ನವದೆಹಲಿ: ``ಜವಾಹರ್‍ಲಾಲ್ ನೆಹರೂ ವಿಶ್ವವಿದ್ಯಾಲ ಯ(ಜೆಎನ್‍ಯು)ವು ಭಾರತ-ವಿರೋಧಿ ಶಕ್ತಿಗಳಿಗೆ ನೆಲೆ ನೀಡುತ್ತಿದೆ. ಇಲ್ಲಿ ಆಗಾಗ ದೇಶ ವಿರೋಧಿ ಚಟುವಟಿಕೆಗಳನ್ನು ಆಯೋಜಿಸಲಾಗುತ್ತದೆ.'' ಜೆಎನ್‍ಯು ವಿರುದ್ಧ ಇಂತಹುದೊಂದು ಗಂಭೀರ ಆರೋಪ ಹೊರಿಸಿದ್ದು ರಾಷ್ಟ್ರೀಯ ಸ್ವಯಂಸೇವಕ ಸಂಘ(ಆರೆಸ್ಸೆಸ್). 

ತನ್ನ ಮುಖವಾಣಿ ಪಾಂಚಜನ್ಯದ ಲೇಖನದಲ್ಲಿ ಈ ಆರೋಪ ಮಾಡಿರುವ ಆರೆಸ್ಸೆಸ್, 2010ರಲ್ಲಿ ದಂತೇವಾಡ ದಲ್ಲಿ 75 ಮಂದಿ ಸಿಆರ್ ಪಿಎಫ್ ಯೋಧರ ಸಾವನ್ನು ವಿಶ್ವವಿದ್ಯಾಲಯದ ನಕ್ಸಲ್ ಪರ ವಿದ್ಯಾರ್ಥಿ ಸಂಘಟನೆಗಳು ಸಂಭ್ರಮಿಸಿದ್ದರು ಎಂದು ಹೇಳಿದೆ. ``ಜೆಎನ್‍ಯುನಲ್ಲಿ ರಾಷ್ಟ್ರೀಯವಾದವನ್ನು ಅಪರಾಧ ಎಂದು ಪರಿಗಣಿಸಲಾಗುತ್ತದೆ.

ಭಾರತೀಯ ಸಂಸ್ಕೃತಿಯನ್ನು ಕೆಟ್ಟದಾಗಿ ಚಿತ್ರಿಸಲಾಗುತ್ತದೆ. ಕಾಶ್ಮೀರದಿಂದ ಸೇನೆಯನ್ನು ವಾಪಸ್ ಕರೆಸಿದ್ದನ್ನು ಬೆಂಬಲಿಸಲಾಗುತ್ತದೆ. ಒಟ್ಟಿನಲ್ಲಿ ಭಾರತದ ಸಮಗ್ರತೆಹಾಳು ಮಾಡುವುದೇ ಇವರ ಉದ್ದೇಶ'' ಎಂದು ಆರೋಪಿಸಲಾಗಿದೆ. 

ಆರೆಸ್ಸೆಸ್ ಹೇಳಿಕೆಗೆ ಖಂಡನೆ: ಆರೆಸ್ಸೆಸ್ ಆರೋಪಕ್ಕೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿರುವ ಜೆಎನ್‍ಯು, ಇದು ಪ್ರತಿಗಾಮಿ ಹೇಳಿಕೆ ಎಂದಿದೆ. ಎನ್‍ಇಟಿಯೇತರ ಫೆಲೋಶಿಪ್ ರದ್ದುಗೊಳಿಸುವ ಸರ್ಕಾರದ ನಿರ್ಧಾರದ ವಿರುದ್ಧ ರಾಷ್ಟ್ರಮಟ್ಟದಚಳವಳಿಗೆ ವಿದ್ಯಾರ್ಥಿಗಳು ಮುಂದಾಗಿರುವಾಗಲೇ ಆರೆಸ್ಸೆಸ್ ಇಂತಹ ಆರೋಪ ಮಾಡಿರುವುದು ಅದರ ಉದ್ದೇಶವನ್ನು ತಿಳಿಸುತ್ತದೆ ಎಂದೂ ಹೇಳಿದೆ ವಿದ್ಯಾರ್ಥಿ ಸಂಘಟನೆ.