ನವದೆಹಲಿ: ಅಲ್- ಖೈದಾ ಉಗ್ರ ಸಂಘಟನೆ ಭಾರತೀಯ ರೈಲ್ವೆ ಇಲಾಖೆಯ ಮೈಕ್ರೋ ಸೈಟ್ ರೈಲ್ ನೆಟ್ ಪೇಜ್ ನ್ನು ಹ್ಯಾಕ್ ಮಾಡಿದೆ. ಕೇಂದ್ರಿಯ ರೈಲ್ವೆಯ ಭೂಸ್ವಾಲ್ ವಿಭಾಗದ ಸಿಬ್ಬಂದಿ ಇಲಾಖೆಯ ಪೇಜ್ ನ್ನು ಹ್ಯಾಕ್ ಮಾಡಲಾಗಿದ್ದು, ದಕ್ಷಿಣ ಏಷ್ಯಾದ ಅಲ್- ಖೈದಾ ನಾಯಕ ಮೌಲಾನಾ ಅಸಿಮ್ ಉಮರ್ ನ ಸಂದೇಶವನ್ನು ಹ್ಯಾಕ್ ಮಾಡಲಾಗಿರುವ ವೆಬ್ ಸೈಟ್ ನಲ್ಲಿ ಹಾಕಲಾಗಿದೆ.
ನಿಮ್ಮ ಸಾಗರದಲ್ಲಿ ಬಿರುಗಾಳಿ ಏಕಿಲ್ಲ? ಎಂದು ಭಾರತೀಯ ಮುಸ್ಲಿಮರಿಗೆ ಮೌಲಾನಾ ಅಸಿಮ್ ಉಮರ್ ನೀಡಿರುವ ಸಂದೇಶವನ್ನು ವೆಬ್ ಸೈಟ್ ನಲ್ಲಿ ಹಾಕಲಾಗಿದೆ. ಮರೆತುಹೋಗಿರುವ ಜಿಹಾದ್ ನ ಪಾಠವನ್ನು ಭಾರತೀಯರಿಗೆ ಮತ್ತೆ ಹೇಳಿಕೊಡಲು ದೆಹಲಿಯ ನೆಲ ಶಾ ಮುಹಾದಿತ್ ದೆಲ್ಹವಿ ಗೆ ಜನ್ಮ ನೀಡುವುದಿಲ್ಲವೇ? ಎಂದು ಹ್ಯಾಕ್ ಮಾಡಿರುವ ಪುಟದಲ್ಲಿ ಹಾಕಲಾಗಿರುವ 11 ಪುಟಗಳ ಪತ್ರವೊಂದು ಕೇಳಿದೆ.    
ಅಲ್-ಖೈದಾ ಉಗ್ರ ಸಂಘಟನೆ ನೀಡಿರುವ ಸಂದೇಶ ಭಾರತೀಯ ಮುಸ್ಲಿಮರಿಗೆ ಜಿಹಾದ್ ನಲ್ಲಿ ತೊಡಗುವಂತೆ ಉತ್ತೇಜಿಸಿದೆ. ಉತ್ತರ ಪ್ರದೇಶದ ನಿವಾಸಿ ಉಮರ್ ನನ್ನು ಭಾರತೀಯ ಉಪಖಂಡದ ಅಲ್-ಖೈದಾ ಮುಖ್ಯಸ್ಥನನ್ನಾಗಿ ಕಳೆದ ವರ್ಷ ನೇಮಕ ಮಾಡಲಾಗಿತ್ತು.