ವಿಜಯಪುರ: ವಿಜಯಪುರ ಜಿಲ್ಲೆಯ ಕೊರೋನಾವೈರಸ್ ಪೀಡಿತ ವೃದ್ದೆಯ ಪತಿ (69) ಅನಾರೋಗ್ಯದಿಂದ ಸಾವನ್ನಪ್ಪಿದ್ದಾರೆ. ಭಾನುವಾರ ರಾತ್ರಿ ಈ ವೃದ್ದ ಸಾವನ್ನಪ್ಪಿದ್ದು ಇಂದು ಮಧ್ಯಾಹ್ನವಷ್ಟೇ ಆತನ ಪತ್ನಿಗೆ ಕೊರೋನಾ ಇರುವುದು ದೃಢಪಟ್ಟಿತ್ತು.
ವಿಜಯಪುರದಲ್ಲಿ ನಿನ್ನೆಯವರೆಗೆ ಯಾವುದೇ ಕೊರೋನಾ ಪ್ರಕರಣಗಳು ವರದಿಯಾಗಿರಲಿಲ್ಲ ಆದರೆ ಇಂದು ಮಧ್ಯಾಹ್ನ ವಿಜಯಪುರ ಚಪ್ಪರ ಬಂದ್ ಕಾಲೋನಿಯ ನಿವಾಸಿ 60 ವರ್ಷದ ವೃದ್ದೆಯಲ್ಲಿ ಕೊರೋನಾ ಕಾಣಿಸಿತ್ತು. ಆದರೆ ಆಕೆ ಯಾವ ದೂರದೂರಿನ ಪ್ರಯಾಣಕ್ಕೆ ತೆರಳಿಲ್ಲದಿದ್ದದ್ದು ಹೆಚ್ಚು ಆತಂಕಕ್ಕೆ ಕಾರಣವಾಗಿದೆ.
ಇದೀಗ ಮೃತಪಟ್ಟಿರುವ ಆಕೆಯ ಪತಿ ಕೊರೋನಾ ಸೋಂಕಿನಿಂದ ಸಾವನ್ನಪ್ಪಿದ್ದಾನೆ ಎನ್ನುವುದು ದೃಢವಾಗಿಲ್ಲ. ಮೃತನ ವೈದ್ಯಕೀಯ ವರದಿಗಾಗಿ ಜಿಲ್ಲಾಡಳಿತ ನಿರೀಕ್ಷೆಯಲ್ಲಿದೆ.
ಮೃತನದು ಅವಿಭಕ್ತ ಕುಟುಂಬವಾಗಿದ್ದು ಬರೋಬ್ಬರಿ 24 ಜನರು ಇದ್ದಾರೆ. ಒಟ್ಟು 22 ಜನರ ಗಂಟಲು ದ್ರವವನ್ನ ಪರೀಕ್ಷೆಗೆ ಕಳಿಸಲಾಗಿದೆ. ಮೃತ ವ್ಯಕ್ತಿ ಮಹಾರಾಷ್ಟ್ರದಲ್ಲಿ ತನ್ನ ಸಂಬಂಧಿಗಳ ಶವ ಸಂಸ್ಕಾರದಲ್ಲಿ ಪಾಲ್ಗೊಂಡಿದ್ದನೆಂದು ತಿಳಿದುಬಂದಿದೆ. ಇದೇ ಕಾರಣ ಆತನ ಪತ್ನಿಗೂ ಕೊರೋನಾ ತಗುಲಿರಬಹುದು ಎಂದು ಶಂಕೆ ಇದೀಗ ವ್ಯಕ್ತವಾಗಿದೆ. ಆದರೆ ವೃದ್ದನ ಸಾವಿನ ರಹಸ್ಯ ಅರಿಯಲು ವೈದ್ಯಕೀಯ ವರದಿ ಬರುವವರೆಗೆ ಕಾಯಬೇಕಿದೆ.