ಮೈಸೂರು: ಏರ್ ಇಂಡಿಯಾದ ಉಪ ಸಂಸ್ಥೆ ಅಲೈಯನ್ಸ್ ಏರ್ ಮೈಸೂರು ದಸರಾ ಪ್ರಯುಕ್ತ ಬೆಂಗಳೂರಿನಿಂದ ಮೈಸೂರಿಗೆ ವಿಮಾನ ಸೇವೆ ನೀಡಲು ನಿರ್ಧರಿಸಿದೆ.

ಈ ಕುರಿತು ಮಾಹಿತಿ ನೀಡಿದ ಮೈಸೂರು ವಿಮಾನ ನಿಲ್ದಾಣ ನಿರ್ದೇಶಕ ಮನೋಜ್ ಕುಮಾರ್ ಸಿಂಗ್, ಅಲೈಯನ್ಸ್ ಏರ್ ನಿಂದ ಸಿಕ್ಕಿರುವ ಮಾಹಿತಿ ಪ್ರಕಾರ, ವಿಮಾನಯಾನ ಸಂಸ್ಥೆ 70 ಸೀಟುಗಳ ಎಟಿಆರ್ -72 ವಿಮಾನ ಅಕ್ಟೋಬರ್ 10ರಿಂದ ಅಕ್ಟೋಬರ್ 20ರವರೆಗೆ ಸಂಚಾರ ನಡೆಸಲಿದೆ ಎಂದರು.

ವಿಮಾನ, ಬೆಂಗಳೂರಿನಿಂದ ಸಂಜೆ 3 ಗಂಟೆಗೆ ಹೊರಟು ಮೈಸೂರಿಗೆ 3.30ಕ್ಕೆ ತಲುಪಲಿದೆ. ಮೈಸೂರಿನಿಂದ ಸಂಜೆ 4ಕ್ಕೆ ಹೊರಡಲಿದೆ. ದರ ಇನ್ನೂ ನಿಗದಿಯಾಗಿಲ್ಲ. ದಸರಾಕ್ಕೆ ಹೋಗುವವರ ಜನದಟ್ಟಣೆ ಇರುವುದರಿಂದ ರಾಜ್ಯ ಸರ್ಕಾರ ಮತ್ತು ವಿಮಾನಯಾನ ಸಂಸ್ಥೆ ಒಪ್ಪಂದ ಮಾಡಿಕೊಂಡಿದೆ.

ಈ ಮಧ್ಯೆ ಚೆನ್ನೈ ಮೂಲಕ ಹೈದಾರಾಬಾದ್-ಮೈಸೂರು ನಡುವೆ ವಿಮಾನ ಹಾರಾಟ ನಡೆಸುವ ಟ್ರುಜೆಟ್ ಗೆ ಸಹ ಜನರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಈ ಸೇವೆ ಕಳೆದ ವರ್ಷ ದಸರಾಕ್ಕೆ ಆರಂಭವಾಗಿತ್ತು.