ಬೆಂಗಳೂರು: ಬಳಕೆಯಾಗದೆ ನಿಷ್ಕ್ರಿಯವಾಗಿರುವ 579 CL-2A(ಚಿಲ್ಲರೆ ಮದ್ಯದ ಅಂಗಡಿಗಳು), CL-9A(ಬಾರ್‌ಗಳು ಮತ್ತು ರೆಸ್ಟೋರೆಂಟ್‌ಗಳು) ಹಾಗೂ CL-11-C(ಸರ್ಕಾರಿ ಸ್ವಾಮ್ಯದ ಮೈಸೂರು ಸೇಲ್ಸ್ ಇಂಟರ್ನ್ಯಾಷನಲ್ ಲಿಮಿಟೆಡ್) ಪರವಾನಗಿಗಳ ಇ-ಹರಾಜಿನ ಕುರಿತು ರಾಜ್ಯ ಸರ್ಕಾರ "ಈ ವಾರದ ಆರಂಭದಲ್ಲಿ" ಗೆಜೆಟ್ ಅಧಿಸೂಚನೆಯನ್ನು ಹೊರಡಿಸುವ ಸಾಧ್ಯತೆಯಿದೆ ಎಂದು ಉನ್ನತ ಮೂಲಗಳು TNIE ಗೆ ತಿಳಿಸಿವೆ.

"ಬಹುತೇಕ ಪರವಾನಗಿಗಳನ್ನು ಬೆಂಗಳೂರು ನಗರಕ್ಕೆ ಹರಾಜು ಮಾಡಲಾಗುತ್ತದೆ. ಉಳಿದವುಗಳನ್ನು ಮಹಾನಗರ ಪಾಲಿಕೆ ಮತ್ತು ಇತರ ತಾಲ್ಲೂಕುಗಳಲ್ಲಿ ಹರಾಜು ಮಾಡಲಾಗುತ್ತದೆ. CL-9A ಅನ್ನು ಬೆಂಗಳೂರು, ಮೈಸೂರು, ಮಂಗಳೂರು ಮತ್ತು ಬೆಳಗಾವಿಯಂತಹ ಮಹಾನಗರ ಪ್ರದೇಶಗಳಿಗೆ ಹರಾಜು ಮಾಡುವ ಸಾಧ್ಯತೆಯಿದೆ" ಎಂದು ಮೂಲಗಳು ತಿಳಿಸಿವೆ.

"ಬೆಂಗಳೂರು ನಗರದಲ್ಲಿ ಪರವಾನಗಿಗಳಿಗೆ ಹರಾಜಿನ ಮೂಲ ಬಿಡ್ಡಿಂಗ್ 1.5 ಕೋಟಿ ರೂ.ಗಳಿಗೆ ನಿಗದಿಯಾಗುವ ಸಾಧ್ಯತೆಯಿದೆ. ಇತರ ಪ್ರದೇಶಗಳಿಗೆ ಇದು 80 ಲಕ್ಷದಿಂದ 1 ಕೋಟಿ ರೂ.ಗಳವರೆಗೆ ಇರಬಹುದು. ಇ-ಹರಾಜು ಪ್ರಕ್ರಿಯೆಯು ಜನವರಿ 10, 2026 ರೊಳಗೆ ಮುಗಿಯುವ ನಿರೀಕ್ಷೆಯಿದೆ. ಸರ್ಕಾರವು ಹರಾಜಿನ ಮೂಲಕ ಸುಮಾರು 600 ಕೋಟಿ ರೂ.ಗಳ ಆದಾಯ ಸಂಗ್ರಹಿಸುವ ಸಾಧ್ಯತೆಯಿದೆ" ಎಂದು ಅವರು ಹೇಳಿದ್ದಾರೆ.

"ಹರಾಜಿನಲ್ಲಿ ಭಾಗವಹಿಸಲು, ಬಿಡ್ದುದಾರರು ಸುಮಾರು 50,000 ರೂ.ಗಳ ಮರುಪಾವತಿಸಲಾಗದ ಅರ್ಜಿ ಶುಲ್ಕ ಮತ್ತು ಮೂಲ ಬಿಡ್ಡಿಂಗ್ ಬೆಲೆಯ ಸುಮಾರು ಶೇ. 3 ರಷ್ಟು ಮರುಪಾವತಿಸಬಹುದಾದ ಆರಂಭಿಕ ಹಣ ಠೇವಣಿ(ಇಎಂಡಿ) ಪಾವತಿಸಬೇಕಾಗುತ್ತದೆ. ಭಾರತ ಸರ್ಕಾರದ ಉದ್ಯಮವಾದ ಎಂಎಸ್‌ಟಿಸಿ ಲಿಮಿಟೆಡ್ ಈ ಹರಾಜನ್ನು ಪಾರದರ್ಶಕ ಎಲೆಕ್ಟ್ರಾನಿಕ್(ಇ-ಹರಾಜು) ವ್ಯವಸ್ಥೆಯ ಮೂಲಕ ನಡೆಸುತ್ತದೆ" ಎಂದು ಮೂಲಗಳು ತಿಳಿಸಿವೆ.

ಏತನ್ಮಧ್ಯೆ, ಅವಧಿ ಮೀರಿದ ಪರವಾನಗಿಗಳ ನವೀಕರಣಕ್ಕಾಗಿ ನ್ಯಾಯಾಲಯದಲ್ಲಿ 20ಕ್ಕೂ ಹೆಚ್ಚು ರಿಟ್ ಅರ್ಜಿಗಳನ್ನು ಸಲ್ಲಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ನವೆಂಬರ್ 3 ರಂದು ಸರ್ಕಾರವು ಕರ್ನಾಟಕ ಅಬಕಾರಿ(ಪರವಾನಗಿಗಳ ಸಾಮಾನ್ಯ ಷರತ್ತುಗಳು) ನಿಯಮಗಳು, 1967, ಕರ್ನಾಟಕ ಅಬಕಾರಿ(ಬಿಯರ್ ಚಿಲ್ಲರೆ ಮಾರಾಟದ ಹಕ್ಕಿನ ಗುತ್ತಿಗೆ) ನಿಯಮಗಳು, 1976 ಮತ್ತು ಕರ್ನಾಟಕ ಅಬಕಾರಿ (ಭಾರತೀಯ ಮತ್ತು ವಿದೇಶಿ ಮದ್ಯದ ಮಾರಾಟ) ನಿಯಮಗಳು 1968 ರ ತಿದ್ದುಪಡಿಗಳ ಕುರಿತು ಅಂತಿಮ ಅಧಿಸೂಚನೆಯನ್ನು ಹೊರಡಿಸಿತ್ತು.