ಬೆಂಗಳೂರು: ಕೇವಲ ನಾಲ್ಕು ತಿಂಗಳ ಅವಧಿಯಲ್ಲಿ 2,869 ಜನರು ಆಹಾರ ಸುರಕ್ಷತೆ ಮತ್ತು ಔಷಧ ಆಡಳಿತ ಇಲಾಖೆ(ಎಫ್ಡಿಎ) ನಗರದ ಹತ್ತು ಮಾಲ್ಗಳಲ್ಲಿ ಸ್ಥಾಪಿಸಿದ ಕ್ಷಿಪ್ರ ಆಹಾರ ಪರೀಕ್ಷಾ ಕಿಯೋಸ್ಕ್ಗಳಲ್ಲಿ ತಮ್ಮ ಆಹಾರ ಪದಾರ್ಥಗಳನ್ನು ಪರೀಕ್ಷಿಸಿದ್ದಾರೆ. ಈ ಮಾಲ್ಗಳಲ್ಲಿ ಹೆಚ್ಚಿನ ಜನಸಂದಣಿಯನ್ನು ಗಮನಿಸಿದರೆ ಎಫ್ಡಿಎ ಅಧಿಕಾರಿಗಳು ಇದು ಅತ್ಯಂತ ಕಡಿಮೆ ಎಂದು ಪರಿಗಣಿಸಿದ್ದಾರೆ.
ಈ ಉಪಕ್ರಮವು ಆಹಾರ ಸುರಕ್ಷತೆ ಮತ್ತು ಕಲಬೆರಕೆ ಅಪಾಯಗಳ ಕುರಿತು 16,200 ಕ್ಕೂ ಹೆಚ್ಚು ಜನರನ್ನು ತಲುಪಿದ ಜಾಗೃತಿ ಅಭಿಯಾನಗಳನ್ನು ಒಳಗೊಂಡಿದೆ.
ಸುಮಾರು 2,869 ಆಹಾರ ಮಾದರಿಗಳನ್ನು ಪರೀಕ್ಷಿಸಲು ಗ್ರಾಹಕರು ಮಾಡಿದ ಸ್ವಯಂ ಪರೀಕ್ಷೆಯು ಯಾವುದೇ ವಸ್ತುಗಳಲ್ಲಿ 'ಕಲಬೆರಕೆ ಇಲ್ಲ' ಎಂದು ತೋರಿಸಿದೆ. ಇದು ಸಕಾರಾತ್ಮಕ ಸಂಕೇತ ಎಂದು ಅಧಿಕಾರಿಗಳು ಹೇಳಿದ್ದಾರೆ.
ಆದಾಗ್ಯೂ, ಕಲಬೆರಕೆ ಇಲ್ಲದಿರುವುದು ಜನರು ಕಿಯೋಸ್ಕ್ಗಳು ಸರಿಯಾಗಿ ಕಾರ್ಯನಿರ್ವಹಿಸುತ್ತಿದೆಯೇ ಎಂದು ಪ್ರಶ್ನಿಸಲು ಕಾರಣವಾಗಬಹುದು. ಇದು ಜನರ ಭಾಗವಹಿಸುವಿಕೆಯ ಮೇಲೆ ಮತ್ತಷ್ಟು ಪರಿಣಾಮ ಬೀರುತ್ತದೆ ಎಂದು ಅವರು ತಿಳಿಸಿದ್ದಾರೆ.
ಥಣಿಸಂದ್ರದಲ್ಲಿರುವ ಎಲಿಮೆಂಟ್ಸ್ ಮಾಲ್ ಅತಿ ಹೆಚ್ಚು ಪರೀಕ್ಷಾ ಮಾದರಿಗಳನ್ನು ದಾಖಲಿಸಿದ್ದು, 1,033 ಆಹಾರಗಳನ್ನು ಪರೀಕ್ಷಿಸಲಾಗಿದ್ದು, 4,258 ಜನ ಜಾಗೃತಿ ಚಟುವಟಿಕೆಗಳಲ್ಲಿ ಭಾಗವಹಿಸಿದ್ದಾರೆ. ಇದರ ನಂತರ 359 ಮಾದರಿಗಳನ್ನು ಪರೀಕ್ಷಿಸಿದ ಮೀನಾಕ್ಷಿ ಮಾಲ್ ಮತ್ತು ಫೀನಿಕ್ಸ್ ಮಾಲ್ ಆಫ್ ಏಷ್ಯಾದಲ್ಲಿ 299 ಮಾದರಿಗಳನ್ನು ಪರೀಕ್ಷಿಸಲಾಗಿದೆ.
