ಪುಣೆ: ನೋಟು ನಿಷೇಧ ಮಾಡುವ ಮೂಲಕ ಪ್ರಧಾನಿ ನರೇಂದ್ರ ಮೋದಿ ಅವರು ಆಪರೇಷನ್ ಯಶಸ್ವಿಯಾಗಿ ಮುಗಿಸಿದ್ದು ಆದರೆ ಸರಿಯಾಗಿ ಯೋಜನೆ ರೂಪಿಸದ ಕಾರಣ ರೋಗಿ ಬದುಕುವ ಬಗ್ಗೆ ಶಂಕೆ ಇದೆ ಎಂದು ಎನ್ಸಿಪಿ ನಾಯಕ ಶರದ್ ಪವಾರ್ ಹೇಳಿದ್ದಾರೆ. 

ಪುಣೆಯಲ್ಲಿ ನಡೆದ ಪಕ್ಷದ ಕಾರ್ಯಕರ್ತರ ಸಮಾವೇಶದಲ್ಲಿ ಮಾತನಾಡಿದ ಪವಾರ್, ನೋಟು ನಿಷೇಧ ಕುರಿತಂತೆ ದೆಹಲಿಯಲ್ಲಿ ಅನೇಕರು ನನ್ನ ಅಭಿಪ್ರಾಯ ಕೇಳಿದರು. ಆಗ ವೈದ್ಯರೇನೋ ಯಶಸ್ವಿಯಾಗಿ ಕಾರ್ಯನಿರ್ವಹಿಸಿದ್ದಾರೆ. ಆದರೆ ಸರ್ಜರಿ ನಂತರದ ಆರೈಕೆಯ ಕೊರೆತೆಯಿಂದಾಗಿ ರೋಗಿ ಸಾಯುತ್ತಾನೋ ಬದುಕುತ್ತಾನೋ ಎಂಬ ಶಂಕೆ ಇದೆ ಎಂದು ಹೇಳಿದ್ದಾಗಿ ಕಾರ್ಯಕರ್ತರಿಗೆ ತಿಳಿಸಿದ್ದಾರೆ. 

ನೋಟು ನಿಷೇಧದಿಂದಾಗಿ ಗ್ರಾಮೀಣ ಪ್ರದೇಶದ ಜನರು ಹೆಚ್ಚು ಸಮಸ್ಯೆ ಅನುಭವಿಸುತ್ತಿದ್ದಾರೆ. ಗ್ರಾಮೀಣ ಪ್ರದೇಶದ ಜನರೆಲ್ಲಾ ಸಹಕಾರಿ ಬ್ಯಾಂಕ್ ಗಳನ್ನೇ ಅವಲಂಭಿಸಿದ್ದಾರೆ. ಆದರೆ ಹೊಸ ಕಾನೂನಿನ ಪ್ರಕಾರ ಹಳೇ ನೋಟುಗಳ ಡಿಪಾಸಿಟ್ ಮಾಡುವುದಕ್ಕಾಗಲಿ ಅಥವಾ ಬದಲಾವಣೆ ಮಾಡುವುದಕ್ಕಾಗಿ ಅವಕಾಶವಿಲ್ಲ. ಈಗಿದ್ದರು ಗ್ರಾಮೀಣ ಬ್ಯಾಂಕ್ ಗಳಲ್ಲಿ 4,500 ಕೋಟಿಯಷ್ಟು ಹಣ ಡಿಪಾಸಿಟ್ ಆಗಿದೆ ಎಂದರು. 

ಸಹಕಾರಿ ಬ್ಯಾಂಕ್ ಗಳಲ್ಲಿ ಡಿಪಾಸಿಟ್ ಆಗಿರುವ ನೋಟುಗಳನ್ನು ದೊಡ್ಡ ಬ್ಯಾಂಕ್ ಗಳು ತೆಗೆದುಕೊಳ್ಳಲು ಸಿದ್ಧವಿಲ್ಲ. ಹೀಗಾಗಿ ಸಹಕಾರಿ ಬ್ಯಾಂಕ್ ಗಳು ಸಂಕಷ್ಟದಲ್ಲಿವೆ ಎಂದರು.