ಗುವಾಹಟಿ: ಇಡೀ ದೇಶವೇ ಬೇಸಿಗೆಯ ಬಿಸಿಲಿಗೆ ಬೇಯುತ್ತಿರುವಾಗ ಅಸ್ಸಾಂನಲ್ಲಿ ಮಾತ್ರ ಭಾರಿ ಮಳೆ. ಪರಿಣಾಮ ಅಲ್ಲಿನ 6 ಜಿಲ್ಲೆಗಳು ಪ್ರವಾಹಕ್ಕೆ ತುತ್ತಾಗಿದ್ದು, ಸುಮಾರು ಒಂದು ಲಕ್ಷಕ್ಕೂ ಹೆಚ್ಚು ಮಂದಿ ಸೂರು ಕಳೆದುಕೊಂಡು ನಿರಾಶ್ರಿತರಾಗಿದ್ದಾರೆ.

ಅಸ್ಸಾಂ ರಾಜ್ಯ ವಿಪತ್ತು ನಿರ್ವಹಣಾ ಪ್ರಾಧಿಕಾರದ ಪ್ರಕಾರ ಅಲ್ಲಿನ ಜೊರ್ಹಟ್, ಶಿವಸಾಗರ್, ಕಚರ್, ಟಿನ್​ಸುಕಿಯಾ, ದಿಬ್ರುಗಢ ಮತ್ತು ಚರೈಡಿಯೊ ಜಿಲ್ಲೆಗಳು ಪ್ರವಾಹಕ್ಕೆ ತುತ್ತಾಗಿದ್ದು, ಐದು ಸಾವಿರ ಹೆಕ್ಟೇರ್​ಗಿಂತಲೂ ಹೆಚ್ಚು ಕೃಷಿ ಭೂಮಿ ಹಾನಿಗೀಡಾಗಿದೆ. 

ಅಸ್ಸಾಂನ ಆರು ಜೆಲ್ಲೆಗಳಲ್ಲಿ ಒಟ್ಟು 40 ನಿರಾಶ್ರಿತ ಕೇಂದ್ರಗಳನ್ನು ತೆರೆಯಲಾಗಿದ್ದರೂ ಕೇವಲ 7,412 ಜನರಿಗಷ್ಟೇ ಪುನರ್ವಸತಿ ಕಲ್ಪಿಸಲು ಸಾಧ್ಯವಾಗಿದೆ ಎಂದು ಪ್ರಾಧಿಕಾರ ತಿಳಿಸಿದೆ.

ಸೇನೆ, ರಾಷ್ಟ್ರೀಯ ಮತ್ತು ರಾಜ್ಯ ವಿಪತ್ತು ನಿರ್ವಹಣಾ ತಂಡಗಳು ಈಗಾಗಲೇ ಈ ಪ್ರವಾಹ ಪೀಡಿತ ಜಿಲ್ಲೆಗಳಿಗೆ ಧಾವಿಸಿದ್ದು, ರಕ್ಷಣಾ ಕಾರ್ಯಾಚರಣೆ ಜೋರಾಗಿ ನಡೆಯುತ್ತಿದೆ.