ರಾಂಚಿ: ವಾಮಚಾರ ಮಾಡುತ್ತಾರೆ ಎಂದು ಅನುಮಾನಗೊಂಡ ಗ್ರಾಮಸ್ಥರು ಐವರು ಮಹಿಳೆಯರನ್ನು ಹತ್ಯೆ ಮಾಡಿರುವ ಘಟನೆ ಶನಿವಾರ ವರದಿಯಾಗಿದೆ.

ರಾಂಚಿ ಜಿಲ್ಲೆಯ ಕಂಜಿಯಾ ಹಳ್ಳಿಯಲ್ಲಿ ಈ ಘಟನೆ ನಡೆದಿದ್ದು, ಐವರು ಮಹಿಳೆಯರು ವಾಮಚಾರದಲ್ಲಿ ತೊಡಗಿದ್ದಾರೆ ಎಂಬ ಶಂಕೆಯಿಂದ ಗ್ರಾಮಸ್ಥರು ಮಧ್ಯರಾತ್ರಿಯಲ್ಲಿ ಕೋಲು ಮತ್ತು ಹರಿತ ವಸ್ತುಗಳಿಂದ ಒಡೆದು ಹತ್ಯೆ ಮಾಡಿದ್ದಾರೆ ಎಂದು ಪೊಲೀಸ್ ಅಧಿಕಾರಿ ರಾಜ್ ಕುಮಾರ್ ಲಕ್ರಾ ತಿಳಿಸಿದ್ದಾರೆ.

2013ರಲ್ಲಿ 160 ಕೊಲೆ ಪ್ರಕರಣಗಳು ದಾಖಲಾಗಿದ್ದು, ಅದರಲ್ಲಿ 54 ಪ್ರಕರಣಗಳು ವಾಮಚಾರದಲ್ಲಿ ತೊಡಗಿದ್ದ ಮಹಿಳೆಯರ ಕೊಲೆ ಪ್ರಕರಣಗಳಾಗಿವೆ. ಜಾರ್ಖಾಂಡ್ ನಲ್ಲಿ 2001ರಿಂದ ಈವರೆಗೆ ವಾಮಚಾರದಲ್ಲಿ ತೊಡಗಿದಂತಹ 400 ಮಹಿಳೆಯರನ್ನು ಹತ್ಯೆ ಮಾಡಲಾಗಿದೆ.

ದೇಶದಲ್ಲಿ 2000ರಿಂದ 2012ರವರೆಗೆ ಸುಮಾರು 2,097 ಮಹಿಳೆಯರನ್ನು ಕೊಲೆ ಮಾಡಲಾಗಿದೆ ಎಂದು ರಾಷ್ಟ್ರೀಯ ಅಪರಾಧ ದಳದ ದಾಖಲೆಗಳು ಹೇಳುತ್ತಿವೆ.
ಘಟನೆ ಬಗ್ಗೆ ಜಾರ್ಖಾಂಡ್ ಮುಖ್ಯಮಂತ್ರಿ ರಘುಬಾರ್ ದಾಸ್ ಖಂಡನೆ ವ್ಯಕ್ತಪಡಿಸಿದ್ದು, ಅನಾಗರಿಕತೆಯಿಂದ ಇಂತಹ ಘಟನೆಗಳು ಹೆಚ್ಚಾಗುತ್ತಿದೆ ಎಂದು ವಿಷಾಧಿಸಿದ್ದಾರೆ.