ಬೆಂಗಳೂರು: ರಾಜ್ಯಾದ್ಯಂತ ವಸತಿ ಕಟ್ಟಡಗಳಿಗೆ ಸ್ವಾಧೀನಾನುಭವ ಪ್ರಮಾಣ ಪತ್ರ (ಒ.ಸಿ) ಪ್ರಮಾಣ ಪತ್ರ ನೀಡದೆ ಶಾಶ್ವತ ವಿದ್ಯುತ್ ಸಂಪರ್ಕ ಒದಗಿಸುವ ಮೂಲಕ ರಾಜ್ಯ ಸರ್ಕಾರ ಮುಂದಿನ ಹದಿನೈದು ದಿನಗಳಲ್ಲಿ 1094. 27 ಕೋಟಿ ರೂ. ಆದಾಯ ಸಂಗ್ರಹದ ಗುರಿ ಹೊಂದಿದೆ.

ಸುಪ್ರೀಂ ಕೋರ್ಟ್ ಆದೇಶಕ್ಕೆ ವಿನಾಯಿತಿ ನೀಡುತ್ತಾ, ಸ್ವಾಧೀನಾನುಭವ ಪ್ರಮಾಣ ಪತ್ರ ಇಲ್ಲದೆ ಶಾಶ್ವತ ವಿದ್ಯುತ್ ಸಂಪರ್ಕ ಪಡೆಯಲು ಗ್ರಾಹಕರಿಗೆ 15 ದಿನಗಳ ಕಾಲಾವಕಾಶ ನೀಡುವುದಾಗಿ ಜೂನ್ 22 ರಂದು ರಾಜ್ಯ ಸರ್ಕಾರ ಘೋಷಿಸಿದೆ.

ಮೇ 15 ಅಥವಾ ಅದಕ್ಕೂ ಮುನ್ನ ಗ್ರೇಟರ್ ಬೆಂಗಳೂರು ಪ್ರಾಧಿಕಾರ ವ್ಯಾಪ್ತಿ, ಮಹಾನಗರ ಪಾಲಿಕೆಗಳು, ನಗರ ಸ್ಥಳೀಯ ಸಂಸ್ಥೆಗಳು ಹಾಗೂ ಗ್ರಾಮ ಪಂಚಾಯಿತಿ ವ್ಯಾಪ್ತಿ ಸೇರಿದಂತೆ ಇಡೀ ರಾಜ್ಯಕ್ಕೆ ಅನ್ವಯವಾಗುವಂತೆ 2,400 ಚ. ಅಡಿ (+20% ರಷ್ಟು ವಿನಾಯಿತಿಯೊಂದಿಗೆ ನಿವೇಶನಗಳಲ್ಲಿ ನಿರ್ಮಿಸಲಾಗಿರುವ ಜಿ+3 ಅಂತಸ್ತಿನ ವಸತಿ ಕಟ್ಟಡಗಳು ಅಥವಾ ಸ್ಟಿಲ್ಟ್ ಪಾರ್ಕಿಂಗ್ + 4 ಮಹಡಿಗಳನ್ನು ಹೊಂದಿರುವ ವಸತಿ ಕಟ್ಟಡಗಳಿಗೆ ಮಾತ್ರ ಒಸಿ ವಿನಾಯಿತಿ ನೀಡಲಾಗಿದೆ.

ಇಂಧನ ಇಲಾಖೆ ಹಂಚಿಕೊಂಡ ಮಾಹಿತಿಯ ಪ್ರಕಾರ, ರಾಜ್ಯಾದ್ಯಂತ ಸುಮಾರು 3.65 ಲಕ್ಷ ಗ್ರಾಹಕರು ಶಾಶ್ವತ ವಿದ್ಯುತ್ ಸಂಪರ್ಕಕ್ಕಾಗಿ ಕಾಯುತ್ತಿದ್ದಾರೆ ಏಕೆಂದರೆ ಅವರು ಅವರಿಗೆ ಸ್ವಾಧೀನಾನುಭ ಪ್ರಮಾಣ ಪತ್ರ ಸಿಕ್ಕಿಲ್ಲ. ಅವರು ತಾತ್ಕಾಲಿಕ ವಿದ್ಯುತ್ ಸಂಪರ್ಕಗಳನ್ನು ಬಳಸುತ್ತಿದ್ದಾರೆ. ಈ ಗ್ರಾಹಕರಲ್ಲಿ ಮೂರನೇ ಒಂದು ಭಾಗದಷ್ಟು ಜನರು ಬೆಂಗಳೂರು ವಿದ್ಯುತ್ ಸರಬರಾಜು ಕಂಪನಿ ಲಿಮಿಟೆಡ್ ಮಿತಿಯೊಳಗೆ ಇದ್ದಾರೆ. ಸುಪ್ರೀಂ ಕೋರ್ಟ್ ಆದೇಶಗಳನ್ನು ಅನುಸರಿಸಿ ಸರ್ಕಾರವು ಏಪ್ರಿಲ್ 4, 2025 ರಿಂದ ಅರ್ಜಿಗಳನ್ನು ಸ್ವೀಕರಿಸುವುದನ್ನು ನಿಲ್ಲಿಸಿತ್ತು.

