ಬೆಂಗಳೂರು: ಕೆಪಿಎಸ್‌ಸಿ 1998ನೇ ಸಾಲಿನ ಎ ಮತ್ತು ಬಿ ವೃಂದದ ಪ್ರೊಬೇಷನರಿ ಹುದ್ದೆಗಳಿಗೆ ಸಂಬಂಧಿಸಿದಂತೆ ಸತ್ಯ ಶೋಧನಾ ಸಮಿತಿ ಸಲ್ಲಿಸಿರುವ ವರದಿಯನ್ನು 24 ಗಂಟೆಯೊಳಗೆ ವೆಬ್‌ಸೈಟ್‌ನಲ್ಲಿ ಪ್ರಕಟಿಸುವಂತೆ ಸರ್ಕಾರಕ್ಕೆ ಹೈಕೋರ್ಟ್ ಮಂಗಳವಾರ ಆದೇಶಿಸಿದೆ.
1998, 1999 ಮತ್ತು 2004ರ ಅಕ್ರಮ ನೇಮಕ ಕುರಿತು ಖಲೀಲ್ ಅಹ್ಮದ್ ಮತ್ತು ಇತರರು ಸಲ್ಲಿಸಿದ್ದ ಅರ್ಜಿ ವಿಚಾರಣೆ ವೇಳೆ ನ್ಯಾ.ಎನ್.ಕುಮಾರ್ ಮತ್ತು ನ್ಯಾ.ಬಿ.ಮನೋಹರ ಅವರ ವಿಭಾಗೀಯ ಪೀಠ ಈ ಆದೇಶ ನೀಡಿದೆ.
1998ನೇ ಸಾಲಿನ ನೇಮಕದ ವೇಳೆ ವ್ಯಕ್ತಿತ್ವ ಪರೀಕ್ಷೆಯ ಪಟ್ಟಿಯಲ್ಲಿ ಕಾಣಿಸಿಕೊಂಡಿದ್ದ 97 ಮಂದಿಯ ಹೆಸರುಗಳು ಹೊಸ ಪಟ್ಟಿಯಲ್ಲಿ ಇರಲಿಲ್ಲ. ಹೊಸ ಪಟ್ಟಿಯಲ್ಲಿ 94 ಮಂದಿಗೆ ಹೊಸದಾಗಿ ಸಂದರ್ಶನ ನಡೆಸಿದ್ದ ಕೆಪಿಎಸ್‌ಸಿ, ವರದಿಯನ್ನು ಮುಚ್ಚಿದ ಲಕೋಟೆಯಲ್ಲಿ ಹೈಕೋರ್ಟ್‌ಗೆ ಸಲ್ಲಿಸಿತ್ತು. ಸೋಮವಾರ ಲಕೋಟೆಯನ್ನು ತೆರೆದ ನ್ಯಾಯಪೀಠ ವರದಿಯನ್ನು ಪರಿಶೀಲಿಸಿತ್ತು.
'ಎ' ಶ್ರೇಣಿಯ ಹುದ್ದೆಗಳಿಗೆ ಆಯ್ಕೆಯಾದವರು 'ಬಿ' ಶ್ರೇಣಿಯ ಹುದ್ದೆಗೆ ಕುಸಿಯಬಹುದು. 'ಬಿ' ಶ್ರೇಣಿ ಹುದ್ದೆಗಳಿಗೆ ಆಯ್ಕೆಯಾದವರು 'ಎ' ಶ್ರೇಣಿಯ ಹುದ್ದೆಗಳಿಗೆ ಹೋಗಬಹುದು. ಇನ್ನು ಕೆಲವರು ಪಟ್ಟಿಯಿಂದಲೇ ಹೊರಗುಳಿಯಬಹುದು. ಅಲ್ಲದೇ ಸಮಾನಾಂತರ ಶ್ರೇಣಿಯ ಸೇವೆಯಲ್ಲಿ ಬದಲಾವಣೆಯಾಗಬಹುದು ಎಂದು ವರದಿಯಲ್ಲಿ ತಿಳಿಸಲಾಗಿದೆ ಎಂದು ಪೀಠ ತನ್ನ ಆದೇಶದಲ್ಲಿ ಉಲ್ಲೇಖಿಸಿದೆ.