ನವದೆಹಲಿ: ಧರ್ಮಶಾಲಾದಲ್ಲಿ ಈ ತಿಂಗಳ ಅಂತ್ಯಕ್ಕೆ ನಡೆಯಲಿರುವ ವಿಶ್ವ ಉಯ್ಫರ್ ಕಾಂಗ್ರೆಸ್ ಸಮ್ಮೇಳನದಲ್ಲಿ ಭಾಗವಹಿಸಲು ಭಾರತ ಸರ್ಕಾರ ತಮಗೆ ವೀಸಾ ನಿರಾಕರಣೆ ಮಾಡಿರುವುದರ ಬಗ್ಗೆ ಉಯ್ಘರ್ ಸಮುದಾಯದ ಸಂಘಟನಾಕಾರ ದೋಲ್ಕುನ್ ಇಸಾ ಪ್ರತಿಕ್ರಿಯಿಸಿದ್ದು ಚೀನಾದೊಂದಿಗೆ ದ್ವಿಪಕ್ಷೀಯ ಸಂಬಂಧ ಉಳಿಸಿಕೊಳ್ಳುವ ಭಾಗದ ಕಾರ್ಯತಂತ್ರವಾಗಿ ವೀಸಾ ನಿರಾಕರಣೆ ಮಾಡಲಾಗಿದೆ ಎಂದು ಹೇಳಿದ್ದಾರೆ.

ವೀಸಾ ನಿರಾಕರಣೆ ಬೆಳವಣಿಗೆ ಬಗ್ಗೆ ಎಎನ್ ಐ ಗೆ ದೂರವಾಣಿ ಮೂಲಕ ಪ್ರತಿಕ್ರಿಯೆ ನೀಡಿರುವ ದೋಲ್ಕುನ್ ಇಸಾ, "ಭಾರತಕ್ಕೆ ಭೇಟಿ ನೀಡುವುದು ತಮ್ಮ ಕನಸುಗಳಲ್ಲಿ ಒಂದಾಗಿತ್ತು. ಭಾರತದ ಸಂಸ್ಕೃತಿಯನ್ನು ಆಸ್ವಾದಿಸಲು ಕಾತುರದಿಂದ ಕಾಯುತ್ತಿದ್ದೆ. ಆದರೆ ಚೀನಾದೊಂದಿಗಿನ ದ್ವಿಪಕ್ಷೀಯ ಸಂಬಂಧವನ್ನು ಉಳಿಸಿಕೊಳ್ಳುವ ಪ್ರಯತ್ನದ ಭಾಗವಾಗಿ ನನಗೆ ಭಾರತ ಸರ್ಕಾರ ವೀಸಾ ನಿರಾಕರಣೆ ಮಾಡಿದೆ ಎಂದು ಹೇಳಿದ್ದಾರೆ.

ವೀಸಾ ನಿರಾಕರಣೆ ಮಾಡಿರುವ ಭಾರತೀಯ ಅಧಿಕಾರಿಗಳ ಕ್ರಮದಿಂದ ನಿರಾಶೆಯಾಗಿದೆ ಎಂದು ದೋಲ್ಕುನ್ ಇಸಾ ತಿಳಿಸಿದ್ದಾರೆ. "ಚೀನಾದಲ್ಲಿರುವ ಧಾರ್ಮಿಕ, ಸಾಂಸ್ಕೃತಿಕ ಕ್ಷೇತ್ರಗಳಿಗೆ ಸಂಬಂಧಿಸಿದ ಕಾರ್ಯಕರ್ತರು ಹಾಗೂ ನಾಯಕರು ಉಯ್ಫರ್ ಕಾಂಗ್ರೆಸ್ ಸಮ್ಮೇಳನದಲ್ಲಿ ಭಾಗವಹಿಸಲಿದ್ದು ಚೀನಾ ವಿಷಯದಲ್ಲಿ ಭಿನ್ನಾಭಿಪ್ರಾಯ ಹೊಂದಿರುವ ಸಮುದಾಯಗಳ ನಡುವೆ ವಿಚಾರ ವಿನಿಮಯಕ್ಕೆ ಉತ್ತಮ ವೇದಿಕೆಯಾಗಿದೆ" ಎಂದು ದೋಲ್ಕುನ್ ಇಸಾ ತಿಳಿಸಿದ್ದಾರೆ.