ನವದೆಹಲಿ: ಭಾರತೀಯ ಮೂಲದ ಗೂಗಲ್ ಸಿಇಓ ಸುಂದರ್ ಪಿಚೈ ಅವರ ಕೋರಾ  ಅಕೌಂಟ್ ಹ್ಯಾಕ್ ಆಗಿದ್ದು, ಈ ಹಿಂದೆ ಫೇಸ್ ಬುಕ್ ಸಂಸ್ಥಾಪಕ ಮಾರ್ಕ್ ಜುಕರ್ ಬರ್ಗ್ ಅವರ ಟ್ವಿಟರ್ ಅಕೌಂಟ್ ಹ್ಯಾಕ್​ಮಾಡಿದ ತಂಡವೇ ಈಗ ಗೂಗಲ್ ಸಿಇಒ ಅಕೌಂಟನ್ನು ಹ್ಯಾಕ್ ಮಾಡಿದೆ ಎಂದು ಸೋಮವಾರ ಮಾಧ್ಯಮ ವರದಿಗಳು ತಿಳಿಸಿವೆ.

ಭಾನುವಾರ ರಾತ್ರಿ ಪಿಚೈ ಅವರ ಅಕೌಂಟ್ ಹ್ಯಾಕ್ ಮಾಡಲಾಗಿದ್ದು, ಹಲವು ಮಾಹಿತಿಗಳ ಸೋರಿಕೆಯಾಗಿದೆ ಎನ್ನಲಾಗಿದೆ. ಹ್ಯಾಕರ್ ತಂಡವನ್ನು ಅವರ್ ಮೈನ್ ಎಂದು ಗುರುತಿಸಲಾಗಿದ್ದು, ಪಿಚೈ ಅವರ ಹೆಸರಿನಲ್ಲಿ ಹಲವು ಸಂದೇಶಗಳನ್ನು ಪೋಸ್ಟ್ ಮಾಡಲಾಗಿದೆ. ಕೋರಾ ಅಕೌಂಟ್​ನ ಲಿಂಕ್ ಟ್ವಿಟರ್​ಗೆ ಹೊಂದಿಕೊಂಡಿರುವುದರಿಂದ ಟ್ವೀಟ್ ಅಕೌಂಟ್ ಕೂಡ ಹ್ಯಾಕ್ ಆಗಿರಬಹುದು ಎಂದು ಸಂಶಯ ವ್ಯಕ್ತಪಡಿಸಲಾಗಿದೆ.

ಪಿಚೈ ಅವರಿಗೆ ಟ್ವಿಟರ್​ನಲ್ಲಿ 5 ಲಕ್ಷದ ಎಂಟು ಸಾವಿರ ಹಿಂಬಾಲಕರಿದ್ದಾರೆ. ಹ್ಯಾಕ್ ಮಾಡಿರುವುದನ್ನು ಸ್ವತಃ ಅವರ್ ಮೈನ್ ಖಚಿತಪಡಿಸಿದ್ದು, ನಿಮ್ಮ ಅಕೌಂಟ್ ಎಷ್ಟು ಸುರಕ್ಷಿತ ಎಂದು ತಿಳಿಯಲು ಹ್ಯಾಕ್ ಮಾಡಿದ್ದೇವೆ. ಅಕೌಂಟನ್ನು ಅಪ್​ಡೇಟ್ ಮಾಡಿಕೊಳ್ಳಿ ಎಂದು ಸೂಚಿಸಿದೆ. ಅಲ್ಲದೆ ಮುಂದಿನ ದಿನಗಳಲ್ಲಿ ಗಣ್ಯರ ಅಕೌಂಟ್​ಗಳನ್ನು ಸುರಕ್ಷತೆ ವಿಚಾರವಾಗಿ ಹ್ಯಾಕ್ ಮಾಡಲಾಗುವುದು ಎಂದು ಎಚ್ಚರಿಸಿದೆ.

2012ರಲ್ಲಿ ಫೇಸ್​ಬುಕ್ ಸಿಇಓ ಮಾರ್ಕ್ ಜುಕರ್​ಬರ್ಗ್ ಅವರ ಟ್ವಿಟರ್ ಅಕೌಂಟ್​ನ ಪಾಸ್​ವರ್ಡ್ ಹ್ಯಾಕ್ ಮಾಡಿ ಸುದ್ದಿಯಾಗಿತ್ತು.