ನವದೆಹಲಿ: ದೇಶಾದ್ಯಂತ 91 ಜಲಾಶಯಗಳಲ್ಲಿ ನೀರಿನ ಪ್ರಮಾಣ ಭಾರಿ ಇಳಿಕೆಯಾಗಿದೆ ಎಂದು ಕೇಂದ್ರ ಜಲ ಆಯೋಗ ಬಿಡುಗಡೆ ಮಾಡಿರುವ ವರದಿಯಲ್ಲಿ ತಿಳಿದು ಬಂದಿದೆ. 

ಅದರಲ್ಲೂ ದಕ್ಷಿಣ ಭಾರತದ ಜಲಾಶಯಗಳಲ್ಲಿ ನೀರಿನ ಪ್ರಮಾಣ ತೀವ್ರ ಕುಸಿತಕಂಡಿದೆ. ಎಲ್ಲಾ ಜಲಾಶಯಗಳಲ್ಲೂ ನೀರಿನ ಪ್ರಮಾಣ ಶೇ.23ಕ್ಕಿಂತ ಕಡಿಮೆ ಇದೆ ಎಂದು ವರದಿಯಲ್ಲಿ ಹೇಳಲಾಗಿದೆ. 

ದೇಶದ 91 ಜಲಾಶಯಗಳಿಂದ ಒಟ್ಟು ನೀರು ಸಂಗ್ರಹ ಪ್ರಮಾಣ 157.799 ಬಿಲಿಯನ್(ಬಿಸಿಎಂ)ನಷ್ಟು. ಆದರೆ ಇದೀಗ ಕೇವಲ 35.839 ಬಿಸಿಎಂನಷ್ಟು ಮಾತ್ರ ನೀರು ಸಂಗ್ರವಾಗಿದೆ. 

ಕರ್ನಾಟಕ, ಕೇರಳ, ತಮಿಳುನಾಡು, ತೆಲಂಗಾಣ, ಹಿಮಾಚಲ ಪ್ರದೇಶ, ಪಂಜಾಬ್, ಪಶ್ಚಿಮಬಂಗಾಳ, ರಾಜಸ್ಥಾನ, ಜಾರ್ಖಂಡ್, ಒಡಿಶಾ, ಗುಜರಾತ್, ಮಹಾರಾಷ್ಟ್ರ, ಉತ್ತರಪ್ರದೇಶ, ಉತ್ತರಾಖಂಡ, ಮಧ್ಯಪ್ರದೇಶ, ಚತ್ತೀಸ್ ಗಡ, ಜಲಾಶಯಗಳಲ್ಲಿ ನೀರಿನ ಸಂಗ್ರಹ ಕುಸಿದಿದೆ. 

ದಕ್ಷಿಣ ಭಾರತದಲ್ಲಿ 31 ಜಲಾಶಯಗಳಿದ್ದು, ಇವುಗಳು ಒಟ್ಟು ನೀರು ಸಂಗ್ರಹ ಪ್ರಮಾಣ 51.59 ಬಿಸಿಎಂ(ಬಿಲಿಯನ್ ಕ್ಯೂಬಿಕ್ ಮೀಟರ್). ಆದರೆ ಇದೀಗ ಕೇವಲ 8.62 ಬಿಸಿಎಂನಷ್ಟು ಮಾತ್ರ ನೀರಿನ ಸಂಗ್ರಹವಿದೆ ಎಂದು ವರದಿ ಹೇಳಿದೆ.