ಪುಣೆ: 16 ವರ್ಷದ ಬಾಲಕಿ ಮೇಲೆ ಪೊಲೀಸರು ಸೇರಿದಂತೆ ಸುಮಾರು 113 ಮಂದಿ ಕಳೆದ 2 ವರ್ಷಗಳಿಂದ ನಿರಂತರವಾಗಿ ಅತ್ಯಾಚಾರ ನಡೆಸಿರುವ ಪ್ರಕರಣ ತಡವಾಗಿ ಬೆಳಕಿಗೆ ಬಂದಿದೆ.

ಉದ್ಯೋಗ ಕೊಡಿಸುವುದಾಗಿ ನಂಬಿಸಿ ಪಶ್ಚಿಮ ಬಂಗಾಳದ 16 ವರ್ಷದ ಬಾಲಕಿಯೊಬ್ಬಳನ್ನು ಚಿತ್ರಹಿಂಸೆ ನೀಡಿ ಬಲವಂತವಾಗಿ ವೇಶ್ಯಾವಾಟಿಕೆಗೆ ತಳ್ಳಿದ್ದು, ಅವಳ ಮೇಲೆ ಪೊಲೀಸರೂ ಸೇರಿದಂತೆ 113 ಮಂದಿ ಅತ್ಯಾಚಾರ ನಡೆಸಿದ್ದಾರೆ.

ಕಳೆದ ತಿಂಗಳು  ಬಾಲಕಿ ಅಲ್ಲಿಂದ ಪಾರಾಗಿ ದೆಹಲಿಗೆ ಬಂದು ಶನಿವಾರ ಪೊಲೀಸರಿಗೆ ದೂರು ನೀಡಿದ್ದಾಳೆ.ಪ್ರಕರಣ ಸಂಬಂಧ ವಿನುಂತಲ್ ಠಾಣೆ ಪೊಲೀಸರು ಮಹಿಳೆಯೊಬ್ಬಳನ್ನು ಬಂಧಿಸಿದ್ದಾರೆ.

ಮುಂಬೈನಲ್ಲಿ ದುಷ್ಕರ್ಮಿಗಳಿಂದ ಅತ್ಯಾಚಾರಕ್ಕೊಳಗಾಗಿದ್ದ ದೆಹಲಿಯ ಮಾಡೆಲ್ ಒಬ್ಬಳು ದುಷ್ಕರ್ಮಿಗಳಿಂದ ತಪ್ಪಿಸಿಕೊಂಡು ದೆಹಲಿಗೆ ಬರುವಾಗ ಆಕಸ್ಮಿಕವಾಗಿ ಜತೆಯಲ್ಲಿ ಆ ಬಾಲಕಿಯನ್ನು ಕರೆತಂದಿದ್ದಳು. ಆ ಬಾಲಕಿಯ ಕಥೆ ಕೇಳಿದಾಗ ಈ ಎಲ್ಲ ಅಂಶಗಳೂ ಬೆಳಕಿಗೆ ಬಂದಿವೆ.

ಪ್ರಕರಣಕ್ಕೆ ಸಂಬಂಧಿಸಿದಂತೆ ಚಂದನ್‌ನಗರ್ ಠಾಣೆ ಪೊಲೀಸರೂ, ರೋಹಿತ್ ಭಂಡಾರಿ (35), ಹರೀಶ್ ಶಹಾ (25), ನೇಪಾಳ ಮೂಲದ ಸ್ವೀಕೃತಿ ಖರೇಲ್ (26) ಹಾಗೂ ತಪೇಂದ್ರ ಸಾಹಿ (23) ಎಂಬುವವರನ್ನು ಬಂಧಿಸಿದ್ದಾರೆ.

ಪಶ್ಚಿಮ ಬಂಗಾಳದ ಸಿಲಿಗುರಿಯಲ್ಲಿ ಭಂಡಾರಿ ಎಂಬ ವ್ಯಕ್ತಿ ಬಾಲಕಿಯನ್ನು ನೋಡಿದ್ದ. ನಂತರ 2014ರ ಜನವರಿಯಲ್ಲಿ ಕೆಲಸ ಕೊಡಿಸುವುದಾಗಿ ನಂಬಿಸಿ ಬಾಲಕಿ ಕರೆತಂದಿದ್ದ. ತಾನು ಅತ್ಯಾಚಾರ ನಡೆಸಿದ ನಂತರ ಅವಳನ್ನು ವೇಶ್ಯಾವಾಟಿಕೆಗೆ ತಳ್ಳಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