ಬೆಂಗಳೂರು: ಆಹಾರ ಉತ್ಪನ್ನಗಳ ಮೇಲಿನ ಜಿಎಸ್‌ಟಿಯನ್ನು ಶೇ 12 ರಿಂದ ಶೇ 5ಕ್ಕೆ ಇಳಿಸಿರುವ ಪರಿಣಾಮ ಇಂದಿನಿಂದ ತುಪ್ಪ, ಬೆಣ್ಣೆ, ಪನೀರ್‌ನಂತಹ 'ನಂದಿನಿ' ಹಾಲಿನ ಉತ್ಪನ್ನಗಳ ದರ ಇಳಿಕೆಯಾಗಿದೆ.

ಕರ್ನಾಟಕ ಹಾಲು ಒಕ್ಕೂಟ (ಕೆಎಂಎಫ್) ಡೈರಿ ಉತ್ಪನ್ನಗಳ ಮೇಲೆ ವಿಧಿಸಲಾಗುವ ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ಕಡಿತದಿಂದಾಗಿ 'ನಂದಿನಿ' ಹಾಲಿನ ಉತ್ಪನ್ನಗಳ ಪರಿಷ್ಕೃತ ಬೆಲೆಗಳನ್ನು ಘೋಷಿಸಿದೆ.

'ಭಾರತ ಸರ್ಕಾರವು ತುಪ್ಪ, ಪನ್ನೀರ್, ಚೀಸ್, ಐಸ್ ಕ್ರೀಮ್‌ಗಳು, ಚಾಕೊಲೇಟ್‌ಗಳು ಮುಂತಾದ ಅಗತ್ಯ ಆಹಾರ ಉತ್ಪನ್ನಗಳ ಮೇಲಿನ ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ)ಯನ್ನು ಕಡಿಮೆ ಮಾಡಿದೆ ಮತ್ತು ಈ ಕಡಿತವು ಸೆಪ್ಟೆಂಬರ್ 22 ರಿಂದ ಜಾರಿಗೆ ಬಂದಿದೆ. ಅದರಂತೆ, ಕರ್ನಾಟಕ ಹಾಲು ಒಕ್ಕೂಟ (ಕೆಎಂಎಫ್) 'ನಂದಿನಿ' ಹಾಲಿನ ಉತ್ಪನ್ನಗಳ ಮಾರಾಟ ಬೆಲೆಗಳನ್ನು ಪರಿಷ್ಕರಿಸಿದೆ' ಎಂದು ಅದು ಹೇಳಿದೆ.

ಪರಿಷ್ಕೃತ ಪಟ್ಟಿಯ ಪ್ರಕಾರ, ಈ ಹಿಂದೆ 650 ರೂ. ಇದ್ದ 1000 ಮಿಲಿ ತುಪ್ಪ (ಪೌಚ್) ಈಗ 610 ರೂ.ಗೆ ಲಭ್ಯವಿರುತ್ತದೆ. 305 ರೂ. ಇದ್ದ ಬೆಣ್ಣೆ (ಉಪ್ಪು ಹಾಕದ) 500 ಗ್ರಾಂ ಈಗ 286 ರೂ.ಗೆ ಲಭ್ಯವಿರುತ್ತದೆ. 425 ರೂ. ಇದ್ದ ಪನ್ನೀರ್ (1000 ಗ್ರಾಂ) ಈಗ 408 ರೂ.ಗೆ ಇಳಿದಿದೆ. 70 ರೂ. ಇದ್ದ ಗುಡ್‌ಲೈಫ್ ಹಾಲು (1000 ಮಿಲಿ) ಈಗ 68 ರೂ.ಗೆ, 530 ರೂ. ಇದ್ದ ಸಂಸ್ಕರಿಸಿದ ಚೀಸ್ (1 ಕೆಜಿ) ಈಗ 497 ರೂ.ಗೆ ಸಿಗಲಿದೆ. 480 ರೂ. ಇದ್ದ ಚೀಸ್ - ಮೊಝ್ಝಾರೆಲ್ಲಾ ಡೈಸ್ಡ್ (1 ಕೆಜಿ) ಈಗ 450 ರೂ.ಗೆ ಸಿಗುತ್ತದೆ.

ಇದಲ್ಲದೆ, 200 ರೂ. ಇದ್ದ ವೆನಿಲ್ಲಾ ಟಬ್ (1000 ಮಿಲಿ) ಐಸ್ ಕ್ರೀಮ್‌ ಈಗ 178 ರೂ.ಗೆ ಲಭ್ಯವಿರುತ್ತದೆ. 60 ರೂ. ಇದ್ದ ಸೇವರೀಸ್‌ಗಳು (180 ಗ್ರಾಂ) ಈಗ 56 ರೂ.ಗೆ, 50 ರೂ. ಇದ್ದ ಮಫಿನ್‌ಗಳು (150 ಗ್ರಾಂ) ಈಗ 45 ರೂ.ಗೆ ಲಭ್ಯವಿರುತ್ತವೆ ಎಂದು ಅದು ಹೇಳಿದೆ.