ಜಕಾರ್ತ: ಕಳೆದವಾರ ದುರಂತಕ್ಕೀಡಾಗಿದ್ದ ಏರ್ ಏಷ್ಯಾ ವಿಮಾನದ ಶೋಧ ಕಾರ್ಯಾಚರಣೆ ಕೈಗೊಂಡಿರುವ ತಂಡಕ್ಕೆ ಸಮುದ್ರದಲ್ಲಿ ವಿಮಾನವನ್ನು ಹೋಲುವ ದೊಡ್ಡ ವಸ್ತುವೊಂದು ಕಂಡುಬಂದಿದೆ.

ಮೂಲಗಳ ಪ್ರಕಾರ ಇಂಡೋನೇಷ್ಯಾ ಸರ್ಕಾರ ಶೋಧಕ್ಕಾಗಿ ಗುರುತು ಮಾಡಿಕೊಂಡಿರುವ ಸಮುದ್ರ ಪ್ರದೇಶದಲ್ಲಿಯೇ ಈ ಶಂಕಿತ ವಸ್ತು ಕಂಡಬಂದಿದ್ದು, ಶೋಧ ಕಾರ್ಯದಲ್ಲಿ ತೊಡಗಿರುವ ಅತ್ಯಾಧುನಿಕ ವಿಮಾನ ಈ ವಸ್ತುವನ್ನು ಪತ್ತೆ ಹಚ್ಚಿದೆ. ಪ್ರಸ್ತುತ ಸ್ಥಳಕ್ಕೆ ನೌಕಾಪಡೆಯ 9 ಹಡಗುಗಳನ್ನು ರವಾನೆ ಮಾಡಲಾಗಿದ್ದು, ಪ್ರಸ್ತುತ ದೊರೆತಿರುವ ವಸ್ತು ವಿಮಾನದ ಅವಶೇಷವೇ ಆಗಿದ್ದರೆ ಈ ವರೆಗೂ ದೊರೆತಿರುವ ವಿಮಾನದ ಅವಶೇಷಗಳ ಸಂಖ್ಯೆ ಐದಕ್ಕೆ ಏರುತ್ತದೆ.

ಪ್ರಸ್ತುತ ಸಮುದ್ರದಲ್ಲಿ ಗೋಚರಿಸಿರುವ ಶಂಕಿತ ವಸ್ತು ಸುಮಾರು 9.8 ಮೀ.ಉದ್ದವಿದ್ದು, 1.1 ಮೀ. ಅಗಲವಿದೆ. ಬಹುತೇಕ ಇದು ವಿಮಾನವನ್ನು ಹೋಲುತ್ತಿದ್ದು, ನಾಪತ್ತೆಯಾದ ಏರ್ ಏಷ್ಯಾ ಸಂಸ್ಥೆಯ A320-200 ವಿಮಾನದ ಅವಶೇಷವಾಗಿರಬಹುದು ಎಂದು ಶಂಕಿಸಲಾಗುತ್ತಿದೆ.

ಕಳೆದ ಡಿಸೆಂಬರ್ 28ರಂದು ಸೊರಬಯ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಸಿಂಗಾಪುರದೆಡೆಗೆ ಟೇಕ್ ಆಫ್ ಅಗಿದ್ದ A320-200 ವಿಮಾನ, ಕೆಲ ಗಂಟೆಗಳಲ್ಲೇ ವಾಯುಸಂಚಾರ ಗೋಪುರದ ಸಂಪರ್ಕವನ್ನು ಕಡಿದುಕೊಂಡಿತ್ತು.

ಬಳಿಕ ಕಳೆದ ಮಂಗಳವಾರ ವಿಮಾನದ ಅವಶೇಷ ಪತ್ತೆಯಾಗಿದ್ದು, ವಿಮಾನದಲ್ಲಿದ್ದ ಎಲ್ಲ ಪ್ರಯಾಣಿಕರು ಸಾವಿಗೀಡಾಗಿರುವ ಶಂಕೆ ವ್ಯಕ್ತವಾಗಿದೆ. ಇನ್ನೂ ಈ ವರೆಗೂ ನಡೆದ ಶೋಧ ಕಾರ್ಯದಲ್ಲಿ ಸುಮಾರು 31 ಪ್ರಯಾಣಿಕರ ಮೃತದೇಹಳಗನ್ನು ವಶಪಡಿಸಿಕೊಳ್ಳಲಾಗಿದ್ದು, ಉಳಿದ ಪ್ರಯಾಣಿಕರ ಮೃತ ದೇಹ ಮತ್ತು ವಿಮಾನದ ಅವಶೇಷಗಳಿಗಾಗಿ ಸಮುದ್ರದಲ್ಲಿ ತೀವ್ರ ಶೋಧ ನಡೆಸಲಾಗುತ್ತಿದೆ.