ನವದೆಹಲಿ: ಆಕಸ್ಮಿಕವಾಗಿ ಪಾಕಿಸ್ತಾನ ತಲುಪಿದ್ದ ಗೀತಾ 15 ವರ್ಷಗಳ ನಂತರ ಭಾರತಕ್ಕೆ ವಾಪಸ್ಸಾಗಿರುವ ಬೆನ್ನಲ್ಲೇ ರಂಜಾನ್ ಎಂಬ ಪಾಕಿಸ್ತಾನದ ಯುವಕನೊಬ್ಬ ಭಾರತದಲ್ಲಿರುವ ಪ್ರಕರಣ ಬಹಿರಂಗವಾಗಿದೆ.
ಗೀತಾ ಭಾರತಕ್ಕೆ ವಾಪಸ್ಸಾಗುತ್ತಿದ್ದಂತೆಯೇ ರಂಜಾನ್ ಎಂಬ ಪಾಕಿಸ್ತಾನ ಯುವಕನಲ್ಲೂ ತವರಿಗೆ ವಾಪಸ್ ತೆರಳುವ ಭರವಸೆ ಮೂಡಿದೆ. ಪ್ರಧಾನಿ ಕಾರ್ಯಾಲಯದ ಮಾಹಿತಿ ಪ್ರಕಾರ, ಭಾರತ ಸರ್ಕಾರ ರಂಜಾನ್ ಪ್ರಕರಣದ ಬಗ್ಗೆ ಮರು ನಿರ್ಣಯ ಕೈಗೊಳ್ಳಲಿದ್ದು,  ವಾಪಸ್ ಕಳಿಸುವ ಬಗ್ಗೆ ಚಿಂತನೆ ನಡೆಸಿದೆ.
15 ವರ್ಷದ ಮೊಹಮ್ಮದ್ ರಂಜಾನ್, ನಾಲ್ಕು ವರ್ಷಗಳ ಹಿಂದೆ ಬಾಂಗ್ಲಾ ದೇಶದಿಂದ ಭಾರತಕ್ಕೆ ಆಕಸ್ಮಿಕವಾಗಿ ಬಂದಿದ್ದ. ತಂದೆ ಹಾಗೂ ಮಲತಾಯಿ ನೀಡುತ್ತಿದ್ದ ಕಿರುಕುಳ ತಾಳಲಾರದೇ ಮೊಹಮ್ಮದ್ ರಂಜಾನ್ ಭಾರತಕ್ಕೆ ಬಂದಿದ್ದ ಎನ್ನಲಾಗಿದೆ.
ರಂಜಾನ್ ನ ತಂದೆ ಬಾಂಗ್ಲಾ ದೇಶದಿಂದ ಪಾಕಿಸ್ತಾನಕ್ಕೆ ವಲಸೆ ಹೋಗಿರುವ ಬಗ್ಗೆ ಮಾಹಿತಿ ದೊರೆತಿದೆ. ಪಾಕಿಸ್ತಾನಕ್ಕೆ ಸೇರಿದ ಯುವಕನನ್ನು 2013 ರಲ್ಲಿ ಬಂಧಿಸಲಾಗಿತ್ತು. ಗೀತಾ ಪ್ರಕರಣದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ಅನ್ಸರ್ ಬರ್ನಿ ಅವರು ರಂಜಾನ್ ಬಿಡುಗಡೆಗೂ ಒತ್ತಾಯಿಸುತ್ತಿದ್ದಾರೆ.  
ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ  ಪ್ರಧಾನಿ ಕಾರ್ಯಾಲಯದ ಸಲಹೆಗಾರ ಅಶುತೋಷ್ ಶುಕ್ಲಾ ರಂಜಾನ್ ಗೆ ಸಂಬಂಧಿಸಿದ ದಾಖಲೆಗಳನ್ನು ರಾಷ್ಟ್ರಪತಿಗಳಿಗೆ ಕಳಿಸಿರುವುದಾಗಿ ಹೇಳಿದ್ದಾರೆ.