ಬೆಂಗಳೂರು: ಜಯಲಲಿತಾ ಬಳಿ ಇರುವ ಬೆಳ್ಳಿ 1,116 ಕೆ.ಜಿ.ಯಲ್ಲ. ಬದಲಾಗಿ 1,250 ಕೆ.ಜಿ!

ಹೀಗಂತ ಅಕ್ರಮ ಆಸ್ತಿ ಗಳಿಕೆ ಪ್ರಕರಣದ ಮೇಲ್ಮನವಿ ಅರ್ಜಿ ವಿಚಾರಣೆಗೆ ಸಂಬಂಧಿಸಿದಂತೆ ಜಯಲಲಿತಾ ಪರವಾದ ಮಂಡಿಸುತ್ತಿರುವ ವಕೀಲ ಎಲ್. ನಾಗೇಶ್ವರರಾವ್ ಅವರೇ ನ್ಯಾಯಾಲಯಕ್ಕೆ ತಿಳಿಸಿದ್ದಾರೆ.

ತಮಿಳುನಾಡಿನ ವಿಚಕ್ಷಣಾ ಮತ್ತು ಭ್ರಷ್ಟಾಚಾರ ನಿಗ್ರಹ ದಳ(ಡಿವಿಎಸಿ) ನೀಡಿದ ಮಾಹಿತಿಗಿಂತಲೂ ಅವರ ಬಳಿ ಹೆಚ್ಚಿನ ಬೆಳ್ಳಿ ವಡವೆಗಳಿವೆ ಎಂಬುದನ್ನು ಇವರೇ ಬಹಿರಂಗಪಡಿಸಿದ್ದು, ಬಹುತೇಕ ಉಡುಗೊರೆ ರೂಪದಲ್ಲಿ ಬಂದಿದ್ದು ಎಂದು ಹೇಳಿದ್ದಾರೆ.

ತಮಿಳುನಾಡಿನ ಜನರು ತಮ್ಮಿಷ್ಟದ ನಾಯಕರಿಗೆ ಉಡುಗೊರೆ ನೀಡುವುದು ಸಾಮಾನ್ಯ. ಜಯಾಗೂ ಸುಮಾರು ರು.1.5 ಕೋಟಿ ನಗದು ಉಡುಗೊರೆ ರೂಪದಲ್ಲಿ ಬಂದಿದೆ ಎಂದರು.

ಅಲ್ಲದೇ ಅವರ ಬಳಿ ಇರುವ ಆಸ್ತಿ ಹಾಗೂ ಆದಾಯಕ್ಕೆ ಸಂಬಂಧಿಸಿದಂತೆ ಸಮಯಕ್ಕೆ ಸರಿಯಾಗಿ ತೆರಿಗೆ ಪಾವತಿಸುತ್ತಿದ್ದು, ಡಿವಿವಿಸಿ ನೀಡಿರುವ ಮಾಹಿತಿ ಸತ್ಯಕ್ಕೆ ದೂರವಾಗಿದೆ ಎಂದು ವಾದ ಮಂಡಿಸಿದರು. ವಿಶೇಷ ನ್ಯಾಯಪೀಠದ ನ್ಯಾ.ಸಿ.ಆರ್.ಕುಮಾರಸ್ವಾಮಿ ಅವರ ಏಕಸದಸ್ಯ ಪೀಠ, ವಿಚಾರಣೆಯನ್ನು ಬುಧವಾರಕ್ಕೆ ಮುಂದೂಡಿತು.