ಬೆಂಗಳೂರು: ಸೀರೆ ಕಂಪ್ರೆಸ್ಸರ್ ಯಂತ್ರವನ್ನು ಕುತೂಹಲದಿಂದ ಮುಟ್ಟಿ 14 ವರ್ಷದ ಬಾಲಕನೊಬ್ಬ ಮೃತಪಟ್ಟಿರುವ ಘಟನೆ ಬೆಂಗಳೂರಿನ ಬ್ಯಾಟರಾಯನಪುರ ಪೊಲೀಸ್ ಠಾಣೆ ಸರಹದ್ದಿನ ಹೊಸಗುಡ್ಡನಹಹಳ್ಳಿಯಲ್ಲಿ ನಡೆದಿದೆ.
ಮೃತ ಬಾಲಕನನ್ನು ಸಚಿನ್ ಎಂದು ಗುರುತಿಸಲಾಗಿದ್ದು ಉತ್ತರ ಪ್ರದೇಶ ಮೂಲದವನಾಗಿದ್ದಾನೆ. ಸಚಿನ್ ನ ಸಂಬಂಧಿ ಮನೀಶ ಎಂಬಾಕೆ ಜೆಎಂ ಹ್ಯಾಂಡ್ ಲೂಮ್ ನಲ್ಲಿ ಕೆಲಸ ಮಾಡುತ್ತಿದ್ದು, ಮೊನ್ನೆ ಶನಿವಾರ ಅಪರಾಹ್ನ ಸಚಿನ್ ಆಕೆಗೆ ಊಟ ನೀಡಲೆಂದು ಹೋಗಿದ್ದ. ಆಕೆ ಮಧ್ಯಾಹ್ನ ಊಟ ಮಾಡುತ್ತಿದ್ದಾಗ ಸಚಿನ್ ಕುತೂಹಲದಿಂದ ಕಂಪ್ರೆಸ್ಸರ್ ಮೆಶಿನ್ ನ ರೋಲರ್ ನ್ನು ಮುಟ್ಟಿದ್ದಾನೆ.
ಆತನ ಕೈ ಮೆಶಿನ್ ನಲ್ಲಿ ಸಿಕ್ಕಿ ಹಾಕಿಕೊಂಡಿತು. ಮೆಶಿನ್ ನ ತೀವ್ರ ಒತ್ತಡಕ್ಕೆ ಅವನ ತಲೆಯು ಯಂತ್ರದ ಕಬ್ಬಿಣದ ಕವಚಕ್ಕೆ ಅಪ್ಪಳಿಸಿ ತೀವ್ರ ಪೆಟ್ಟಾಗಿತ್ತು. ಸಿಬ್ಬಂದಿ ತಕ್ಷಣ ಯಂತ್ರವನ್ನು ಸ್ವಿಚ್ ಆಫ್ ಮಾಡಿ, ಹುಡುಗನನ್ನು ಎಳೆದರು.
ತಕ್ಷಣವೇ ಸಮೀಪದ ಆಸ್ಪತ್ರೆಗೆ ಕರೆದುಕೊಂಡು ಹೋಗಲಾಯಿತು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾನೆ.