ನವದೆಹಲಿ: ಕಾಂಗ್ರೆಸ್ ನ ರಾಜ್ಯಸಭಾ ಸದಸ್ಯ ಮಣಿಶಂಕರ್ ಅಯ್ಯರ್ ರಾಜ್ಯಸಭೆ ಹೋಗುವ ಬದಲು ಲೋಕಸಭೆಗೆ ಹೋಗಿ ಎಲ್ಲರ ಹುಬ್ಬೇರಿಸಿದ್ದಾರೆ.
ಲೋಕಸಭೆಯಲ್ಲಿ ಪ್ರಶ್ನೋತ್ತರ ಕಲಾಪ ನಡೆಯುತ್ತಿರಬೇಕಾದರೆ ಸದನದ ಕೊನೆಯ ಸಾಲಿನಲ್ಲಿ ಮಣಿಶಂಕರ್ ಅಯ್ಯರ್ ನಿಂತಿರುವುದು ಕಂಡು ಹಲವರು ಅಚ್ಚರಿಗೊಳಗಾಗಿದ್ದಾರೆ. ಲೋಕಸಭೆಯ ಆಪ್ತ ಸಹಾಯಕರ ಬಳಿ ಏನನ್ನೋ ಕೇಳಿದ ಮಣಿಶಂಕರ್ ಅಯ್ಯರ್ ತಕ್ಷಣವೇ ಅಲ್ಲಿಂದ ನಿರ್ಗಮಿಸಿದ್ದಾರೆ.
ಮತ್ತೆ ಕೆಲವು ನಿಮಿಷಗಳಾದ ಮೇಲೆ ಲೋಕಸಭೆಯ ಮತ್ತೊಂದು ಪ್ರವೇಶ ದ್ವಾರದ ಬಳಿ ಕಾಣಿಸಿಕೊಂಡಿದ್ದಾರೆ, ಆದರೆ ಈ ಬಾರಿ ಅವರು ಲೋಕಸಭೆಗೆ ಹೋಗಲಿಲ್ಲ, ಮತ್ತೊಮ್ಮೆ ಆಪ್ತಸಹಾಯಕರ ಬಳಿ ಮಾತನಾಡಿ ಅಲ್ಲಿಂದ ನಿರ್ಗಮಿಸಿದ ಘಟನೆ ಇಂದಿನ ಸಂಸತ್ ಕಲಾಪದ ಸ್ವಾರಸ್ಯವಾಗಿತ್ತು.