ದುಬೈ: ಪತಿ ಪತ್ನಿ ನಡುವೆ ಜಗಳ ಬರುವುದು ಸಾಮಾನ್ಯ. ಕೆಲವೊಮ್ಮೆ ಇಂತಹ ಜಗಳಗಳು ದಂಪತಿಗಳ ಜೀವನವನ್ನು ನಾಶ ಮಾಡಬಲ್ಲವು. ಎಷ್ಟೋ ಪ್ರಕರಣಗಳಲ್ಲಿ ಕ್ಷುಲ್ಲಕ ಕಾರಣಕ್ಕೆ ವಿಚ್ಛೇದನ ಪಡೆದಿರುವ ದಂಪತಿಗಳ ಘಟನೆಗಳು ಇಂದು ನಮ್ಮ ಕಣ್ಣ ಮುಂದೆ ಕಾಣಸಿಗುತ್ತವೆ. ಇಂತಹ ಪ್ರಕರಣಗಳಿಗೆ ಉದಾಹರಣೆಯೆನ್ನುವಂತೆ ಸೌದಿ ಮೂಲದ ಪತಿಯೊಬ್ಬ ತನ್ನ ಪತ್ನಿ ಟಿ.ವಿ ಮುಂದೆ ಕುಣಿಯುತ್ತಾಳೆನ್ನುವ ಕಾರಣಕ್ಕೆ ವಿಚ್ಛೇದನ ನೀಡಿದ್ದಾನೆ.
ಸೌದಿ ಮೂಲದ ಅರಬ್ ನಿವಾಸಿಯಾಗಿರುವ ಪತಿಗೆ ಧಾರ್ಮಿಕ ಕಾರ್ಯಕ್ರಮಗಳನ್ನು ಪ್ರಸಾರ ಮಾಡುವ ವಾಹಿನಿಗಳೆಂದರೆ ಬಹಳ ಇಷ್ಟವಂತೆ. ಪತ್ನಿ ಸಹ ಧಾರ್ಮಿಕ ವಾಹಿನಿಗಳನ್ನೇ ವೀಕ್ಷಿಸಬೇಕೆನ್ನುವುದು ಆತನ ಇಚ್ಛೆಯಂತೆ. ಆದರೆ, ಈತನಿಗೆ ತದ್ವಿರುದ್ಧ ಆತನ ಪತ್ನಿ. ಆಕೆಗೆ ಸಂಗೀತ ಕಾರ್ಯಕ್ರಮಗಳೆಂದರೆ ಅತಿಯಾದ ಪ್ರೀತಿ.
ಹೀಗಾಗಿ ಪತಿ ಮನೆಯಿಂದ ಹೊರ ಹೋಗುತ್ತಿದ್ದಂತೆ ಸಂಗೀತವನ್ನಾಲಿಸುತ್ತದ್ದಳಲ್ಲದೇ, ಗಂಡನಿಗೆ ಕಾಣದಂತೆ ತನಗೆ ಇಷ್ಟವಾಗುವ ವಾಹಿನಿಗಳನ್ನು ವೀಕ್ಷಿಸುತ್ತಿದ್ದಳಂತೆ. ಒಂದು ದಿನ ಆಕೆಯ ಪತಿರಾಯ ಇದ್ದಕ್ಕಿದ್ದಂತೆ ಸಮಯಕ್ಕೆ ಮೊದಲೇ ಮನೆಗೆ ಬಂದಿದ್ದಾನೆ. ಈ ವೇಳೆ ಪತ್ನಿ ಟಿ.ವಿಯಲ್ಲಿ ಬರುತ್ತಿದ್ದ ಸಂಗೀತವನ್ನು ಕೇಳಿಕೊಂಡು ಡ್ಯಾನ್ಸ್ ಮಾಡುತ್ತಿದ್ದನ್ನು ನೋಡಿದ್ದಾನೆ. ಇದರಿಂದ ಕೋಪಗ್ರಸ್ಥನಾದ ಆತ ಇದ್ದಕ್ಕಿದ್ದಂತೆ ಪತ್ನಿಗೆ ವಿಚ್ಛೇದನ ನೀಡಲು ತೀರ್ಮಾನಿಸಿ ಬಿಟ್ಟಿದ್ದಾನೆ.
ಪತ್ನಿ ಸಾಕಷ್ಟು ಬಾರಿ ಕೇಳಿಕೊಂಡರು ಅದಾವುದಕ್ಕೂ ಕಿವಿಗೊಡದೇ ವಿಚ್ಛೇದನ ತೀರ್ಮಾನವನ್ನು ಹಿಂಪಡೆಯದ ಈತ ತನ್ನ ಪತ್ನಿ ಕ್ಷಮಿಸಲಾರದ ತಪ್ಪೊಂದನ್ನು ಮಾಡಿದ್ದು, ವಿವಾಹ ಸಂದರ್ಭದಲ್ಲಿ ತಾನು ನೀಡಿದ್ದ ವಾಗ್ಧಾನವನ್ನು ತನ್ನ ಪತ್ನಿ ಮುರಿದಿದ್ದಾಳೆ. ವೈವಾಹಿಕ ಸಂಬಂಧಕ್ಕೆ ದ್ರೋಹ ಬಗೆದಿದ್ದಾಳೆಂದು ತನ್ನ ವಾದವನ್ನು ಮುಂದುವರೆಸಿದ್ದಾನೆಂದು ಸ್ಥಳೀಯ ಪತ್ರಿಕೆಯೊಂದು ವರದಿ ಮಾಡಿದೆ.