ಬೆಂಗಳೂರು: ಮಾದಕ ವಸ್ತು ಮಾರಾಟ ಪ್ರಕರಣದ ಆರೋಪಿಗಳಾದ ಕನ್ನಡ ಚಲನಚಿತ್ರ ರಂಗದ ಇಬ್ಬರು ಖ್ಯಾತ ನಟಿಯವರು ಹಾಗೂ ಅವರ ಸ್ನೇಹಿತರ ತಲೆಗೂದಲನ್ನು ಪರೀಕ್ಷೆಗೆ ಒಳಪಡಿಸಲು ಸಿಸಿಬಿಗೆ ಎನ್'ಡಿಪಿಎಸ್ ನ್ಯಾಯಾಲಯ ಶನಿವಾರ ಅನುಮತಿ ನೀಡಿದೆ. 

ಆರೋಪಿಗಳು ಮಾದಕ ವಸ್ತು ಸೇವಿಸಿರುವುದನ್ನು ನ್ಯಾಯಾಲಯದಲ್ಲಿ ರುಜುವಾತುಪಡಿಸಲು ಕೂದಲು ಪರೀಕ್ಷೆ ವರದಿ ಬಹುಮುಖ್ಯ ವೈದ್ಯಕೀಯ ಸಾಕ್ಷ್ಯವಾಗಲಿದೆ. ಈ ಹಿಂದೆ ಪರೀಕ್ಷೆ ಸಲುವಾಗಿ ಆರೋಪಿಗಳಿಂದ ಕೂದಲು ಸಂಗ್ರಹಿಸಲಾಗಿತ್ತು. ಆದರೆ, ಪರೀಕ್ಷೆ ಪ್ರಕ್ರಿಯೆಯಲ್ಲಿ ತಾಂತ್ರಿಕ ದೋಷ ಉಂಟಾಗಿದ್ದಕ್ಕೆ ಹೈದರಾಬಾದ್ ವಿಧಿ ವಿಜ್ಞಾನ ಪ್ರಯೋಗಾಲಯ ಕೂದಲು ಪರೀಕ್ಷೆಗೊಳಪಡಿಸದೆ ಮರಳಿಸಿತ್ತು. 

ಬಂಧನಕ್ಕೊಳಗಾದಾಗಿನಿಂದಲೂ ಇಬ್ಬರೂ ನಟಿಯಲು ತನಿಖೆಗೆ ಸಹಕಾರ ನೀಡುತ್ತಿಲ್ಲ. ಹೀಗಾಗಿ ಅವರ ಕೂದಲು ಪರೀಕ್ಷೆಗೊಳಪಡಿಸಲು ವಿಶೇಷ ನ್ಯಾಯಾಲಯದ ಅನುಮತಿ ಕೋರಿದ್ದೆವು. ಈ ಹಿಂದೆ ರಾಗಿಣಿಯವರು ಮೂತ್ರದ ಮಾದರಿಯನ್ನು ಸಂಗ್ರಹಿಸಿ ಪರೀಕ್ಷೆ ನಡೆಸಲು ಮುಂದಾಗಿದ್ದೆವು. ಆದರೆ, ರಾಗಿಣಿ ಮೂತ್ರ ನೀಡುವ ಬದಲು ನೀರು ನೀಡಿದ್ದರು ಎಂದು ಹಿರಿಯ ಪೊಲೀಸ್ ಅಧಿಕಾರಿ ಹೇಳಿದ್ದಾರೆ. 

ಕೂದಲಿನ ಮಾದರಿಗಳನ್ನು ಸಂಗ್ರಹಿಸುವ ವೇಳೆ ಕೆಲ ವಿಧಾನಗಳನ್ನು ಅನುಸರಿಸುವಂತೆ ಹೈದರಾಬಾದ್‌ನ ಎಫ್‌ಎಸ್‌ಎಲ್ ಸಿಸಿಬಿಯನ್ನು ಈ ಹಿಂದೆ ಕೇಳಿಕೊಂಡಿತ್ತು, ಆದರೆ ನಟಿಯರಿಬ್ಬರೂ ಕೂದಲು ಮಾದರಿ ನೀಡಲು ನಿರಾಕರಿಸಿದ್ದರು ಎಂದು ಹೇಳಲಾಗುತ್ತಿದೆ.  ನಟಿಯರಿಬ್ಬರೂ ಡ್ರಗ್ಸ್ ಸೇವನೆ ಮಾಡಿರುವ ಶಂಕೆಗಳಿದ್ದು, ಇದನ್ನು ಸಾಬೀತು ಪಡಿಸಲು ಕೂದಲು ಪರೀಕ್ಷೆ ವರದಿ ಬಹುಮುಖ್ಯ ವೈದ್ಯಕೀಯ ಸಾಕ್ಷ್ಯವಾಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.