ನವದೆಹಲಿ: ನೋಯ್ಡಾ ಮೂಲದ ಫ್ಯಾಶನ್ ಡಿಸೈನರ್ ಶಿಪ್ರ ಮಲಿಕ್ ಅವರನ್ನು ಸೋಮವಾರ ನಿಗೂಢ ರೀತಿಯಲ್ಲಿ ಅಪಹರಿಸಲಾಗಿದೆ. ಶಿಪ್ರ ಮಲಿಕ್ ಅವರ ನಿವಾಸದಿಂದ 500 ಮೀಟರ್ ದೂರದಲ್ಲಿ ಅವರ ಕಾರು ಪತ್ತೆಯಾಗಿದ್ದು, ಮಲಿಕ್ ಅವರು ಪೊಲೀಸ್ ಸಹಾಯವಾಣಿ 100 ಕರೆ ಮಾಡಿದ್ದಾರೆ. ಆದರೆ 10 ಸೆಕೆಂಡ್ ಗಳ ಕರೆಯಲ್ಲಿ ಯಾವುದೇ ಮಾತನಾಡಲು ಸಾಧ್ಯವಾಗಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.
ಮಲಿಕ್ ಅವರ ಪತಿ ಚೇತನ್ ಮಲಿಕ್ ಅವರು ನೋಯ್ಡಾ ಪೊಲೀಸ್ ಠಾಣೆಯಲ್ಲಿ ಅಪಹರಣ ಕೇಸ್ ದಾಖಲಿಸಿದ್ದು, ಮಲಿಕ್ ಅವರು ಕೊನೆ ಬಾರಿ ಕರೆ ಮಾಡಿದ ಲಜಪತ್ ನಗರದಲ್ಲಿ ಪೊಲೀಸರು ಶೋಧ ಕಾರ್ಯ ನಡೆಸುತ್ತಿದ್ದಾರೆ.
ನಾಪತ್ತೆಯಾಗಿರುವ ಶಿಪ್ರ ಮಲಿಕ್ ಅವರು ಬೋಟಿಕ್ ವೊಂದನ್ನು ನಡೆಸುತ್ತಿದ್ದು, ಕಟ್ಟಡ ನಿರ್ಮಾಣ ಕಂಪನಿಯ ಮಾಲೀಕರನ್ನು ಮದುವೆಯಾಗಿದ್ದಾರೆ.
ನಾಪತ್ತೆಯಾಗಿರುವ ಮಹಿಳೆ ಕುಟುಂಬ ನೀಡಿದ ದೂರಿನ ಅನ್ವಯ ಅಪಹರಣ ಕೇಸ್ ದಾಖಲಿಸಿಕೊಂಡಿದ್ದು, ಪತ್ತೆ ಕಾರ್ಯ ನಡೆಯುತ್ತಿದೆ ಎಂದು ಪೊಲೀಸ್ ವರಿಷ್ಠಾಧಿಕಾರಿ ದಿನೇಶ್ ಯಾದವ್ ಅವರು ತಿಳಿಸಿದ್ದಾರೆ.