ಸಾರ್ವಜನಿಕರು ದೈನಂದಿನ ತಮ್ಮ ಆಹಾರ ಪದಾರ್ಥಗಳ ಗುಣಮಟ್ಟವನ್ನು ಪರಿಶೀಲಿಸಲು ಸಹಾಯ ಮಾಡಲು ಇಲಾಖೆಯು ಅಕ್ಟೋಬರ್ 24 ರಂದು ಕ್ಷಿಪ್ರ ಪರೀಕ್ಷೆಗಳು ಮತ್ತು ಮ್ಯಾಜಿಕ್ ಬಾಕ್ಸ್ನೊಂದಿಗೆ ಸುಸಜ್ಜಿತವಾದ ಈ ಕಿಯೋಸ್ಕ್ಗಳನ್ನು ಸ್ಥಾಪಿಸಿದೆ.
ತ್ವರಿತ ಪರೀಕ್ಷೆಗಳು ಸಾಮಾನ್ಯ ಕಲಬೆರಕೆಗಳನ್ನು ಪತ್ತೆಹಚ್ಚಲು ತ್ವರಿತ ರಾಸಾಯನಿಕ ಪ್ರತಿಕ್ರಿಯೆಗಳನ್ನು ಬಳಸುತ್ತೇವೆ. ಆದರೆ ಮ್ಯಾಜಿಕ್ ಬಾಕ್ಸ್ ಸ್ಥಳದಲ್ಲೇ ಆಹಾರ ಸುರಕ್ಷತಾ ಪರಿಶೀಲನೆಗಳಿಗಾಗಿ ಬಹು ಪರೀಕ್ಷಾ ಸಾಧನಗಳನ್ನು ಹೊಂದಿರುವ FSSAI-ವಿನ್ಯಾಸಗೊಳಿಸಿದ ಪೋರ್ಟಬಲ್ ಕಿಟ್ ಆಗಿದೆ ಎಂದು ಅವರು ತಿಳಿಸಿದ್ದಾರೆ.
ಮಾಲ್ಗಳಲ್ಲಿ ಈ ಸುರಕ್ಷತಾ ಕಿಟ್ಗಳೊಂದಿಗೆ, ಜನರು ದ್ವಿದಳ ಧಾನ್ಯಗಳು, ಸಕ್ಕರೆ, ಅಡುಗೆ ಎಣ್ಣೆ, ಚಹಾ ಪುಡಿ, ಉಪ್ಪು, ಹಾಲು, ತುಪ್ಪ, ಪನೀರ್ ಮತ್ತು ಬೆಣ್ಣೆಯಂತಹ ಡೈರಿ ಉತ್ಪನ್ನಗಳು ಹಾಗೂ ತರಕಾರಿಗಳು, ಕೊತ್ತಂಬರಿ ಪುಡಿ, ಕುಡಿಯುವ ನೀರು ಮತ್ತು ಇತರ ಅಗತ್ಯ ವಸ್ತುಗಳ ಗುಣಮಟ್ಟವನ್ನು ಪರೀಕ್ಷಿಸಬಹುದು. ಪರೀಕ್ಷೆಗಳನ್ನು ನಡೆಸಲು ಪ್ರತಿ ಕಿಯೋಸ್ಕ್ನಲ್ಲಿ FSSAI-ತರಬೇತಿ ಪಡೆದ ಕೆಲಸಗಾರನನ್ನು ಸಹ ನೇಮಿಸಲಾಗಿದೆ.