ. ಸರ್ಕಾರ ಮಾತ್ರ ವಿದ್ಯುತ್ ಪೂರೈಕೆಯಲ್ಲಿ ಕೊರತೆಯಾಗಿಲ್ಲ ಎಂದು ಹೇಳುತ್ತಿದೆ. ಆದರೆ. ಕೆಲವು ವಾರಗಳ ಹಿಂದಿನಿಂದಲೂ ಆಗಾಗ್ಗೇ ವಿದ್ಯುತ್ ಕಡಿತ ಮಾಡಲಾಗುತ್ತಿದೆ ಎಂದು ಗ್ರಾಹಕರು ಆರೋಪಿಸಿದ್ದಾರೆ.

ರಾಜ್ಯದೆಲ್ಲೆಡೆ ಶನಿವಾರ 237 ಮಿಲಿಯನ್ ಟನ್ ವಿದ್ಯುತ್ ಬಳಕೆ ಮಾಡಲಾಗಿದೆ. ಕಳೆದ ವರ್ಷ ಇದೇ ದಿನದಂದು 213 ಮಿಲಿಯನ್ ಟನ್ ವಿದ್ಯುತ್ ಬಳಸಲಾಗಿದ್ದು, ಕಳೆದ ಬಾರಿಗಿಂತಲೂ ಈ ವರ್ಷ 24 ಮಿಲಿಯನ್ ಹೆಚ್ಚು ಯುನಿಟ್ ವಿದ್ಯುತ್ ಬಳಸಲಾಗಿದೆ. ಉಷ್ಣಾಂಶದಲ್ಲಿ ಏರಿಕೆಯಿಂದಾಗಿ ಪ್ಯಾನ್, ಏಸಿಯನ್ನು ಹೆಚ್ಚಾಗಿ ಬಳಸಲಾಗುತ್ತಿದೆ.

 ಕಳೆದ ವರ್ಷ ಮಾರ್ಚ್ ತಿಂಗಳ ಮೊದಲ ವಾರದಲ್ಲಿ 221 ಮಿಲಿಯನ್ ಯೂನಿಟ್ ವಿದ್ಯುತ್ ಬಳಸಲಾಗಿತ್ತು, ಆದರೆ, ಈ ವರ್ಷ ಇದು ಏರಿಕೆಯಾಗಿದ್ದು, ಸರಾಸರಿಯಲ್ಲಿ ಇದರಲ್ಲಿ ಅರ್ಧವಾದರೂ ವಿದ್ಯುತ್ ಪೂರೈಸುವ ಜವಾಬ್ದಾರಿ ಬೆಸ್ಕಾಂ ಮೇಲಿದೆ.

 ಫೆಬ್ರವರಿ ಮಧ್ಯಭಾಗದಿಂದ ನಿರ್ವಹಣಾ ಕೆಲಸ , ನೆಟ್ ವರ್ಕ್ ನಲ್ಲಿ ದೋಷ ಮತ್ತಿತರ ಕಾರಣಗಲಿಂದ  ಬೆಂಗಳೂರು ನಗರದಾದ್ಯಂತ ವಿದ್ಯುತ್ ಕಡಿತ ಮಾಡಲಾಗಿದೆ. ಹೂಡಿ ಉಪವಿಭಾಗದಲ್ಲಿ ತುರ್ತು ದುರಸ್ಥಿ ಕಾರಣ ಹೆಚ್ ಎಸ್ ಆರ್ ಲೇಔಟ್, ಕೊರಮಂಗಲ, ಮತ್ತಿತರ ಪ್ರದೇಶಗಳಲ್ಲಿ ಕೆಲ ವೇಳೆ ವಿದ್ಯುತ್ ಕಡಿತ ಮಾಡಲಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ. 

ಬೇಸಿಗೆಗೆ ಸಾಕಾಗುವಷ್ಟು ವಿದ್ಯುತ್ ಇದ್ದು, ಈ ಬಗ್ಗೆ ಗೊಂದಲ ಮೂಡಿಸಬಾರದು. ವಿದ್ಯುತ್ ಕಡಿತ ಬಗ್ಗೆ ಸಾಮಾಜಿಕ ಜಾಲ ಅಥವಾ ವೆಬ್ ಸೈಟ್ ಮೂಲಕ ತಿಳಿಸಲಾಗುವುದು,ಎಂದು ಅವರು ತಿಳಿಸಿದ್ದಾರೆ.