ಜಮ್ಮು: 2014ರಲ್ಲಿ  ಜಮ್ಮು ಮತ್ತು ಕಾಶ್ಮೀರದಲ್ಲಿ ಸಂಭವಿಸಿದ ಭೀಕರ ಪ್ರವಾಹದಿಂದ ಎಲ್ಲವನ್ನೂ ಕಳೆದುಕೊಂಡು ಸಂಕಷ್ಟದಲ್ಲಿರುವ ರೈತರ ಗಾಯದ ಮೇಲೆ ಉಪ್ಪು ಸುರಿದಂತಾಗಿದೆ.  ಬೆಳೆ ಹಾನಿಗೊಂಡ ಜಮ್ಮುವಿನ ಸಾರೋರಾ ಗ್ರಾಮದ ರೈತರಿಗೆ ಸರ್ಕಾರ 32 ರುಪಾಯಿ ಪರಿಹಾರದ ಚೆಕ್ ನೀಡಿದೆ. ಇದಕ್ಕಿಂತ ಹೆಚ್ಚಿನ ಮೊತ್ತದ ಪರಿಹಾರವೆಂದರೆ ಅದು 113 ರುಪಾಯಿ!

ಪರಿಹಾರದ ಮೊತ್ತ ನೋಡಿ ತೀವ್ರ ಆಕ್ರೋಶ ವ್ಯಕ್ತಪಡಿಸಿರುವ  ರೈತರು,  ಜಮ್ಮು ಮತ್ತು ಕಾಶ್ಮೀರದ ಬಿಜೆಪಿ, ಪಿಡಿಪಿ ಮೈತ್ರಿಕೂಟದ ಸರ್ಕಾರ 'ನಮ್ಮ ಗಾಯದ ಮೇಲೆ ಉಪ್ಪು ಸುರಿದಿದೆ' ಎಂದಿದ್ದಾರೆ.

ಕಳೆದ 2014ರಲ್ಲಿ ಸಂಭವಿಸಿದ ಭೀಕರ ಪ್ರವಾಹದ ನಂತರ ಕೃಷಿ ಇಲಾಖೆ ಹಾಗೂ ಕಂದಾಯ ಇಲಾಖೆ ಜಂಟಿಯಾಗಿ ಸಮೀಕ್ಷೆ ನಡೆಸಿ ಈ ಭಾಗದ ರೈತರಿಗೆ ಪರಿಹಾರ ನೀಡಲಾಗಿದೆ. ಪರಿಹಾರದ ಮೊತ್ತ  ಕೇವಲ 32 ರುಪಾಯಿಂದ 113 ರುಪಾಯಿವರೆಗೆ ಮಾತ್ರ ಇದೆ.

ಕನಿಷ್ಠ 32 ರುಪಾಯಿ ಹಾಗೂ ಗರಿಷ್ಠ 113 ರುಪಾಯಿ ಬೆಳೆ ಪರಿಹಾರ ನೀಡಲಾಗಿದೆ ಎಂದು ಸಾರೋರಾ ಗ್ರಾಮದ ರೈತ ಬಲ್ಬಿರ್ ಸಿಂಗ್ ಸೈನಿ ತಿಳಿಸಿದ್ದಾರೆ.

ನಾವು ಸರ್ಕಾರದ ಪರಿಹಾರಕ್ಕಾಗಿ ಕಾಯುತ್ತಿದ್ದೇವು. ಆದರೆ ನಮಗೆ ಬಂದ ಪರಿಹಾರದ ಮೊತ್ತ 47, 50, 94, 92 ರೂಪಾಯಿಯದ್ದಾಗಿದೆ. ಇದೇನು ತಮಾಷೆಯಾ? ನಾವು 30 ಸಾವಿರ ರುಪಾಯಿಯಷ್ಟು ನಷ್ಟ ಹೊಂದಿದ್ದರೆ, ನಮಗೆ ಇವರು 32 ರುಯಿ ಪರಿಹಾರ ಕೊಟ್ಟಿದ್ದಾರೆ. ಇದು ಯಾವ ರೀತಿಯ ಪರಿಹಾರ ಎಂದು ರೈತರು ಪ್ರಶ್ನಿಸಿದ್ದಾರೆ.

ಇನ್ನು ಜಮ್ಮು ಮತ್ತು ಕಾಶ್ಮೀರ ಸರ್ಕಾರದ ಅವೈಜ್ಞಾನಿಕ ಪರಿಹಾರದ ವಿರುದ್ಧ ವಾಗ್ದಾಳಿ ನಡೆಸಿರುವ ಜಮ್ಮು ಮತ್ತು ಕಾಶ್ಮೀರದ ಮಾಜಿ ಮುಖ್ಯಮಂತ್ರಿ ಒಮರ್ ಅಬ್ದುಲ್ಲಾ  ಅವರು, ಮುಫ್ತಿ ಮತ್ತು ಮೋದಿಗೆ ಅಧಿಕಾರ ಮಾತ್ರ ಮುಖ್ಯ, ರೈತರ ಏಳಿಗೆ ಅಲ್ಲ ಎಂಬುದು ಇದರಿಂದ ಸಾಬೀತಾಗಿದೆ ಎಂದು ಟ್ವೀಟ್ ಮಾಡಿದ್ದಾರೆ.