ನಿಯಮಗಳ ಪ್ರಕಾರ, ವಿದ್ಯುತ್ ಸಂಪರ್ಕಕ್ಕಾಗಿ ಅರ್ಜಿ ಸಲ್ಲಿಸುವ ಎಲ್ಲರೂ ಸ್ಮಾರ್ಟ್ ಮೀಟರ್‌ಗಳನ್ನು ಹೊಂದಿರಬೇಕು. ಇದರಂತೆ ಸರಾಸರಿ 2-3 ಬೆಡ್ ರೂಂ, ಹಾಲ್-ಅಡುಗೆಮನೆ (BHK) ವಸತಿಗೆ ಬಳಸುವ 3 ಕಿಲೋವ್ಯಾಟ್ (KW) ವಿದ್ಯುತ್‌ಗೆ 4,988 ರೂ. ವೆಚ್ಚವಾಗುತ್ತದೆ. ಒಂದು ವೇಳೆ 5 kW ಗಿಂತ ಹೆಚ್ಚಿನ ವಿದ್ಯುತ್ ಬಳಸಿದರೆ ಮತ್ತು ಸೌರ ಫಲಕಗಳನ್ನು ಅಳವಡಿಸಿದ್ದರೆ, ಅವರು ಮೂರು-ಹಂತದ ಸ್ಮಾರ್ಟ್ ಮೀಟರ್ ಅನ್ನು ಸ್ಥಾಪಿಸಬೇಕಾಗುತ್ತದೆ, ಇದರ ಬೆಲೆ 9,880 ರೂ..

ವಿದ್ಯುತ್ ಸರಬರಾಜು ಕಂಪನಿಗಳು (escoms) ಸ್ಮಾರ್ಟ್ ಮೀಟರ್‌ಗಳ ಸ್ಥಾಪನೆ ಮತ್ತು ನಿರ್ವಹಣೆಗೆ ಶುಲ್ಕವಾಗಿ 820 ರೂ.ಗಳನ್ನು ಸಹ ತೆಗೆದುಕೊಳ್ಳುತ್ತವೆ ಎಂದು ಇಂಧನ ಇಲಾಖೆ ಅಧಿಕಾರಿ ಹೇಳಿದರು.

ಗ್ರಾಹಕರು ಠೇವಣಿಯಾಗಿ 13,500 ರೂ.ಗಳನ್ನು ಪಾವತಿಸಬೇಕಾಗುತ್ತದೆ, ಇದರಲ್ಲಿ ಸರಾಸರಿ ಎರಡು ತಿಂಗಳ ಬಿಲ್ ಮುಂಗಡವಾಗಿ ಸೇರಿರುತ್ತದೆ. ಅಲ್ಲದೇ ಅವರು, ಲೈನ್ ಸೇವಾ ಶುಲ್ಕವಾಗಿ 10,500 ರೂ.ಗಳನ್ನು ಸಹ ಪಾವತಿಸಬೇಕಾಗುತ್ತದೆ. ಇದು escoms ಒದಗಿಸುವ ವಿದ್ಯುತ್ ಮೂಲಸೌಕರ್ಯವನ್ನು (ಕೇಬಲ್‌ಗಳು, ಕಂಡಕ್ಟರ್ ಮತ್ತು ಟ್ರಾನ್ಸ್‌ಫಾರ್ಮರ್ ಬಳಕೆಯ ಶುಲ್ಕಗಳು) ಒಳಗೊಂಡಿದೆ. 20% ರಷ್ಟು ವಿನಾಯಿತಿಯೊಂದಿಗೆ 2,400 ಚದರ ಅಡಿ ಜಾಗವು 2,888 ಚದರ ಅಡಿಗಳಷ್ಟು ಅಳತೆ ಹೊಂದಿದ್ದು, ಇದು ಸುಮಾರು 5-6 ಯೂನಿಟ್ ಗಳನ್ನು ಹೊಂದಿರುತ್ತದೆ. ಆದ್ದರಿಂದ ಪ್ರತಿ ಕಟ್ಟಡಕ್ಕೂ ಸಮಾನ ಸಂಖ್ಯೆಯ ಸ್ಮಾರ್ಟ್ ಮೀಟರ್‌ಗಳು ಬೇಕಾಗುತ್ತವೆ.

ಗ್ರಾಹಕರು ತಾತ್ಕಾಲಿಕ ವಿದ್ಯುತ್ ಸಂಪರ್ಕಗಳನ್ನು ಬಳಸುತ್ತಿದ್ದರೂ ಶಾಶ್ವತ ವಿದ್ಯುತ್ ಸಂಪರ್ಕಕ್ಕಾಗಿ ಅವರು ಹೊಸ ಫಾರ್ಮ್ ಅನ್ನು ತೆಗೆದುಕೊಳ್ಳಬೇಕಾಗುತ್ತದೆ, ಇದರ ಬೆಲೆ 100 ರೂ. ಎಂದು ಅಧಿಕಾರಿ ಹೇಳಿದರು. ವೆಚ್ಚವು ಸರ್ಕಾರಕ್ಕೆ ಕೇವಲ ಒಂದು ಬಾರಿಯ ಗಳಿಕೆಯಲ್ಲ, ಆದರೆ ರಾಜ್ಯದಲ್ಲಿ ವಿದ್ಯುತ್ ಮೂಲಸೌಕರ್ಯವನ್ನು ಸುಧಾರಿಸಲು ಬಳಸಲಾಗುವ ಮೊತ್ತವಾಗಿದೆ. ಇವು ಗ್ರಾಹಕರು ಸೇವೆಗಳಿಗೆ ಪಾವತಿಸಬೇಕಾದ ಅಗತ್ಯ ಶುಲ್ಕಗಳಾಗಿವೆ" ಎಂದು ಅಧಿಕಾರಿ ಹೇಳಿದರು.