ನವದೆಹಲಿ: ವಿದೇಶಾಂಗ ವ್ಯವಹಾರಗಳ ಸಚಿವೆ ಸುಷ್ಮಾಸ್ವರಾಜ್ ಇಂದು ಶ್ರೀಲಂಕಾಕ್ಕೆ ತೆರಳಿದ್ದಾರೆ. ಎರಡು ದಿನಗಳ ಪ್ರವಾಸದಲ್ಲಿ ಸುಷ್ಮಾಸ್ವರಾಜ್ ಪದೇ ಪದೇ ಬಿಗಡಾಯಿಸುತ್ತಿರುವ ಮೀನುಗಾರರ ಸಮಸ್ಯೆ, ತಮಿಳು ಜನಾಂಗಕ್ಕೆ ಅಲ್ಪಸಂಖ್ಯಾತ ಸ್ಥಾನಮಾನ ನೀಡುವುದು ಸೇರಿದಂತೆ ಭಾರತ- ಶ್ರೀಲಂಕಾ ನಡುವಿನ ಕೆಲವು ಮಹತ್ವದ ವಿಷಯಗಳ ಬಗ್ಗೆ ಮಾತುಕತೆ ನಡೆಸಲಿದ್ದಾರೆ.

ಶ್ರೀಲಂಕಾದ ತಮ್ಮ ಸಹೋದ್ಯೋಗಿ ಮಂಗಳ ಸಮರವೀರ ಅವರ ಜತೆ ಮಾತುಕತೆ ನಡೆಸುವ ಸ್ವರಾಜ್ ಪ್ರಾದೇಶಿಕ ಹಾಗೂ ರಾಜತಾಂತ್ರಿಕ ವಿಷಯಗಳ ಬಗ್ಗೆ ಬೆಳಕು ಚೆಲ್ಲುವರು. ಆರ್ಥಿಕ ಸಹಕಾರ, ವ್ಯಾಪಾರ, ಇಂಧನ, ವಿಜ್ಞಾನ, ತಂತ್ರಜ್ಞನ, ಸಾಮಾಜಿಕ, ಸಂಸ್ಕೃತಿ ಪ್ರವಾಸೋದ್ಯಮ, ಆರೋಗ್ಯ, ರಕ್ಷಣೆ, ನಾಗರಿಕ ವಿಮಾನಯಾನ ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ  ಒಪ್ಪಂದಕ್ಕೆ ಸಹಿ ಹಾಕಲಿದ್ದಾರೆ.

ಈ ಬಾರಿಯ ಪ್ರವಾಸದಲ್ಲಿ  ಪ್ರಮುಖವಾಗಿ ಎರಡು ರಾಷ್ಟ್ರಗಳ ನಡುವೆ ಉಲ್ಬಣಿಸುತ್ತಿರುವ ಮೀನುಗಾರರ ಸಮಸ್ಯೆ ಪರಿಹಾರಕ್ಕೆ ಒತ್ತು ನೀಡಲಿದ್ದಾರೆ. ಮೀನುಗಾರರು ಮುಂದಿಟ್ಟಿರುವ ಬೇಡಿಕೆಗಳ ಬಗ್ಗೆ ಉಭಯ ನಾಯಕರು ಚರ್ಚೆ ನಡೆಸಲಿದ್ದಾರೆ ಎಂದು ವಕ್ತಾರ ವಿವೇಕ್ ಸ್ವರೂಪ್ ತಿಳಿಸಿದ್ದಾರೆ.